လါစဲးပထ့ဘၢၣ်(၂၄)သီ,၂၀၂၄နံၣ်
လါစဲးပထ့ဘၢၣ်(၂၃)သီအနံၤ, မုၢ်ထူၣ်အဆၢကတီၢ် ကၠီၣ်တဲၣ်ထံဖိကီၢ်ဖိတဖၣ် ကိးသတြီၤထီၣ်လၢ ပှၤကီၢ်ပယီၤဖိလၢ ဟဲတုၤအိၣ်ဆူကၠီၣ်တဲၣ်ပူၤတဖၣ် ကဟးထီၣ်ကွံၥ်အဂီၢ် လဲၤပၥ်ဖျါထီၣ်တၢ်ပၥ်သး ဖဲကီၢ်ကၠီၣ်တဲၣ်, ၀့ၢ်ဘီကိၥ်, ကီၢ်ပယီၤမီၢ်သီ၀ဲၤဒၢးအမဲၥ်ညါန့ၣ်လီၤ.
ကမျၢၢ်တၢ်ကရၢကရိလၢ ပၥ်ဃုၥ်လၢတၢ်ပၥ်ဖျါထီၣ်တၢ်ပၥ်သးအပူၤတဖၣ်အံၤ မ့ၢ်တၢ်ကရၢကရိတဖၣ်လၢ ဃ့ထီၣ်၀ဲလၢကီၢ်ပယီၤပှၤမၤတၢ်ဖိတဖၣ်တၢ်ကဟ့ၣ်ဘၣ်ဒၣ်ထဲတၢ်မၤပျဲအသီ(၉၀)ဒီးမိၢ်ဒၢပှၤမၤတၢ်ဖိတဖၣ်တၢ်ကဟ့ၣ်တၢ်မၤပျဲ၀ံၤ ကက့ၤအိၣ်ဖျဲးအဖိဆူနီၢ်ကစၢ်အိၣ်ဆိးလီၢ်ကျဲထံကီၢ်အဂီၢ်ပၥ်ဃုၥ်တၢ်ဂ့ၢ်(၈)ထံၣ်ဆူ ကၠီၣ်တဲၣ်ထံဂုၤကီၢ်ဂၤကိတိၥ်၀ဲကျိၤအအိၣ်န့ၣ်လီၤ.
လါစဲးပထ့ဘၢၣ်(၂၃)သီအနံၤ, မုၢ်ထူၣ်အဆၢကတီၢ် တၢ်ကရၢကရိတဖၣ် ဟဲတုၤဆူကီၢ်ပယီၤမီၢ်သီ၀ဲၤဒၢးအမဲၥ်ညါ၀ံၤ ကိးသတြီၤထီၣ်၀ဲလၢ “ပှၤကီၢ်ပယီၤဖိတဖၣ် က့ၤဆူနီၢ်ကစၢ်ထံကီၢ်ဟံၣ်ဃီ”အဂ့ၢ် ပၥ်ဖျါထီၣ်တၢ်ပၥ်သးန့ၣ်လီၤ. ကၠီၣ်တဲၣ်ထံဖိကီၢ်ဖိ(၂၀)ဂၤဘျဲၣ် ပၥ်ဖျါထီၣ်တၢ်ပၥ်သး ဖဲကီၢ်ပယီၤမီၢ်သီ၀ဲၤဒၢးမဲၥ်ညါအဂ့ၢ် တၢ်သ့ၣ်ညါဘၣ်လၢ ပှၤလၢထံၣ်န့ၢ်၀ဲတဖၣ်အအိၣ်န့ၣ်လီၤ.
ကၠီၣ်တဲၣ်ထံဖိကီၢ်ဖိအါအါဂီၢ်ဂီၢ်လၢ တတူၢ်လိၥ်၀ဲ တၢ်ဟူးတၢ်ဂဲၤဒ်သိးတဖၣ်အိၣ်၀ဲအသိး တၢ်ဟူးတၢ်ဂဲၤတဖၣ်အံၤအလီၢ်ခံ တၢ်ဂ့ၢ်လၢအဘျးစဲလိၥ်သးဒီးထံရူၢ်ကီၢ်သဲးတဖၣ်အိၣ်၀ဲအဂ့ၢ် တၢ်ပဲၥ်ထံနီၤဖးတဖၣ်စ့ၢ်ကီးအိၣ်၀ဲန့ၣ်လီၤ. စှၤသီအတီၢ်ပူၤ, ကီၢ်ကၠီၣ်တဲၣ်ပူၤ တၢ်မၤဃံးထီၣ်တၢ်သိၣ်တၢ်သီလၢ ဘၣ်ထွဲဒီးပှၤကီၢ်ပယီၤဖိဂ့ၢ်၀ီတဖၣ်စ့ၢ်ကီး အိၣ်ထီၣ်၀ဲန့ၣ်လီၤ.
ကၠီၣ်တဲၣ်တၢ်ကရၢကရိတနီၤ အတၢ်ပဲၥ်အၢပဲၥ်သီဟဲအါထီၣ်လၢကီၢ်ပယီၤပှၤမၤတၢ်ဖိလၢဟဲမၤတၢ်ဖဲကၠီၣ်တဲၣ်ထံကီၢ်ပူၤတဖၣ်အဖီခိၣ်၀ံၤ တၢ်ထီဒါတဖၣ်စ့ၢ်ကီးဟဲအိၣ်ထီၣ်အသိးပှၤကီၢ်ပယီၤဖိတဖၣ် ကအိၣ်လၢတၢ်ပလီၢ်သူၣ်ပဒီပူၤအဂ့ၢ် ပယီၤတၢ်ကရၢကရိတဖၣ်စ့ၢ်ကီး ဟ့ၣ်ဆီၣ်တခူထီၣ်ဃၣ်၀ဲန့ၣ်လီၤ.
ကီၢ်ပယီၤပူၤ ခီဖျိလၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီး သုးကီၣ်ကးထၢန့ၢ်ဆူၣ်သုးတဖၣ်အဃိ ပှၤကီၢ်ပယီၤအါအါဂီၢ်ဂီၢ် ဟဲနုၥ်လီၤအိၣ်ဆိး၀ဲဒၣ်လၢ ကီၢ်ကၠီၣ်တဲၣ်ပူၤကျဲအကလုၥ်အကလုၥ်န့ၣ်လီၤ.
Ref: Dawei Watch
