လါအီးကထိဘၢၣ်(၂)သီ,၂၀၂၄နံၣ်
ကညီကီၫ်စဲၣ်,၀့ၫ်ရၤမတံကလံၤထံး စွဲၣ်တီၣ်ကိသုးကလၢၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) သုးပာ်ဖှိၣ်တဖၣ် က၀ီၤကးတံာ်ဒုးကဒီး၀ဲ၀ံၤ သုးကီၣ်ကးတကပၤ ဟဲခးစၢၤ၀ဲလၢကလံၤကျါအိၣ်၀ဲအဂ့ၫ် တၫ်မဲာ်ညါဂ့ၫ်ခီၣ်ထံးတၫ်ကစီၣ်စံး၀ဲန့ၣ်လီၤ.
ဖဲလါစဲးပထ့ဘၢၣ်(၃၀)သီနံၤ,ဂီၤအကတီၫ်, ၀့ၫ်ရၤမတံကလံၤထံး,၀့ၫ်သီလ့က့ၣ်ကီာ်အကပၤ သုးကီၣ်ကးအသုးကလၢၤ လၢအိၣ်တ့ၫ်ထဲတဖျၢၣ်လၢအမ့ၫ် စွဲၣ်တီၣ်ကိတၫ်တိာ်ကူၣ်ကျဲၤသုးကလၢၤန့ၣ် KNLAသုးပာ်ဖှိၣ်တဖၣ် က၀ီၤကးတံာ်ဃာ်၀ဲ၀ံၤ ဒုးဃီၤ၀ဲန့ၣ်လီၤ.
တၫ်ဒုးအပူၤ သုးကီၣ်ကးတကပၤ ဟဲခးလီၤတၫ်လၢကလံၤကျါတဖၣ်၀ံၤ လၢကတီၫ်အံၤ တၫ်ကမၤန့ၫ် စွၣ်တီၣ်ကိ တၫ်တိာ်ကူၣ်ကျဲၤသုးကလၢၤအဂီၫ် တၫ်သုးဘူးလီၤသးလၢသုးကလၢၤကအပၤအဂ့ၫ် တၫ်မဲာ်ညါဂ့ၫ်ခီၣ်ထံးတၫ်ကစီၣ် စံး၀ဲန့ၣ်လီၤ.
“သုးကလၢၤဒု ပကထီၣ်ဒုးန့ၫ်လီၤ.ဒုးကန့ၫ်အဂီၫ် မၤဘူးလီၤသးလၢ သုးကလၢၤကပၤလီၤ.နၤခးယၤခးဒီးသုးဘူးလီၤ သးကိးမုၫ်နံၤလီၤ.အရ့ဒိၣ်လၢကတုၤလၢသုးကလၢၤအကပၤလီၤ.မ့ၫ်တုၤသုးကလၢၤကပၤမးဒီးထီၣ်ပၢ၀ဲကန့ၫ်အဂ့ၫ်”စံး၀ဲလီၤ.
ဖဲလါစဲးပထ့ဘၢၣ်(၃၀)သီအနံၤ,ဂီၤအကတီၫ် သုးကီၣ်ကးအစွဲၣ်တီၣ်ကိတၫ်တိာ်ကူၣ်ကျဲၤသုးကလၢၤ ဘၣ်တၫ်လဲၤဒုးအီၤလၢဒြိအဃိ သုးကီၣ်ကးအသုးကလၢၤပူၤ တၫ်ပိၫ်ဖးအကလုၫ်တဖၣ်နၫ်ဟူဘၣ်အဂ့ၫ် တၫ်မဲာ်ညါဂ့ၫ်ခီၣ်ထံး တၫ်ကစီၣ်စံး၀ဲန့ၣ်လီၤ
အပူၤကွံာ် လါမးရှး(၁၂)သီအနံၤစ့ၫ်ကီး စွဲၣ်တီၣ်ကိတၫ်တိာ်ကူၣ်ကျဲၤသုးကလၢၤလၢ သုးကီၣ်ကးအသုးဂံၫ်ဘါအိၣ် (၈၀)ဂၤအံၤ ဒ်သိးမၤပှဲၤဂံၫ်ဘါဒီးကျိချံပှာ်သၣ်တဖၣ် သုတန့ၫ်အဂီၫ် KNLAသုးပာ်ဖှိၣ်တဖၣ် က၀ီၤကးတံာ်ဃာ်၀ဲလီၤ.
စွဲၣ်တီၣ်ကိတၫ်တိာ်ကူၣ်ကျဲၤသုးကလၢၤ တၫ်က၀ီၤကးတံာ်ဃာ်အီၤလၢ တၫ်ဆၢကတီၫ်ယံာ်အပူၤအဃိ တၫ်အီၣ်တၫ်အီ ဒီးကျိချံပှာ်သၣ်တဖၣ် ဘၣ်လဲၤဆှၢန့ၫ်၀ဲလၢကလံၤကျါန့ၣ်လီၤ.ဖဲတၫ်ဒုးကဲထီၣ်တဘျီလၫ်လၫ်န့ၣ် သုးကီၣ်ကးတကပၤ ခးဆၢက့ၤတၫ်လၢကျိဖးဒိၣ်ဒီးကလံၤကျါတဖၣ်အဃိ လီၤတဲာ်၀ဲ ဖဲသ၀ီလၢအိၣ်ဘူးတဖၣ်အပူၤ အိၣ်၀ဲလီၤ.
သုးကီၣ်ကးန့ၣ် ဖဲတၫ်ဒုးကဲထီၣ်တဘျီလၫ်လၫ် ဟဲခးလီၤတၫ်လၢကဘီယူၤအံၤန့ၣ် မ့ၫ်ဒၣ်တနၢၤယုၫ်ဒီးဒွဲၣ်အူအီၣ်ကွံာ် ဘုဖီလၢမ့ၣ်အူ၀ံၤ မၤကမၣ်တၫ်ဘျၢသဲစးတဖၣ်အဂ့ၫ် ပှၤမၤစၢၤပှၤလီၫ်အိၣ်ကမှံတဖၣ်တဲ၀ဲန့ၣ်လီၤ.
သုးကီၣ်ကးကျိဖးဒိၣ်ဒီးကလံၤကျါတၫ်ခးလီၤတၫ်တဖၣ်အဃိ ထံမဲာ်၀ါခံ,ဖလူ,မ့လဲးပၣ်သ၀ီပူၤ သ၀ီဖိတဖၣ်ဒီး ပှၤလီၫ်အိၣ်ကမှံဖိတဖၣ် ဘၣ်ယိၣ်တၫ်၀ံၤ လဲၤဆူတၫ်မၤလီၫ်တဘူၣ်လၢၤဘၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
