လါစဲးပထ့ဘၢၣ်(၂၅)သီ,၂၀၂၄နံၣ်
ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် တၢ်ကစီၣ်ပၥ်ဖျါဃၣ်၀ဲလၢ ဖဲလါစဲးပထ့ဘၢၣ်(၁၉)သီအနံၤ, ဟါ(၃)နၣ်ရံၣ်အဆၢကတီၫ် သုးကီၣ်ကးအသုး ခီၣ်ချ့သုးရ့ၣ်(ခလရ-၅၇)သုး ခးလီၤ(၈၁)မမကျိဖးဒိၣ်(၁)ဖျၢၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်,ကီၫ်ဆၣ်ဆီထံးအပူၤအဃိ လီၤတဲာ်ပိၫ်ဖး၀ဲ ဖဲစၣ်ဖဲသ၀ီ(စံဖဲကျေးရွာ)ပူၤ၀ံၤ ဘၣ်ဒိ၀ဲ သီခါ(၂)ဂၤအဂ့ၢ်န့ၣ်လီၤ.
သၣ်ဆ့းသုးကလၢၤပူၤ သုးကီၣ်ကးအသုးကျိၤပာ်ဖှိၣ်တဖၣ်န့ၣ် က့ၤမူၤဖီၣ်၀ဲ သၣ်ဆ့းကၠီကိသ၀ီဖိ (သံဆိပ်ကျောင်းကုန်း ရွာသူရွာသား)ဒီးကၠီးတါသ၀ီဖိတဖၣ်(ကျောက်တန်းရွာ ရွာသူသားများ)၀ံၤ သူ၀ဲဒ်ပှၤကညီတၫ်ဒီသဒၢအသိးန့ၣ်လီၤ.
အပူၤကွံၥ် လါစဲးပထ့ဘၢၣ်(၂၀)သီအနံၤ,မုၫ်ထူၣ်(၁၂)နၣ်ရံၣ်ဃၣ်ဃၣ် အဆၢကတီၫ်စ့ၫ်ကီး သုးကီၣ်ကးအသုး ခးသံ၀ဲ ပၠံၣ်ယ့ၣ်သ၀ီဖိ ကိၣ်ယဲမၠံးအီၣ် လၢသးနံၣ်အိၣ် (၃၆)နံၣ်တဂၤအဂ့ၢ် ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲၥ်ညါ ဖဲလါစဲးပထ့ဘၢၣ်(၂၂)သီအနံၤ ဂီၤ(၁၀း၃၀)နၣ်ရံၣ်အကတီၫ် သုးကီၣ်ကးအသုးအစုတီၤဖီလာ် ကၠီးတကါပၢၤကီၫ်သုးတဖၣ် ဖီၣ်ဃ့န့ၫ်ဆူၣ်၀ဲ ဖၠၣ်တလ့သ၀ီဖိ(၂)ဂၤဃုာ်ဒီးစ့ပယီၤ (၇၅၀,၀၀၀)ကၠးဒီး ဘီဒံးကွ့သ၀ီဖိ(၂)ဂၤဃုာ်ဒီးစ့ပယီၤ(၂၅၀,၀၀၀)ကၠးတဖၣ် ဖဲတီရကၠီ၀ံၤ ပျၫ်ကွံာ်၀ဲအဂ့ၢ် စံး၀ဲန့ၣ်လီၤ.
