တၢ်မၤလၢကမၤဘၣ်ဒိ တရူး-ပယီၤတၢ်ရ့လိၥ်မုၥ်လိၥ် တမၤ၀ဲဘၣ်အဂ့ၢ် MNDAA ဘိးဘၣ်ရၤလီၤကဒီး

လါစဲးပထ့ဘၢၣ်(၁၉)သီ,၂၀၂၄နံၣ်

လါစပထ့ဘၢၣ်(၁၈)သီအနံၤ, ဟါလီၤခီအဆၢကတီၢ်  MNDAA ဘိးဘၣ်ရၤလီၤကဒီးလၢ ကီၢ်ပယီၤဒီကလုၥ်ဒံၣ်မိၣ်ကရံးတံးသိၣ်မှံသုးမုၢ်ဒိၣ်(MNDAA) တခီတပၥ်ဖှိၣ်မၤသကိးတၢ်ဒီး ကီၢ်ချၢပှၤတ၀ၢလၢ အထီဒါတရူး(မ့တမ့ၢ်)ပယီၤဘၣ်အဂ့ၢ်န့ၣ်လီၤ.

လံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲလၢ MNDAA ထံရူၢ်ကီၢ်သဲး Redline မ့ၢ် တမၤတၢ်ပၥ်ဖှိၣ်မၤသကိး, တၢ်ရ့လိၥ်မုၥ်လိၥ်, တၢ်ဒုးအိးထီၣ်သိၣ်မှံကရၢ ဒီး ကီၢ်ချၢပှၤတ၀ၢကရၢလၢအထီဒါ တရူး(မ့တမ့ၢ်)ပယီၤတဖၣ်ဘၣ်အဂ့ၢ်န့ၣ်လီၤ.

လံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲစ့ၢ်ကီးလၢ MNDAA တခီ သုးဂ့ၢ်၀ီမ့ၢ်ဂ့ၤ, ထံရူၢ်ကီၢ်သဲးတၢ်ပၥ်ဖှိၣ်မၤသကိး, တၢ်မၤလဲၢ်ထီၣ်သုးဟီၣ်က၀ီၤတဖၣ်အပူၤမ့ၢ်ဂ့ၤ တပၥ်ဖှိၣ်မၤသကိးတၢ်ဒီး NUGဘၣ်အဂ့ၢ် ဒီး လ့ၤတက့ၤတမၤ၀ဲ ဒုးယၤရဲၣ်ကျဲၤလၢ တၢ်ထီၣ်ဒုးမါတလ့ဒီးတီၣ်ကၠံစ့ၢ်ကီး ဘၣ်ဆၣ် တၢ်ကမၤကဒီး၀ဲ နီၢ်ကစၢ်တၢ်ဒီသဒၢလီၤသးအဂ့ၢ်န့ၣ်လီၤ.

တၢ်ပၢၢ်ဆၢပှၤတ၀ၢတဖၣ်တခီ တၢ်သုတဘၣ်ယိၣ်လၢ MNDAA အလံၥ်ဘိးဘၣ်ရၤလီၤအဖီခိၣ်ဘၣ်အဂ့ၢ် ကွဲးပၥ်ဖျါဃၣ်၀ဲလၢ ပှၤတ၀ၢပှၥ်ဘျးစဲအဖီခိၣ်န့ၣ်လီၤ.

MNDAAတခီ လ့ၤတက့ၤတဆီတလဲကွံၥ် နီၢ်ကစၢ်ထံရူၢ်ကီၢ်သဲးတၢ်အိၣ်ဂဲၤဆၢထၢၣ် လၢအမ့ၢ် နီၢ်ကစၢ်တၢ်ပၢဆှၢရဲၣ်ကျဲၤခွဲးယၥ်ဘၣ်အဂ့ၢ်, တထုးဖးအသးလၢကီၢ်စၢဖှိၣ်အပူၤဘၣ်အဂ့ၢ်, တၢ်ဟံးန့ၢ်ထံကီၢ်တၢ်စိတၢ်ကမီၤမ့ၢ်ဂ့ၤ, တၢ်ဟံးန့ၢ်တၢ်သဘျ့၀ံၤတၢ်သူၣ်ထီၣ်ထံကီၢ်သီမ့ၢ်ဂ့ၤ လ့ၤတက့ၤတမၤ၀ဲဘၣ်အဂ့ၢ် ပၥ်ဖျါဃၣ်၀ဲန့ၣ်လီၤ.

တရူးထံကီၢ်တခီ ဃ့ထီၣ်ဃၣ်၀ဲလၢ ကနုၥ်လီၤဘှါရှဲဘၣ် ကီၢ်ပယီၤတၢ်အိၣ်သးလၢ တသီဘၣ်တသီဟဲအၢထီၣ်အဂီၢ်၀ံၤ MNDAAစ့ၢ်ကီး  ကမၤ၀ဲတၢ်ပတုၥ်တၢ်ခးတဘျီဃီဒီး ကပၥ်ဖှိၣ်မၤသကိးတၢ်ဒီးတရူလၢ တၢ်ကဘှါရှဲ တၢ်သဘံၣ်သဘုၣ်လၢ တၢ်တၢၣ်ပီၣ်တဲသကိးကျဲသနူအဂ့ၢ် ပၥ်ဖျါဃၣ်၀ဲန့ၣ်လီၤ.

တၢ်ကဒီသဒၢဘၣ်ဒီး တၢ်ဂ့ၢ်လိၥ်တဖၣ်သုတကဲထီၣ်လၢ တၢ်ပဲၥ်အၢပဲၥ်သီ MNDAAတဖၣ်, ကမျၢၢ်တဖၣ် ထံၣ်ကမၣ် MNDAAထံရူၢ်ကီၢ်သဲးအတၢ်အိၣ်ဆၢထၢၣ်ဒီးတၢ်ပၥ်သးတဖၣ်အဂီၢ်စ့ၢ်ကီး ပၥ်ဖျါဃၣ်၀ဲန့ၣ်လီၤ.

ခဲအံၤ လံၥ်ဘိးဘၣ်ရၤလီၤလၢ အဘိးဘၣ်ပၥ်ဖျါထီၣ်အံၤ စှၤသီအတီၢ်ပူၤ MNDAAဘိးဘၣ်ရၤလီၤ၀ဲလၢ တရူးကျိၥ်၀ံၤ က့ၤထုးလီၤတဲၥ်ကွံၥ်အီၤလၢ စှၤမံးနံးအတီၢ်ပူၤန့ၣ်လီၤ.