လါစဲးပထ့ဘၢၣ်(၂၆)သီ,၂၀၂၄နံၣ်
ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် တၢ်ကစီၣ်ဘိးဘၣ်ရၤလီၤ၀ဲလၢ လါစဲးပထ့ဘၢၣ်(၂၁)သီအနံၤ, သုးကီၣ်ကးအသုးလၢအိၣ်ဆီလီၤအသးဖဲ ကစၢၢ်သၢဖျၢၣ်သုးကလၢၤ ခးလီၤကျိဖးဒိၣ်(၂)ဖျၢၣ်ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်, ဒွဲၣ်လိကီၢ်ဆၣ်, ထံသဘျူးထၣ်ကရူၢ်, ထံလီၤသံးထးသ၀ီအပူၤအဃိ ဘၣ်ဟးဂီၤကွံၥ်၀ဲ ကမျၢၢ်အိၣ်ဟံၣ်(၂)ဖျၢၣ်အဂ့ၢ်န့ၣ်လီၤ.
ဒ်န့ၣ်အသိး ဖဲအပူၤကွံၥ်လါစဲးပထ့ဘၢၣ်(၁၅)သီအနံၤ, သုးကီၣ်ကးအသုးလၢအိၣ်ဖဲ ကစၢၢ်သၢဖျၢၣ်သုးကလၢၤပူၤတဖၣ် ခးလီၤစ့ၢ်ကီးကျိဖးဒိၣ်(၄)ဖျၢၣ်ဆူ ကတၢတံးကရူၢ်ဒီးထံသဘျူးထၣ်ကရူၢ်, ထံသဲလ့သ၀ီဒီးထံလီၤသံးထးသ၀ီပူၤအဂ့ၢ် ပၥ်ဖျါဃၣ်၀ဲန့ၣ်လီၤ. ကျိဖးဒိၣ်အဃိ ကမျၢၢ်ဖံးအီၣ်မၤအီၣ်လီၢ်ကျဲ ဖဲးသံးဖဲးခုးအလီၢ်ဒီး ဘုတဖၣ်ဟးဂီၤကွံၥ်၀ဲအဂ့ၢ် စံး၀ဲန့ၣ်လီၤ.
ခ့ၣ်အဲၣ်ယူၣ်-မုၢ်တြီၢ် တၢ်ကစီၣ်ပၥ်ဖျါဃၣ်၀ဲစ့ၢ်ကီးလၢ ခီဖျိလၢသုဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးကရူၢ် ခးလီၤကျိဖးဒိၣ်ဒီးကလံၤကျါတၢ်ဒုးတဖၣ်အဃိ ကဲထီၣ်၀ဲတၢ်ပျံၤတၢ်ဖုးဒီးတၢ်ကီတၢ်ကဲလၢကမျၢၢ်တဖၣ် ကလဲၤက့ၤဖံးမၤအီၣ်အီဘၣ်၀ဲအဂ့ၢ် ကမျၢၢ်လၢအအိၣ်ဘူးဒီးတၢ်ကဲထီၣ်သးတၢ်လီၢ်တဖၣ် ပၥ်ဖျါထီၣ်၀ဲအဂ့ၢ်န့ၣ်လီၤ.
