လါစဲးပထ့ဘၢၣ်(၂၃)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, တၫ်ပၢဟီၣ်က၀ီၤလၢအမ့ၫ် ,တီအူကီၫ်ရ့ၣ်ဒီးကီၫ်ရ့ၣ်ချၢၣ်လွံၫ်ထူၣ်တဖၣ်အပူၤ သ၀ီလၢအိၣ်ဖဲပရဲလိာ်ကျိနံၤဒီတကျိၤ ပှၤကမျၢၫ်(၃)ကလီၫ်ဘျဲၣ် တူၫ်ဘၣ်ထံလုၫ်ဘၢတၫ်၀ံၤ လိၣ်ဘၣ် တၫ်မၤစၢၤတဖၣ်အဂ့ၫ် ဖဲလါစဲးပထ့ဘၢၣ်(၂၂)သီနံၤန့ၣ် KNU-လီၢ်ခၢၣ်သး၀ဲၤလီၢ်ခိၣ်သ့ၣ် ဘိးဘၣ်ပၥ်ဖျါ ဘိးဘၣ်ရၤလီၤ၀ဲလီၤ.
လၢ(၅၈)နံၣ်အတီၫ်ပူၤ ကွၫ်ဆၢၣ်မဲာ်ဘၣ် ထံလုၫ်ဘၢတၫ်အနးကတၢၫ်၀ံၤ,တၫ်ဘၣ်သံဘၣ်ပှၫ်, တၫ်သူၣ်တၫ်ဖျး တၫ်လီၫ်အ့ကၢၫ်လၢအကလး ဘၣ်ဟးဂီၤ,တၫ်သူတၤသၣ်အဃၣ်လီၤ,ကျီၫ်ပနၫ်ဘၣ်သံ တၫ်ကီတၫ်ခဲတဖၣ် ကွၫ်ဆၢၣ်မဲာ်ဘၣ်၀ဲအဂ့ၫ် KNUတဲ၀ဲလီၤ.
ကီၫ်ရ့ၣ်ချၢၣ်လွံၫ်ထူၣ်အပူၤ သ၀ီခဲလၢာ်(၂၈၉)ဖျၢၣ်,ပှၤ(၂)ကလီၫ်ဘျဲၣ်(၁၆၈,၄၂)ဂၤ တူၫ်ဘၣ်ထံလုၫ်ဘၢတၫ်၀ံၤ ဘၣ်သံ၀ဲ(၂)ဂၤန့ၣ်လီၤ.လၢကီၫ်ရ့ၣ်တီအူအပူၤတခီ ပှၤနီၫ်ဂံၫ် တကလီၫ်တခီဃၣ်ဃၣ် (၁၄၈,၅၀၀)ဂၤ ကွၫ်ဆၢၣ်မဲာ်ဘၣ် ထံလုၫ်ဘၢတၫ်၀ံၤ ဘၣ်သံ၀ဲ(၇)ဂၤအဂ့ၫ် KNUပာ်ဖျါ၀ဲလီၤ.
လၢကတီၫ်အံၤ တၫ်ကမၤတၫ်က့ၤသူၣ်ထီၣ်ဆီလီၤက့ၤလၢ ထံပှၤဘၣ်ကီဘၣ်ခဲတဖၣ်အဂီၫ် လိၣ်ဘၣ်တၫ်မၤစၢၤတဖၣ်အဂ့ၫ် တီအူလီၫ်က၀ီၤဖိတဂၤတဲ၀ဲလီၤ.
“တၫ်ဂ့ၫ်ခိၣ်သ့ၣ်န့ၣ် လိၣ်ဘၣ်တၫ်က့ၤသူၣ်ထီၣ်ဘှီထီၣ်က့ၤလီၤ.တၫ်အီၣ်တၫ်အီပနံာ်တဖၣ်,တၫ်ကူတၫ်သိးတဖၣ်,ထံအီဒု ပှၤမၤစၢၤတၫ်တဖၣ် ဟဲအဃိ ဘၣ်လိာ်ဖိးဒ့လီၤ.လၢကတီၫ်အံၤ ထံလီၤလံဘၣ်ဆၣ် တၫ်လီၫ်လၢထံလုၫ်ဘၢတ့ၫ်တဖၣ် လီၤဘျၢအဖၢလီၤအဂ့ၫ်”တဲ၀ဲလီၤ.
ကီၫ်ရ့ၣ်ချၢၣ်လွံၫ်ထူၣ်အပူၤ ပှၤဃ့ၫ်သုးပှၤလီၫ်အိၣ်ကမှံဖိဒၣ်လဲၣ် တူၫ်ဘၣ်ထံလုၫ်ဘၢတၫ်၀ံၤ ဂ့ၫ်ဂီၫ်အူဆီၣ်ထွဲမၤစၢၤ၀ဲ ဘၣ်ဆၣ် တလၢတပှဲၤဘၣ်ဒီး လိၣ်ဘၣ်တၫ်မၤစၢၤဒီးကသံၣ်ကသီတဖၣ်အဂ့ၫ် KNU ပာ်ဖျါ၀ဲလီၤ.
လၢထံကီၫ်ဒီတဘ့ၣ် ထံဒိၣ်နိယွၤအပူၤ ပှၤ(၉)ကလီၫ်ဃၣ်ဃၣ်(၈၈၇,၀၀၀)ဂၤ တူၫ်ဘၣ်ထံလုၫ်ဘၢတၫ်၀ံၤ ပှၤ(၃၀၀)ဂၤဘျဲၣ်ဘၣ်သံ၀ဲအဂ့ၫ် ဖဲလါစဲးပထ့ဘၢၣ်(၂၂)သီအနံၤန့ၣ် ဘီမုၫ်စၢဖှိၣ်ကရၢ ဘၣ်ထွဲဟီၣ်ခိၣ်ဖိတၫ်မၤစၢၤ တၫ်တၢၣ်ပီၣ် တဲသကိး၀ဲၤဒၢး(UNOCHA) ဘိးဘၣ်ရၤလီၤ၀ဲလီၤ.
