လါအီးကထိဘၢၣ်(၂)သီ,၂၀၂၄နံၣ်
လါစဲးပထ့ဘၢၣ်(၃၀)သီအနံၤ, ကရ့ၣ်နံၣ်ကီၢ်တၢ်ဘၢၣ်စၢၤပၢပြးကီၣ်ကး(IEC) ဘိးဘၣ်ရၤလီၤလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးကီၣ်ကးပညိၣ်ဒုး၀ဲ တၢ်သိၣ်လိကၠိတဖၣ်အဃိ ကရ့ၣ်နံၣ်ကီၢ်ပူၤ ဘၣ်ဒိဒီးသံ ကၠိဖိမုၣ်/ခွါ(၁၃)ဂၤ ဒီး တၢ်ကူၣ်ဘၣ်ကူၣ်သ့ပှၤမၤတၢ်ဖိ(၅)ဂၤန့ၣ်လီၤ.
IEC အတၢ်ကူၣ်ဘၣ်ကူၣ်သ့၀ဲၤကျိၤ အလံၥ်ပၥ်ဖျါအပူၤ ပၥ်ဖျါဃၣ်၀ဲလၢ ခီဖျိသုးကီၣ်ကး ခးလီၤကျိဖးဒိၣ်ဒီးဟဲခးလီၤတၢ်လၢကလံၤကျါအဃိ ဘၣ်ဒိဒီးသံ၀ဲ ကၠိဖိမုၣ်/ခွါတဖၣ် ဒီးတၢ်ကူၣ်ဘၣ်ကူၣ်သ့ပှၤမၤတၢ်ဖိတဖၣ်န့ၣ်လီၤ. သုးကီၣ်ကးဖီၣ်ဆူၣ် တၢ်ကူၣ်ဘၣ်ကူၣ်သ့ပှၤမၤတၢ်ဖိ(၆)ဂၤလၢ ပၥ်ဃုၥ်လၢ (CDM)တၢ်ဟူးတၢ်ဂဲၤပူၤ ဒီးဒုးလီၤဃၣ်လၢဃိၣ်ပူၤအဂ့ၢ် စံး၀ဲန့ၣ်လီၤ.
သုးကီၣ်ကးလဲၤဒုးတၢ်လၢကလံၤကျါအဃိဘၣ်ဟးဂီၤကွံၥ်၀ဲတၢ်သိၣ်လိကၠိ(၁၂)ဖျၢၣ်တကးဘၣ်ခီဖျိတၢ်ဘံၣ်တၢ်ဘၢအဃိ တၢ်ဟးဂုၤဟးဂီၤအဂၤလၢ တၢ်မၤလီၤတံၢ်အီၤတန့ၢ်တဖၣ်စ့ၢ်ကီးအိၣ်၀ဲအဂ့ၢ် စံး၀ဲန့ၣ်လီၤ. တၢ်ဂ့ၢ်တၢ်ကျိၤလီၤတံၢ်လီၤဆဲးလၢ ဘၣ်ထွဲ တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တခီ IECအလံၥ်ပၥ်ဖျါအပူၤ တပၥ်ဖျါဃၢ်၀ဲဘၣ်.
ဂံၢ်ခီၣ်ထံးတၢ်ကူၣ်ဘၣ်ကူၣ်သ့ပတီၢ် CDMကၠိသရၣ်/မုၣ် (၁,၂၇၆)ဂၤ, ကၠိသရၣ်/မုၣ်လၢ မုၥ်သးမၤကလီၤတၢ် (၃,၀၇၇)ဂၤ, ပတီၢ်ထီတၢ်ကူၣ်ဘၣ်ကူၣ်သ့ဒီး တၢ်ကူၣ်ဘၣ်ကူၣ်သ့ဘၣ်ထွဲတၢ်လုၢ်အီၣ်သးသမူအပူၤ ကၠိသရၣ်/မုၣ် (၈၃)ဂၤ မၤတၢ်လၢ IECတၢ်ကူၣ်ဘၣ်ကူၣ်သ့၀ဲၤကျိၤအပူၤအဂ့ၢ် ပၥ်ဖျါဃၣ်၀ဲန့ၣ်လီၤ.
ကရ့ၣ်နံၣ်ကီၢ်, ကီၢ်ဆၣ်(၆)ဘ့ၣ်အပူၤ တၢ်အိးထီၣ်ဃၣ်၀ဲ တၢ်သိၣ်လိကၠိခဲလၢၥ်(၃၆၁)ဖျၢၣ်၀ံၤ ကၠိဖိမုၣ်/ခွါ ခဲလၢၥ်ဘူးထီၣ်ယဲၢ်ကလးတခီ(၅၄,၉၉၃) ဟဲထီၣ်မၤလိတၢ်အဂ့ၢ် စံး၀ဲန့ၣ်လီၤ.
လါစဲးပထ့ဘၢၣ်(၇)သီအနံၤ, ဟီၣ်ခိၣ်ဒီဘ့ၣ် ဘၣ်ထွဲတၫ်ဒီသဒၢန့ၫ် တၫ်ကူၣ်ဘၣ်ကူၣ်သ့သနၢၣ် တၫ်ပာ်ဖှိၣ်မၤသကိးတၫ်ကရၢ(GCPEA) အလံၥ်ပၥ်ဖျါပူၤတခီ ပၥ်ဖျါဃၣ်၀ဲလၢ ၂၀၂၂နံၣ်အတီၢ်ပူၤ ဟီၣ်ခိၣ်ဒီတဘ့ၣ်, တၢ်ပညိၣ်ဒုးတၢ်ကူၣ်ဘၣ်ကူၣ်သ့သနၢၣ် အအၢကတၢၢ်ထံကီၢ်တဖၣ်အကျါ ကီၢ်ပယီၤပၥ်ဃုၥ်၀ဲန့ၣ်လီၤ.
