လါစဲးပထ့ဘၢၣ်(၂၀)သီ,၂၀၂၄နံၣ်
လၢကလံၤတၫ်ဆီၣ်သနံးစှၤအလီၫ် ကလံၤလၢအိၣ်တ့ၫ်တဖၣ် ကနုာ်လီၤကီၫ်ပယီၤဒီးလၢတၫ်လီၫ်သကုၤအပူၤ ထံဒိၣ်နိယွၤကဲထီၣ်သ့၀ံၤ တၫ်ကဘၣ်ပလီၫ်သးလၢ ထံကျိထံတဖၣ်အဂ့ၫ် မူခိၣ်ကလံၤသီၣ်ဂီၤ ပှၤကူၣ်သ့တဖၣ် တဲတယာ်ဃာ်၀ဲလီၤ.
Tropical Depression- SIXTEENအမံၤအိၣ် ကလံၤတၫ်ဆီၣ်သနံးစှၤတၫ်လီၫ်အံၤ ဖဲလါစဲးပထ့ဘၢၣ်(၁၉)သီနံၤ ဟါခီ အကတီၫ် နုာ်လီၤ၀ဲဖဲကီၫ်ဘံၣ်ယဲးနၣ် ခိခိၣ်တၫ်လီၫ်တဖၣ်အပူၤ၀ံၤ ကလံၤလၢအိၣ်တ့ၫ်တဖၣ်န့ၣ် အိၣ်လၢ ကီၫ်ကၠီၣ်တဲၣ်ကလံၤစိးတကပၤဒီး ကနုာ်လီၤ၀ဲဖဲကီၫ်ပယီၤ,ကညီကီၫ်စဲၣ်,၀့ၫ်ဖၣ်ပူၣ်အကပၤသ့၀ဲအဂ့ၫ် မူခိၣ်ကလံၤ သီၣ်ဂီၤ ပှၤကူၣ်သ့ အူ၀့နဲၣ် တယာ်တဲဃာ်၀ဲလီၤ.
ဒ်ကလံၤဆံးဖိအသိး ဟဲနုာ်လီၤတုၤဆူ ကၠီၣ်တဲၣ်-ပယီၤကီၫ်ဆၢ ခိခိၣ်တၫ်လီၫ်တကပၤဘၣ်ဆၣ် ဟဲနုာ်လီၤလၢကီၫ်ပယီၤ ဒ်ကလံၤမုၫ်အပတီၫ် တသ့ဘၣ်အဂ့ၫ် အူ၀့နဲၣ် တဲ၀ဲလီၤ.
ဖဲလါစဲးပထ့ဘၢၣ်(၂၂)သီအနံၤ,ဟါအကတီၫ် ကသုးကဒီးအသးဆူ ပကိရိမးမုၫ်နုာ်ကလံၤစိးတကပၤဒီးကနုာ်လီၤ၀ဲဆူ ပၠံၣ်ကီၫ်ရ့ၣ်,၀့ၫ်သဲကိအဖီခိၣ်န့ၣ်လီၤ.
ကလံၤသ၀ံးန့ၣ် နုာ်ကလီၤခီဂာ်ကဒီး၀ဲ မုၫ်နုာ်ရခၢၣ်ရိမးဒီးကနုာ်လီၤ၀ဲဆူ ဘ့ကလါပီၣ်လဲၣ်အီၣ် မုၫ်ထီၣ်တၫ်ခၢၣ်သး ပီၣ်လဲၣ်ပူၤန့ၣ်လီၤ.လၢကလံၤလဲၤကျဲဒီတကျိၤ မူခိၣ်စူၤဒိၣ်,ထံလုၫ်ဘၢတၫ်ကဲထီၣ်သ့အဂ့ၫ် အူ၀့နဲၣ်တဲဟ့ၣ်ပလီၫ်၀ဲလီၤ.
“ဃိၣ်လိာ်ကျိ ထံကျိထံကဟဲထီၣ်.သူမွဲကျိကဒိၣ်ထီၣ်သ့လီၤ.လၢအဆၢလာ်တကပၤ ကနုာ်လီၤခီဂာ်၀ဲ ဒဲးအူ(ဒိုက်ဦး)ဒီး၀ီ အဘၢၣ်စၢၤအဃိ ပရဲလိာ်ကျိဖီခိၣ် မူခိၣ်စူၤကဒိၣ်လီၤ.မူခိၣ်စူၤထံကအါအဃိ တၫ်အိၣ်သးလၢ ထံကျိထံဒိၣ်ထီၣ်သ့ဒီးကစၢၫ်ထံ အတၫ်လီၤဖုးသတူၫ်ကလာ်တဖၣ်ဒီး ထံဒိၣ်နိယွၤတၫ်အိၣ်သးတဖၣ် တၫ်ကဘၣ်ပလီၫ်သး အဂ့ၫ်န့ၣ်လီၤ.”
ကလံၤသ၀ံးကျိၤအဃိ ကီၫ်ကၠီၣ်တဲၣ် ကလံၤစိးတကပၤ၀့ၫ်တဖၣ်ဒီးတး(ခ်)ကီၫ်ရ့ၣ်ဟီၣ်က၀ီၤပာ်ဃုာ် ကၠီၣ်တဲၣ်-ပယီၤကီၫ်ဆၢ,ကညီကီၫ်စဲၣ်ကလံၤထံးတကပၤအပူၤ မူခိၣ်စူၤဒိၣ်သ့၀ဲန့ၣ်လီၤ.
ကလံၤသ၀ံးကျိၤအသဟီၣ်အဃိ ဖဲလါစဲးပထ့ဘၢၣ်(၂၀)သီနံၤတုၤ(၂၅)သီနံၤ လၢန့ၣ်ပၠံၣ်တီၣ်,မါတလ့,မကွ့ကီၫ်ခီ,ပကိကီၫ်ခီ,၀့ၫ်တကူၣ်,အ့ၣ်ယ်၀တံၣ်ကီၫ်ခီ,တနီသရံၣ်ကီၫ်ခီ,ယိၤဒိၣ်ကီၫ်စဲၣ်,ခၠီကီၫ်စဲၣ်,ရခၢၣ်ကီၫ်စဲၣ်,ကရ့ၣ်နံၣ်ကီၫ်စဲၣ်,ကညီကီၫ်စဲၣ်ဒီးတလၢၤကီၫ်စဲၣ်တဖၣ်အပူၤ မူခိၣ်စူၤသ့လၢတၫ်လီၫ်အါတီၤ၀ံၤ လီၫ်က၀ီၤတနီၤအပူၤ လီၫ်က၀ီၤစုာ်စုာ် ထံဒိၣ်,ထံဒိၣ်ပူၤတီၤပူၤတီၤဒီးကလံၤအူတၫ်ကဲထီၣ်သ့အဂ့ၫ် ကီၫ်ပယီၤမူခိၣ်ကလံၤသီၣ်ဂီၤ၀ဲၤကျိၤစ့ၫ်ကီး ထုးထီၣ်ဘိး ဘၣ်ပာ်ဖျါဃာ်၀ဲလီၤ.
Ref: DVB
