လါအီးကထိဘၢၣ်(၂၄)သီ,၂၀၂၄နံၣ်
ဖဲလါအီးကထိဘၢၣ်(၁၇)သီအနံၤ လၢစကဲကီၫ်ခီ,၀့ၫ်ဘူးတလ့ၣ် သုးကီၣ်ကးအသုးတဖၣ် မၤသံတၫ်၀ံၤ ဖီၣ်သူကမျၢၫ် ဒ်ပှၤကညီတၫ်ဒီသဒၢဒီးမၤကမၣ် သုးကွီၫ်မ့ၣ်တၫ်မၤကမၣ်တဖၣ်အဂ့ၫ် ဒီကလုာ်ဃူဖိးပဒိၣ်(NUG)ဘိးဘၣ်ရၤလီၤ၀ဲ ဖဲလါအီးကထိဘၢၣ်(၂၂)သီအနံၤန့ၣ်လီၤ.
“တမ့ၫ်မၤသံ၀ဲဒ်မုၫ်ဆ့ၣ်မုၫ်ဂီၤအသိးဘၣ်.ကျီလီၤ၀ဲတကူာ်တကူာ်၀ံၤဘျးလီၤ၀ဲလၢသ၀ီတီၣ်လိၤဒ်သိးအံၤန့ၣ် မ့ၫ်ဒ်သိးလၢကမျၢၫ်အကျါ ပှၤမ့ၫ်ဆီၣ်ထွဲမၤစၢၤ တၫ်ပၢၫ်ဆၢန့ၣ် ကကဲထီၣ်ဒ်သိးအံၤလီၤန့ၣ် ဖၢနုာ်လီၤဃာ် တၫ်ပျံၤ တၫ်ဖုးအဂ့ၫ်”ဒီကလုာ်ဃူဖိးပဒိၣ် ပှၤတဲတၫ်ပၢအူန့ၣ်ဘိလးတဲ၀ဲလီၤ.
ဘူးတလ့ၣ်ကီၫ်ဆၣ်,စံၣ်ပၣ်သ၀ီ(စီပါကျေးရွာ) သုးကီၣ်ကးအမုၫ်နုာ်ကလံၤစိးကီၫ်ခီသုး၀ဲၤလီၫ်ခိၣ်သ့ၣ် အစုတီၤဖီလာ် သုးကျိၤဒီးတၫ်ပၢၫ်ဆၢသုးတဖၣ် ဘၣ်သဂၢၫ်ခးလိာ်သး၀ံၤအလီၫ်ခံ သုးကီၣ်ကးတကပၤ ဘၣ်ဒိဆါအဃိ နုာ်လီၤလၢ သ၀ီပူၤ မၤသံကမျၢၫ်,ဒွဲၣ်အူထီၣ်ကွံာ်ကမျၢၫ်ဟံၣ်ဃီဒီးဖီၣ်သူကမျၢၫ်ဒ်တၫ်ဒီသဒၢအသိးတဖၣ်န့ၣ်လီၤ.
“တမ့ၫ်ထဲဘူတလ့ၣ်ဘၣ်.လၢမဲာ်ညါ တၫ်မၤသံတၫ်ဒီဒူၣ်ဒီထၢတဖၣ်,တၫ်မၤသံလီၤရၢၫ်လီၤစၢၤတဖၣ် မ့ၫ်ဒၣ်သုးကီၣ်ကးအသုးဒီးအ၀ဲသ့ၣ်အစုတီၤဖီလာ် ပၠူၣ်စီထံတဖၣ် မၤကမၣ်၀ဲအိၣ်အါမးအဂ့ၫ်”တဲ၀ဲလီၤ.
တကးဘၣ်အပူၤကွံာ် လါအီးကထိဘၢၣ်(၁၁)သီအနံၤတုၤ အသီ(၂၀)နံၤအတီၫ်ပူၤ မုၫ်နုာ်ကလံၤစိးကီၫ်ခီသုး၀ဲၤလီၫ်ခိၣ်သ့ၣ် အသုးကျိၤလၢဂံၫ်ဘါအိၣ်(၁၀၀)ဘျဲၣ်အံၤ နုာ်လီၤ၀ဲဆူ ဘူးတလ့ၣ်ကီၫ်ဆၣ်ပူၤ သ၀ီ,က၀ီၤဒ့(၁၇)ခါ အပူၤ၀ံၤ မၤသံတၫ်,ဒွဲၣ်အူတၫ်ဒီးဟဲခးလီၤတၫ်လၢကလံၤကျါအဃိ ထံဖိကီၫ်ဖိကမျၢၫ် ဘၣ်တၫ်မၤသံတစှၤန့ၫ် (၂၄)ဂၤ၀ံၤ လၢအကျါ ဖိသၣ်(၃)ဂၤ,ပိာ်မုၣ်(၃)ဂၤဒီးသးပှၫ်(၁)ဂၤပာ်ဃုာ်၀ဲအဂ့ၫ် တဲ၀ဲလီၤ.
သုးကီၣ်ကးအတၫ်မၤတဖၣ် ထံဂုၤကီၫ်ဂၤတကပၤ မ့ၫ်ဟ့ၣ် တၫ်ပျဲဒ်သိးအံၤန့ၣ် ပှၤလၢဖီၣ်ဃာ် ဘၣ်ထွဲသုးဂ့ၫ်၀ီ တၫ်တိာ်ကူၣ်ကျဲၤဒီးတၫ်ဆိကမိၣ်ဆိကမးလၢအၢအၢသီသီတဖုအံၤ မၤတၫ်ကဒူထီၣ်အဃိ တၫ်မၤကမၣ်တဖၣ် တၫ်ဒုးအိၣ်ထီၣ်တၫ်တီတၫ်တြၫ်ကန့ၫ်အဂီၫ် ထံဂုၤကီၫ်ဂၤတကပၤ ကလဲၤလိာ်ဘၣ်၀ဲစ့ၫ်ကီး ဃ့ထီၣ်ဃာ်၀ဲလီၤ.
Ref: Federal FM
