လါစဲးပထ့ဘၢၣ်(၂၅)သီ,၂၀၂၄နံၣ်
အမဲရကၤထံဂုၤကီၢ်ဂၤတၢ်ဂုၥ်ထီၣ်ပသီထီၣ်အ့ၣ်ကၠ့ၣ်စံၣ်(USAID) ပဲၥ်အၢပဲၥ်သီထီဒါ၀ဲ သုးကီၣ်ကးပညိၣ်ဒုးတၢ်သိၣ်လိကၠိတဖၣ်လၢ ကီၢ်ပယီၤပူၤအဖီခိၣ်၀ံၤ ဃ့ထီၣ်၀ဲလၢ တၢ်ကပတုၥ်ကွံၥ် တၢ်ဒုးတၢ်သိၣ်လိကၠိတဖၣ် တဘျီဃီလၢ လီၤဆီဒၣ်တၢ် ကၠိဖိမုၣ်/ခွါ, ကၠိသရၣ်/မုၣ်တဖၣ်အတၢ်ဘံၣ်တၢ်ဘၢအဂီၢ်အဂ့ၢ်န့ၣ်လီၤ.
လါစဲးပထ့ဘၢၣ်(၁၈)သီအနံၤ, USAID ပှၤကတိၤတၢ်ပၢ ဘဲးကၠးမ့ၣ်ဆူၣ်ရၣ်တိၣ်တဲလီၤ၀ဲလၢ ဖဲအပူၤကွံၥ်(၂)နံၣ်အတီၢ်ပူၤ ကီၢ်ပယီၤပူၤ တၢ်ပညိၣ်ဒုးတၢ်သိၣ်လိကၠိခဲလၢၥ်ပၥ်ဖှိၣ်(၁၇၄)ဖျၢၣ်ပၥ်ဃုၥ် တၢ်ပညိၣ်ဒုးကီၢ်ပယီၤပူၤ လီၢ်က၀ီၤကမျၢၢ်အိၣ်ဆိးလီၢ်ကျဲတဖၣ်အဃိ လီၢ်က၀ီၤကမျၢၢ်တဖၣ်ဘၣ်သံ၀ဲ၀ံၤ ဖိသၣ်ဆံးဒီးပှၤသးစၢ်တဖၣ် တမၤလိဘၣ် တၢ်ကူၣ်ဘၣ်ကူၣ်သ့လၢတၢ်ဘံၣ်တၢ်ဘၢအပူၤဘၣ်အဃိ ထီဒါ၀ဲအဂ့ၢ် န့ၣ်လီၤ.
တၢ်မၤန့ၢ်ဃၣ် လံၥ်ပၥ်ဖျါလၢ ဘၣ်ထွဲဒီးသုးကီၣ်ကးလဲၤဒုးတၢ်သိၣ်လိကၠိတဖၣ်လၢ ကလံၤကျါဖဲယိၤဒိၣ်ကီၢ်စဲၣ်ဒီးကရ့ၣ်နံၣ်ကီၢ်စဲၣ်အပူၤ၀ံၤ လၢတၢ်လဲၤဒုးတၢ်သိၣ်လိကၠိတဖၣ်အပူၤ ဖိသၣ်လၢသးနံၣ်အိၣ်(၉)နံၣ်ဒီး (၁၆)နံၣ်အဘၢၣ်စၢၤတဖၣ် တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးအိၣ်၀ဲအဂ့ၢ် စံး၀ဲန့ၣ်လီၤ.
ဒ်သိး တၢ်ပညိၣ်ဒုးတၢ်သိၣ်လိကၠိတဖၣ်န့ၣ် မ့ၢ်ဒၣ်တၢ်မၤပျံၤမၤဖုး ကီၢ်ပူၤတၢ်ကူၣ်ဘၣ်ကူၣ်သ့သိၣ်မှံကရၢတဖၣ်, ထံဂုၤကီၢ်ဂၤတၢ်ကရၢကရိတဖၣ်ဒီး ကီၢ်ပယီၤပူၤဖိသၣ်ဆံးဒီးပှၤသးစၢ် (၃၀၀,၀၀၀)ဘျဲၣ်လၢ အတူၢ်ဘၣ်တၢ်ဒုးတၢ်ယၤတၢ်ဘၣ်ဂံၥ်ဂူၥ် တၢ်သိၣ်လိကၠိတၢ်လီၢ်တဖၣ်ဒီး တၢ်ကူၣ်ဘၣ်ကူၣ်သ့တၢ်ဖံးတၢ်မၤတဖၣ်အဂ့ၢ်န့ၣ်လီၤ.
(USAID)ပဲၥ်အၢပဲၥ်သီထီဒါ၀ဲ သုးကီၣ်ကးအတၢ်မၤပျီၢ်မၤဂီၤ တၢ်ဟူးတၢ်ဂဲၤတဖၣ်ဆူၣ်ဆူၣ်ကိၢ်ကိၢ် ဒ်အမ့ၢ် တၢ်ပညိၣ်ဒုးတၢ်သိၣ်လိကၠိဒီးကမျၢၢ်အိၣ်ဆိးလီၢ်ကျဲတၢ်လီၢ်တဖၣ်န့ၣ် မ့ၢ်တၢ်မၤဘၣ်ဒိကၠိဖိတဖၣ်, သရၣ်/မုၣ်တဖၣ်ဒီး ပှၤကညီပှၤတ၀ၢတဖၣ် နီၢ်ခိဒီးနီၢ်သးတကးဘၣ် တၢ်မၤတံၥ်တၥ်စ့ၢ်ကီး တၢ်ဖံးလိမၤလိယံၤယံၤထၢထၢ၀ံၤ ကမျၢၢ်အကထိအကလးတဖၣ် ဘၣ်သုးလီၢ်သုးကျဲ, တၢ်ဟူးတၢ်ဂဲၤလၢ တၢ်မၤဘၣ်ဒိကမျၢၢ်တဖၣ်အဖီခိၣ်န့ၣ်လီၤ.
