လါစဲးပထ့ဘၢၣ်(၂၅)သီ,၂၀၂၄နံၣ်
လါစဲးပထ့ဘၢၣ်(၂၃)သီအနံၤ, ရဲၣ်တၣ်တၢ်ကစီၣ်သန့ပၥ်ဖျါဃၣ်၀ဲလၢ ကီၢ်အ့ဒ့ယါကွဲမုၥ်ဃၣ်၀ဲ ကရၢလၢထီဒါသုးကီၣ်ကးတဖၣ် ဆူတၢ်ထံၣ်လိၥ်တၢၣ်ပီၣ်အမူးတၢ်ရဲၣ်တၢ်ကျဲၤလၢ တၢ်ကမၤအီၤဖဲ ၀့ၢ်နယူဒ့ၣ်လံၣ်န့ၣ်လီၤ.
ဒိးသန့ၤပၥ်ဖျါထီၣ်၀ဲ ဂံၢ်ခီၣ်ထံးတၢ်ကစီၣ်သန့တဖၣ်၀ံၤ တၢ်အံၤမ့ၢ် အ့ရှၢမုၢ်ထီၣ်ကလံၤထံးထံကီၢ်အဂံၢ်ဆူၣ်တဘ့ၣ် အတၢ်ဆီတလဲတခါအဂ့ၢ် စံး၀ဲန့ၣ်လီၤ.
ကီၢ်ပယီၤပူၤ စးထီၣ်လၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ခီဖျိလၢထံလီၢ်ကီၢ်ပူၤတၢ်ဒုးတၢ်ယၤတဖၣ်အဃိ အ့ဒံယါ-ပယီၤကီၢ်ဆၢဟီၣ်က၀ီၤပူၤ တအိၣ်ဂၢၢ်ဆိးကျၢၢ်လၢၤဘၣ်. ကီၢ်ဆၢဟီၣ်က၀ီၤအပူၤ တၢ်တိၥ်ကျဲၤအရ့ဒိၣ်တနီၤလၢ ကီၢ်အ့ဒံယါအဂီၢ်စ့ၢ်ကီးအိၣ်၀ဲန့ၣ်လီၤ.
ဒီကလုၥ်ဃူဖိးပဒိၣ်(NUG), ခၠီ,ရၢၢ်ခၢၣ်ဒီး ကခၠ့ၣ်ကီၢ်စဲၣ်တဖၣ်အပူၤ ကလုၥ်ဒူၣ်ပှၤဖီၣ်စုက၀ဲၤလၢ အထီဒါသုးကီၣ်ကးတဖၣ် တၢ်ကလဲၤထီၣ်ဘၣ် တၢ်ထံၣ်လိၥ်တၢၣ်ပီၣ်အမူးတၢ်ရဲၣ်တၢ်ကျဲၤလၢ တၢ်ကမၤအီၤဖဲ လါနိၣ်၀့ဘၢၣ်အတီၢ်ပူၤအဂီၢ်အဂ့ၢ် ကလုၥ်ဒူၣ်ပှၤဖီၣ်စုက၀ဲၤ ခိၣ်နၢ်တဂၤဒီး ဂံၢ်ခီၣ်ထံးတၢ်ကစီၣ်(၂)ခါ တဲလီၤ၀ဲအဂ့ၢ် ပၥ်ဖျါဃၣ်၀ဲလၢ တၢ်ကစီၣ်အပူၤန့ၣ်လီၤ.
အ့ဒ့ယါ ဟီၣ်ခိၣ်ဒီဘ့ၣ်ဂ့ၢ်၀ီကီၣ်ကး (ICWA) ကရဲၣ်ကျဲၤမၤ၀ဲ တၢ်ထံၣ်လိၥ်တၢၣ်ပီၣ်အမူးတၢ်ရဲၣ်တၢ်ကျဲၤလၢ ပဒိၣ်စ့ပၥ်ကီၤ၀ံၤ လၢကီၣ်ကးအပူၤ ထံဂုၤကီၢ်ဂၤကိတိၥ် S. Jaishankar စ့ၢ်ကီး ကပၥ်ဃုၥ်၀ဲန့ၣ်လီၤ.
တၢ်ကဟဲထီၣ်ဘၣ်တၢ်ထံၣ်လိၥ်တၢၣ်ပီၣ်အမူးတၢ်ရဲၣ်တၢ်ကျဲၤအဂီၢ် တၢ်တသ့ၣ်ညါဘၣ်ဒံးလၢ တၢ်ကွဲမုၥ် သုးကီၣ်ကးအဂ့ၢ် ဒီး ကတၢၣ်ပီၣ်တဲသကိး၀ဲဘၣ်ထွဲဒီး တၢ်သူၣ်ထီၣ်တၢ်ဘျၢသဲစးခိၣ်သ့ၣ်သနူဒီး ဖဲဒရၢၣ်သနူအဂ့ၢ် ပၥ်ဖျါဃၣ်၀ဲလၢ တၢ်ကစီၣ်အပူၤန့ၣ်လီၤ.
Ref: RFA
