လါအီးကထိဘၢၣ်(၂၈)သီ,၂၀၂၄နံၣ်
ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် ဘိးဘၣ်ရၤလီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, ကီၢ်ဆၣ်လၢၢ်ဒိၣ်ဟီၣ်က၀ီၤအပူၤ ခီဖျိလၢသုးကီၣ်ကးအသုးပညိၣ်ခးလီၤကျိဖးဒိၣ်တဖၣ် ဆူလီၢ်က၀ီၤကမျၢၢ်အိၣ်ဒူသ၀ီတဖၣ်ပူၤအဃိလီၢ်က၀ီၤကမျၢၢ်ဘၣ်ဒိ(၆)ဂၤ,ကမျၢၢ်အိၣ်ဟံၣ်ဘၣ်ဟးဂီၤကွံၥ်(၁)ဖျၢၣ်ဒီးထိး(၁)ဒုန့ၣ်လီၤ.
၂၀၂၄နံၣ်, လါအီးကထိဘၢၣ်(၂၅)သီအနံၤ, မုၢ်ထူၣ်(၁၁း၃၂)နၣ်ရံၣ်အဆၢကတီၢ် သုးကီၣ်ကးအသုး(ခလရ-၂၆၄)သုးရ့ၣ် ခးလီၤ(၁၂၂-မမ)ကျိဖးဒိၣ်(၃)ဖျၢၣ်ဆူ ကီၢ်ဆၣ်လၢၢ်ဒိၣ်ပူၤဒီး လဲၤလီၤတဲၥ်ပိၢ်ဖးထီၣ်၀ဲဒၣ် ဖဲကီၢ်သၣ်စ့သ၀ီကပၤ(၂)ဖျၢၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
တနံၤဃီဖဲမုၢ်ထူၣ်(၁၁း၄၅)နၣ်ရံၣ်အဆၢကတီၢ်သုးကီၣ်ကးအသုးရ့ၣ်ခးလီၤကဒီး(၁၂၀မမ)ကျိဖးဒိၣ်(၂)ဖျၢၣ်အဃိလဲၤလီၤတဲၥ်ပိၥ်ဖးထီၣ်၀ဲဒၣ်ဖဲလဲးခးသ၀ီပူၤအဃိဘၣ်ဒိ၀ဲဒီၣ်ညိးကၠံၣ်အခီၣ်ဒူၣ်သၣ်(၂)ခီလၢၥ်တကးဘၣ် ဘၣ်ဟးဂီၤကွံၥ်၀ဲစ့ၢ်ကီး ဒီၣ်မွ့ကၠံၣ်ဟံၣ်(၁)ဖျၢၣ်ဒီးတၢ်ထုးထံးလီၢ်(၁)ဖျၢၣ်န့ၣ်လီၤ.
လါအီးကထိဘၢၣ်(၂၆)သီအနံၤ, ဟါ(၂း၃၄)နၣ်ရံၣ်အဆၢကတီၢ် သုးကီၣ်ကးအသုးလၢအိၣ်ဖဲကွ့ခၠီ၀းတဖၣ် ခးလီၤ(၁၂၀-မမ)ကျိဖးဒိၣ်(၁)ဖျၢၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲသီၣ်ပူး(ကချံသန့ၤ)၀ံၤ အူစီၣ်အူလၢအမ့ၢ် ပှၤနီၣ်ချံဖိ ဘၣ်ဒိ၀ဲအဟၢဖၢန့ၣ်လီၤ.
တနံၤဃီဖဲဟါ(၃း၄၅)နၣ်ရံၣ်အဆၢကတီၢ် သုးကီၣ်ကးအသုးခးလီၤကဒီး(၁၂၀-မမ)ကျိဖးဒိၣ်(၁)ဖျၢၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲတီကၠီၣ်ပီးသ၀ီပူၤ၀ံၤ ဘၣ်ဒိ၀ဲကမျၢၢ်(၆)ဂၤ ဒီးထိး(၁)ဒုအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၣ်၀ဲန့ၣ်လီၤ.
၂၀၂၄နံၣ်, လါအီးကထိဘၢၣ်(၂၄)သီအနံၤ, ဂီၤ(၉း၄၅)နၣ်ရံၣ်အဆၢကတီၢ် သုးကီၣ်ကးအသုး(ခလရ-၂၆၄)သုးရ့ၣ် ခးလီၤ(၁၂၂-မမ)ကျိဖးဒိၣ်(၈)ဖျၢၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲကီၢ်သၣ်စ့သ၀ီအကပၤန့ၣ်လီၤ.
