လါစဲးပထ့ဘၢၣ်(၂၄)သီ,၂၀၂၄နံၣ်
သုးကီၣ်အကးအသုးအဂံၢ်အဘါအိၣ်(၃၀၀)ဃၣ်ဃၣ်အံၤ ဟဲနုၥ်လီၤသုးကျိၤ ဖဲ ၀့ၢ်တကူၣ်-ဒ၀ဲၢ်ကျဲမုၢ်ဖးဒိၣ်, ဒ၀ဲၢ်ကီၢ်ဆၣ်, မီၣ်မဲၣ်ရှီၣ်သ၀ီပူၤ၀ံၤ ဒွဲၣ်အူမၤဟးဂီၤကွံၥ်ကဒီး ကမျၢၢ်အိၣ်ဟံၣ်ဃီတဖၣ်အဂ့ၢ် လီၢ်က၀ီၤကမျၢၢ်တဖၣ်တဲ၀ဲန့ၣ်လီၤ.
မဟါအနံၤ,မုၢ်ဃ့ၢ်လီၤအဆၢကတီၢ် ခံခီခံကပၤတၢ်ဘၣ်သဂၢၢ်ခးလိၥ်သးအိၣ်ထီၣ် ဖဲမီၣ်မဲၢ်ရှီၣ်သ၀ီပူၤ၀ံၤအလီၢ်ခံ သုးကီၣ်ကးအသုးအဂံၢ်အဘါအိၣ်(၂၀၀)ဃၣ်ဃၣ် ဟဲနုၥ်လီၤမီၣ်မဲၢ်ရှီၣ်သ၀ီပူၤလၢ ဟီၣ်ခိၣ်တီၣ်သိလ့ၣ်(၄)ခိၣ်, ဒီးဘံၣ်ကိသိလ့ၣ်(၁၀)ခိၣ်ဘျဲၣ်အဂ့ၢ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤ.
လါစဲးပထ့ဘၢၣ်(၂၃)သီအနံၤ, သုးကီၣ်ကးအသုး အမတ(၃၀၂)ကျိဖးဒိၣ်သုးရ့ၣ်လၢ အိၣ်ဆီလီၤအသးဖဲ စဟၣ်သ၀ီပူၤစ့ၢ်ကီး ဟဲနုၥ်လီၤသုးကျိၤလၢမီၣ်မဲၢ်ရှီၣ်သ၀ီပူၤအဂ့ၢ်တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤ လၢမီၣ်မဲၣ်ရှီၣ်သ၀ီပူၤ သုးကီၣ်ကးအသုးအဂံၢ်အဘါအိၣ်၀ဲ (၃၀၀)ဃၣ်ဃၣ်လံန့ၣ်လီၤ. သုးကီၣ်ကးအသုးတဖၣ်လၢ ဟဲနုၥ်လီၤသုးကျိၤဖဲ မီၣ်မဲၢ်ရှီၣ်သ၀ီပူၤတဖၣ်အံၤ ဖဲဂီၤ(၈)နၣ်ရံၣ်အဆၢကတီၢ် ဒွဲၣ်အူမၤဟးဂီၤကွံၥ်ကဒီး ကမျၢၢ်အိၣ်ဟံၣ်ဃီတဖၣ်န့ၣ်လီၤ.
“သုးဖိတဖၣ် ကျဲအပှဲၤလီၤ. ခးပိၥ်ကျိတဖၣ်ဒီး လဲၤနုၥ်လီၤ၀ဲန့ၣ်လီၤ. တၢ်နၢ်ဟူဘၣ်လၢ ကျိသီၣ်အဃိ ကွၢ်ဃီၤ၀ဲအဆၢကတီၢ် မ့ၣ်အူလူၢ်သူသူတဖၣ်ထီၣ်လံအဂ့ၢ်” လီၢ်က၀ီၤကမျၢၢ်တဂၤ တဲ၀ဲန့ၣ်လီၤ.
တၢ်ဒုးတအိၣ်ဘၣ်ဒီး သုးကီၣ်ကးအသုးတဖၣ် ခး၀ဲတခီတၢၤလီၤ၀ံၤ ဒွဲၣ်အူမၤဟးဂီၤကွံၥ် ဟံၣ်ဃီတဖၣ်အဂ့ၢ် လီၢ်က၀ီၤကမျၢၢ်တဖၣ် တဲ၀ဲန့ၣ်လီၤ.
“ဒွဲၣ်အူကွံၥ်အီၤ ဒီတကျိၤလီၤ. မူခိၣ်စ့ၢ်ကီးတစူၤဘၣ်အဃိ တၢ်ဘၣ်ဘၣ်ယိၣ်၀ဲအဂ့ၢ်” မီၣ်မဲၢ်ရှီၣ်သ၀ီဖိလၢ ပၥ်တ့ၢ်ကွံၥ်ဟံၣ်ဃီတဂၤ တဲ၀ဲန့ၣ်လီၤ.
ဖဲအပူၤကွံၥ် (၄)သီအတီၢ်ပူၤစ့ၢ်ကီး သုးကီၣ်ကးအသုးလၢအိၣ်ဖဲ မီၣ်မဲၢ်ရှီၣ်သ၀ီပူၤ ဘၣ်တၢ်ဒုးအီၤ၀ံၤအလီၢ်ခံ သုးကီၣ်ကးဒွဲၣ်အူကွံၥ်ကဒီး၀ဲ ကမျၢၢ်ဟံၣ်ဃီလၢအိၣ်ဖဲ သ၀ီကျဲနၢၤအကပၤတဖၣ်န့ၣ်လီၤ. မီၣ်မဲၢ်ရှီၣ်သ၀ီပူၤ ကမျၢၢ်ဟံၣ်ဃီလၢ သုးကီၣ်ကးဒွဲၣ်အူကွံၥ်အီၤ(၂)ဘျီအပူၤ အနီၣ်ဂံၢ်နီၣ်ဒွးတခီ တၢ်တသ့ၣ်ညါဘၣ်ဒံးဘၣ်.
တၢ်ဒုးတဖၣ်ကဲထီၣ်သးခဲအံၤခဲအံၤ လၢသုးကီၣ်ကးအသုးတဖၣ်အိၣ်ဆီလီၤပၥ်သး ဖဲမီၣ်မဲၢ်ရှီၣ်သ၀ီပူၤအဃိ လီၢ်က၀ီၤကမျၢၢ်တဖၣ်ပၥ်တ့ၢ်ဟံၣ်ဃီ ဃ့ၢ်ပူၤဖျဲးသးလၢ ဖဲအပူၤကွံၥ်(၃)လါလံၤလံၤန့ၣ်လီၤ.
Ref: The Tanintharyi Times
