တုၤ တၢ်ထၢဆူၣ်သုးတၢ်မၤလိ နီၣ်ဂံၢ်(၅) ပှၤလၢတၢ်ဘၣ်ထၢဆူၣ်သုးအိၣ်ထီၣ် (၂)ကလးဘျဲၣ်

လါအီးကထိဘၢၣ်(၂၁)သီ,၂၀၂၄နံၣ်

လါအီးကထိဘၢၣ်(၁၉)သီအနံၤ,တၢ်ဃိထံၣ်သ့ၣ်ညါကီၢ်ပယီၤဂ့ၢ်၀ီဒီးတၢ်သဘံၣ်သဘုၣ်ကရၢ(BACS)ဘိးဘၣ်ရၤလီၤ၀ဲလၢ ကီၢ်ပယီဒီတဘ့ၣ် သုးတၢ်သိၣ်လိကၠိ(၂၃)ဖျၢၣ်အပူၤ သုးကီၣ်ကးတၢ်ထၢဆူၣ်သုးတၢ်မၤလိနီၣ်ဂံၢ်(၁)တုၤ(၅) ပှၤလၢတၢ်ဘၣ်ထၢဆူၣ်သုးအိၣ်ထီၣ်တုၤ(၂)ကလးဘျဲၣ်အဂ့ၢ်န့ၣ်လီၤ.

သုးကီၣ်ကး ထၢန့ၢ်ဆူၣ်ပှၤနီၣ်ဂံၢ်(၅)ကထိဘျၢၣ်လၢ တၢ်ထၢဆူၣ်သုးတၢ်မၤလိနီၣ်ဂံၢ်(၁)အပူၤ၀ံၤ သုးတၢ်မၤလိနီၣ်ဂံၢ်(၂),(၃),(၄),(၅)တဖၣ်အပူၤ ထၢန့ၢ်ဆူၣ်န့ၢ်ဒၣ်ထဲ ပှၤနီၣ်ဂံၢ်(၄)ကထိဘျဲၣ်အဃိ တၢ်ပၥ်ပနီၣ်အနီၣ်ဂံၢ်နီၣ်ဒွးတပှဲၤဘၣ်အဂ့ၢ် ပၥ်ဖျါဃၣ်၀ဲလၢ အလံၥ်ပၥ်ဖျါအပူၤန့ၣ်လီၤ.

သုးတၢ်သိၣ်လိနီၣ်ဂံၢ်(၁)ဒီး(၂)အပူၤ ထၢန့ၢ် သုးတၢ်သိၣ်လိဖိညီဘၣ်ဆၣ် မ့မ့ၢ်သုးတၢ်သိၣ်လိအဂၤတဖၣ်တခီ မၤဆူၣ်မၤဆိးထၢန့ၢ်ဆူၣ်တဖၣ်အိၣ်၀ဲအသိး ဃ့န့ၢ်ဆူၣ်ကျိၥ်စ့ မၤပှဲၤပှၤကညီလီၢ်တဖၣ်စ့ၢ်ကီးအိၣ်၀ဲအဂ့ၢ် စံး၀ဲန့ၣ်လီၤ.

သုးကီၣ်ကးပှၤကတိၤတၢ်ပၢ သုးခိၣ်ကျၢၢ်စီၣ်မ့ထိတခီ တဲ၀ဲလၢ သုးတၢ်သိၣ်လိဖိတဖၣ် တၢ်တပျဲလီၤဆူ သုးမဲၥ်ဖံးခိၣ်ဘၣ်ဆၣ် ယိၤဒိၣ်ကီၢ်စဲၣ်ဒီးရၢၢ်ခၢၣ်ကီၢ်စဲၣ်လၢ တၢ်ဒုးဆူၣ်တၢ်လီၢ်တဖၣ်အပူၤ ပျဲလီၤ၀ဲသုးတၢ်သိၣ်လိဖိအိၣ်၀ဲအဂ့ၢ်န့ၣ် BACS ပၥ်ဖျါဃၣ်၀ဲဃုၥ်ဒီးတၢ်မၤနီၣ်မၤဃါလၢလၢပှဲၤပှဲၤန့ၣ်လီၤ.

ကတီၢ်ခဲအံၤ ပှၤလၢအထီၣ်သုးတၢ်သိၣ်ဖိ၀ံၤ အိၣ်ထီၣ်၀ဲ(၁၃,၀၀၀)ဘျဲၣ်၀ံၤ သုးတၢ်သိၣ်လိဖိလၢသံတ့ၢ်လၢ တၢ်ဒုးတဖၣ်အပူၤစ့ၢ်ကီးအိၣ်၀ဲအဂ့ၢ် စံး၀ဲန့ၣ်လီၤ.

စကဲကီၢ်ခီ,ကလ့ကီၢ်ဆၣ်အပူၤ စးထီၣ်လၢ လါစဲးပထ့ဘၢၣ်လီၢ်ခံကတၢၢ်တနွံတုၤလါအီးကထိဘၢၣ်(၂)နွံတနွံ သၢနွံအတီၢ်ပူၤ လီၢ်က၀ီၤပှၤသးစၢ်(၂၀)ဘျဲၣ် သုးကီၣ်ကးထၢန့ၢ်ဆူၣ်၀ဲ သုးတၢ်သိၣ်ဖိအသိးအဂ့ၢ် စံး၀ဲန့ၣ်လီၤ.

မကွ့ကီၢ်ခီ, ယ့ၣ်နၣ်ခၠီကီၢ်ဆၣ်အပူၤစ့ၢ်ကီး စးထီၣ်လၢလါအီးကထိဘၢၣ်န့ၣ် သုးကီၣ်ကးစးထီၣ်ထၢန့ၢ်ဆူၣ် သုးတၢ်သိၣ်လိဖိလၢ သုးတၢ်သိၣ်လိနီၣ်ဂံၢ်(၆)အဂီၢ်၀ံၤ ခဲအံၤ(၂)နွံအတီၢ်ပူၤ လီၢ်က၀ီၤပှၤသးစၢ်(၄၀)ဘျဲၣ် ဘၣ်တၢ်ထၢန့ၢ်ဆူၣ်အီၤအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.

ဒ်န့ၣ်အသိး ပကိကီၢ်ခီ, ပီးခီ,ပါတီၣ်,ပီတလဲၣ်, သဲကိ,ရွ့ၣ်တီၣ်ဒီးပီတဲၣ်ကီၢ်ဆၣ်တဖၣ်အပူၤ တၢ်ကဘၣ်ကဲသုးအဂီၢ် လါစဲးပထ့ဘၢၣ်ဒီးလါအီးကထိဘၢၣ်(၂)လါအတီၢ်ပူၤ ထၢန့ၢ်ဆူၣ်၀ဲပှၤနီၣ်ဂံၢ်(၃၀၀)ဃၣ်ဃၣ်လံအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.

လါအီးကထိဘၢၣ်(၁၈)သီအနံၤန့ၣ် သုးကီၣ်ကးကိးဃၣ်၀ဲ သုးတၢ်သိၣ်လိနီၣ်ဂံၢ်(၆)န့ၣ်လီၤ.

Ref: RFA