ရၢၢ်ခၢၣ်ပှၤဃ့ၫ်သုးပှၤလီၫ်အိၣ်ကမှံဒဲက၀ီၤပူၤ ဘ့ၣ်ခိၣ်တၫ်ဆါအါတက့ၫ် မ့ၫ်တၫ်သးဃ့တၫ်ဆါ၀ံၤ တၫ်ဘၣ်ကူစါညါဘျါဒ်တၫ်မၤသ့မၤန့ၫ်အသိး

လါစဲးပထ့ဘၢၣ်(၂၄)သီ,၂၀၂၄နံၣ်

ရၢၢ်ခၢၣ်ကီၣ်စဲၣ် ကလံၤစိးတကပၤ၀့ၫ်တဖၣ်လၢအမ့ၫ် ကီၫ်ဆၣ်ပိၣ်နါကၠိ, ကီၫ်ဆၣ်စံးတွ့ၣ်ဒီးကီၫ်ဆၣ်မ့ပၠါအပူၤ ပှၤဃ့ၫ်သုးပှၤလီၫ်အိၣ်ကမှံတဖၣ် လၢဘ့ၣ်ခိၣ်တၫ်ဆါ တၫ်ဘၣ်ကူဘၣ်ဂာ်အီၤတဖၣ်န့ၣ် အါတက့ၫ်မ့ၫ်တၫ်သးဃ့တၫ်ဆါအဂ့ၫ် တၫ်သ့ၣ်ညါဘၣ်လၢ ဆူၣ်ချ့၀ဲၤကျိၤအိၣ်န့ၣ်လီၤ.

ပှၤလီၫ်အိၣ်ကမှံဖိတဖၣ် ဖဲအပူၤကွံာ်လါယူၤအပူၤ တူၫ်ဘၣ်ဘ့ၣ်ခိၣ်တၫ်ဆါ တၫ်ဘၣ်ကူဘၣ်ဂာ်၀ံၤ ပှၤလၢဘ့ၣ်ခိၣ် တၫ်ဆါဘၣ်ကူဘၣ်ဂာ် အဂၤ(၅၀၀)အကျါ သးနံၣ် (၁၀)နံၣ်အဖီလာ်ဖိသၣ်ပာ်ဃုာ်(၁၀၀)ဂၤဒီးလိၣ်ဘၣ် ကသံၣ်ကသီတၫ်မၤစၢၤတဖၣ်အဂ့ၫ် လီၫ်က၀ီၤတၫ်ကစီၣ်သန့တဖၣ် ပာ်ဖျါ၀ဲ၀ံၤအလီၫ်ခံ ဆူၣ်ချ့၀ဲၤကျိၤတကပၤ ဒ်မၤသ့မၤန့ၫ်အသိး လဲၤဆူပှၤဃ့ၫ်သုးပှၤလီၫ်အိၣ်ကမှံဒဲက၀ီၤ ကူစါသမံသမိး၀ဲအကတီၫ် ခီဖျိတၫ်သးဃ့တၫ်ဆါတဆီ တလီၤမၫ်လၢၤဘၣ်ဒီး ကဲထီၣ်ဘ့ၣ်ခိၣ်တၫ်ဆါလၢအဃာ်နုာ်လီၤအဂ့ၫ် တဲ၀ဲလီၤ.

“ဖဲလါစဲးပထ့ဘၢၣ်(၂၁)သီနံၤ ရၢၢ်ခၢၣ်ကီၫ်စဲၣ်  ကမျၢၫ်ဆူၣ်ချ့,တၫ်ကူဆါယါဘျါ ၀ဲၤကျိၤခိၣ်န့ၣ် လဲၤဆူ၀့ၫ်စံးတွ့ၣ်, ယွၣ်ကၠံမၠီးက၀ီၤဒ့, သီဘံးတၣ်ယၣ်မးသီခါဖၠၣ် လၢပှၤလီၫ်အိၣ် ကမှံဖိအိၣ်ကဒုဒဲက၀ီၤ ဃုာ်ဒီးကသံၣ်ကရၣ်လၢကူစါယါဘျါဘ့ၣ်ခိၣ်တၫ်ဆါ, ကသံၣ်သရၣ်မုၣ်လၢဒုးအိၣ်ဖျဲၣ်မိၫ်ဒၢ, ကီၫ်ရ့ၣ်စံးတွ့ၣ်ဒီးကီၫ်ဆၣ် ပၢပြးဘၣ်မူဘၣ်ဒါတဖၣ်ဒီး လဲၤသမံသမိး၀ဲလီၤ.ဖဲသီဘံးတၣ်ယၣ်မးသီခါဖၠၣ်အပူၤ ပှၤဃ့ၫ်သုးဟံၣ်ဒူၣ်အိၣ်(၁၉)ဒူၣ်,ပှၤနီၫ်ဂံၫ်အိၣ်အဂၤ(၇၀)၀ံၤ တၫ်သမံသမိးအဖီခိၣ် တၫ်မၤကွၫ် ပှၤလၢတူၫ်ဘၣ်ဘ့ၣ်ခိၣ်တၫ်ဆါ အဂၤ(၄၀)အကျါ ပှၤ(၃၀)ဂၤ မ့ၫ်တၫ်သးဃ့တၫ်ဆါ, ပစိၤအ့ၣ်ဘ့ၣ်ခိၣ်သး(၄)ဂၤ, ဘ့ၣ်ခိၣ်ကုၤဖှီးတၫ်ဆါ(Fungal Infection),(၃)ဂၤ,ဒီးဘ့ၣ်ခိၣ်သး(၃)ဂၤ ကူစါယါဘျါ၀ဲအဂ့ၫ် ဆူၣ်ချ့၀ဲၤကျိၤပှၤဘၣ်မူဘၣ်ဒါတဖၣ်တဲ၀ဲလီၤ.

လၢကတီၫ်အံၤ  ရၢၢ်ခၢၣ်ကီၫ်စဲၣ်ပူၤ ထဲဒၣ်၀့ၫ်စံးတွ့ၣ်ဒီးကီၫ်ဆၣ်လၢအိၣ်တ့ၫ်တဖၣ်အပူၤ ဆူၣ်ချ့၀ဲၤကျိၤအတၫ်ဆါဟံၣ် ,တၫ်ဟ့ၣ်ကသံၣ်ဒၢးတဖၣ် အိးထီၣ်၀ဲတန့ၫ်ဒံးဘၣ်အဃိ ဘၣ်ထွဲဒီးကီၫ်ပူၤတၫ်ကစီၣ်မံၣ်ဒံၣ်ယၣ်တဖၣ် အတၫ်ပာ်ဖျါ၀ဲ ပှၤဘၣ်ကူဘၣ်ဂာ်ဘ့ၣ်ခိၣ်တၫ်ဆါ အနီၫ်ဂံၫ်နီၫ်ဒွးအိၣ်အါတၫ်ကစီၣ်တဖၣ် ဟးထီၣ်အဖီခိၣ်  ဆူၣ်ချ့၀ဲၤကျိၤတကပၤ ပာ်ဂၢၫ်ပာ်ကျၢၫ်၀ဲတန့ၫ်ဒံးဘၣ်အသိး,လၢကတီၫ်အံၤ တၫ်ကူစါယါတဖၣ်စ့ၫ်ကီး ဒ်မၤသ့မၤန့ၫ်အသိး ကူစါယါဘျါန့ၫ်၀ဲအဂ့ၫ် ဆူၣ်ချ့၀ဲၤကျိၤဟ့ၣ်ဒုးသ့ၣ်ညါ၀ဲလီၤ.

တၫ်သးဃ့တၫ်ဆါန့ၣ် ဘၣ်ကူဘၣ်ဂာ်ဆူတဂၤဒီးတဂၤအဃိ တၫ်ဆါကဘျါအဂီၫ် ပှၤဘၣ်တၫ်ဆါခဲလၢာ်  ကြၢးလၢတၫ်ကူစါယါဘျါအီၤ တကတီၫ်ဃီ၀ံၤ ဟံၣ်ဒူၣ်အပူၤ ဟံၣ်ဖိဃီဖိလၢတၫ်ဘၣ်ကူဘၣ်ဂာ်အိၣ်န့ၣ် ဘၣ်ကူဘၣ်ဂာ်ကဒီးသ့၀ဲအဂ့ၫ်န့ၣ်လီၤ.

လၢကတီၫ်အံၤ ရၢၢ်ခၢၣ်ကီၫ်စဲၣ်ကလံၤစိးတကပၤ ပှၤဃ့ၫ်သုးပှၤလီၫ်အိၣ်ကမှံဒဲက၀ီၤအပူၤ ဘ့ၣ်ခိၣ်တၫ်ဆါ တၫ်ဘၣ်ကူဘၣ်ဂာ်အနီၫ်ဂံၫ်နီၫ်ဒွးအါမး ဘၣ်ကူဘၣ်ဂာ်အဖၢမုၫ်၀ံၤ ပှၤနီၫ်ဂံၫ်အါတလၢ,တဒိးန့ၫ်တၫ်ကူစါယါဘျါ ဒီးတဒိးန့ၫ် ထံအီလၢတကဆှီတဖၣ်အဃိ ဘ့ၣ်ခိၣ်တၫ်ဆါလၢ ကဲထီၣ်တ့ၫ်အသးလၢ မူခိၣ်စူၤလီၤသီလံၤလံၤအံၤ တကိညၣ်ထီၣ်ဘၣ်အ မဲာ်ညါ ဘၣ်ကူဘၣ်ဂာ်အါထီၣ်တၫ်အဂ့ၫ် တၫ်သ့ၣ်ညါဘၣ်လၢပှၤမၤစၢၤပှၤလီၫ်အိၣ်ကမှံဖိတဖၣ်အိၣ်န့ၣ်လီၤ.

Ref: VOM