လါအီးကထိဘၢၣ်(၂၄)သီ,၂၀၂၄နံၣ်
ကီၫ်ကၠီၣ်တဲၣ်,စမိးဆခိၣ်ကီၫ်ရ့ၣ်အပူၤ ခီကီၫ်ပှၤမၤတၫ်ဖိလၢလိၣ်ဘၣ် တၫ်အုၣ်ကီၤတဖၣ်ကန့ၫ်အဂီၫ် ၀ဲၤကျိၤအဆိကတၢၫ်တခါလၢ ကမၤစၢၤန့ၫ်ခီကီၫ်ပှၤမၤတၫ်ဖိတဖၣ် တၫ်အုၣ်ကီၤလၢဖိးစဲစးအံၤ လါလၢကဟဲန့ၣ် ကအိးထီၣ်၀ဲအဂ့ၫ် ပှၤမၤတၫ်ဖိကိတိာ်တဲလီၤ၀ဲလီၤ.
ဖဲလါအီးကထိဘၢၣ်(၂၂)သီအနံၤ တၫ်မၤ၀ဲတၫ်ပၢဆှၢရဲၣ်ကျဲၤခီကီၫ်ပှၤမၤတၫ်ဖိ ဒီကလုာ်ကမံးတံာ်တၫ်အိၣ်ဖှိၣ် ၀ံၤအလီၫ်ခံ ဘိးဘၣ်ရၤလီၤ၀ဲအဂ့ၫ် Bangkok Post ပာ်ဖျါဃာ်၀ဲ ဖဲလါအီးကထိဘၢၣ်(၂၃)သီအနံၤန့ၣ်လီၤ.
ကီၫ်ပယီၤ,ကဘီဒံယါ,လၣ်အိၣ်ဒီးဘံၣ်ယဲးနၣ်ထံကီၫ် ခီကီၫ်ပှၤမၤတၫ်ဖိတဖၣ်အဂီၫ် ၀ဲၤကျိၤလၢကမၤစၢၤန့ၫ်တၫ် တၫ်ကအိးထီၣ်အီၤန့ၣ် ကမံးတံာ်အၢၣ်လီၤတူၫ်လိာ်၀ဲအဂ့ၫ် ကိတိာ်တဲ၀ဲလီၤ.
ခီကီၫ်ပှၤမၤတၫ်ဖိတဖၣ်အဂီၫ် တၫ်ကထုးထီၣ်န့ၫ်အီၤ တၫ်လဲၤထီၣ်က့ၤလီၤတၫ်အုၣ်ကီၤတဖၣ်အဂီၫ်ဒီး လၢတလါအံၤ(၃၁)သီ ပှၤမၤတၫ်ဖိလၢအလံာ်သးသမူလၢာ်တဖၣ်အဂီၫ် ကဟ့ၣ်တၫ်မၤစၢၤအဂီၫ်န့ၣ်လီၤ.
လၢထံကီၫ်ဒီတဘ့ၣ်အပူၤ ခီကီၫ်ပှၤမၤတၫ်ဖိခဲလၢာ် ဖဲလါအီးကထိဘၢၣ်(၃၁)သီအနံၤ ပာ်၀ဲဒ်အလီၫ်ခံကတၢၫ်၀ံၤ တၫ်ကဘၣ်တီၣ်ထီၣ်မံၤသၣ်အဂ့ၫ် ဖဲအပူၤကွံာ် လါအီးကထိဘၢၣ်အပူၤ ဒ်ပဒိၣ်တၫ်ဆၢတဲာ်ဃာ်အသိး မၤထွဲ၀ဲအဂ့ၫ် တၫ်ဆီလီၤပာ်လီၤတၫ်ဖံးတၫ်မၤ၀ဲၤကျိၤ ပှၤနဲၣ်တၫ်ခိၣ်ကျၢၫ် တဲ၀ဲလီၤ.
တၫ်မၤကစၫ်တဖၣ်စ့ၫ်ကီး ကတီၣ်ထီၣ်ဘၣ်တၫ်ဂ့ၫ်တၫ်ကျိၤဒီးပှၤမၤတၫ်ဖိလၢ မၤတၫ်လၢအ၀ဲသ့ၣ်အိၣ်တဖၣ် အတၫ်ဖံးတၫ်မၤခွဲးယာ် လံာ်တၫ်ပျဲအသးသမူန့ၣ် ကလဲၤမၤန့ၫ်ဘၣ်၀ဲလၢတၫ်ပာ်ပနီၣ်ဃာ် တၫ်ဆၢကတီၫ်အပူၤအဂီၫ် တဲဆီၣ်တခူထီၣ်ဃာ်၀ဲလီၤ.
Ref: RFA
