လါအီကူး(၂၇)သီ,၂၀၂၄နံၣ်
ပကိကီၫ်ခီ,သုးကီၣ်ကးအကလံၤသုး၀ဲၤလီၫ်ခိၣ်သ့ၣ် ဖဲလါအီကူး(၂၆)သီနံၤ ဟါ(၃)နၣ်ရံၣ်တခီဃၣ်ဃၣ်အကတီၫ် တၫ်လဲၤဒုးအီၤခီဖျိလၢ ဒြိလၢတူၫ်သံသးဒီးမျိာ်သၣ်ယူၤတဖၣ်အဃိ သုးကီၣ်ကးအသုးခိၣ်ဒိၣ်စိ(၁)ဂၤပာ်ဃုာ် ပှၤဘၣ်သံ(၈)ဂၤဒီးဘၣ်ဒိဘၣ်ထံးအဂၤ(၂၀)ဘျဲၣ်အဂ့ၫ် ကလံၤထံးတၫ်ဒုးဟီၣ်က၀ီၤ နီၫ်ဂံၫ်(၂)တၫ်ဒုးဟီၣ်က၀ီၤ သုးဒ့ခိၣ်တဲ၀ဲလီၤ.
“ဒ်တၫ်ရဲၣ်တၫ်ကျဲၤဃးအသိး ဘၣ်၀ဲတၫ်ပညိၣ်လီၫ်တဖၣ်လီၤ.၁၁၄မမမျိာ်သၣ်တဖၣ်စ့ၫ်ကီး ဘၣ်၀ဲတၫ်ပညိၣ်လီၫ် တဖၣ်အဂ့ၫ်”သုးဖိတ့ၣ်အူတဲ၀ဲလီၤ.
တၫ်ဒုးအပူၤ သုးခိၣ်ဒိၣ်စိ(၁)ဂၤ,သုးခိၣ်စိ(၁)ဂၤ,သုးစကီၤ(၁)ဂၤဒီးလီၫ်လၤအဂၤ(၅)ဂၤဘၣ်သံ၀ံၤ ဘၣ်ဒိဘၣ်ထံး(၂၁)ဂၤအဂ့ၫ် သုးဖိတ့ၣ်အူတဲ၀ဲလီၤ.
တီအူကလံၤသုး၀ဲၤလီၫ်ခိၣ်သ့ၣ်န့ၣ် တၫ်ပာ်ပနီၣ်၀ဲဒ် “Rain of Fire” ဒုးယၤတၫ်ရဲၣ်တၫ်ကျဲၤအသိး၀ံၤ တၫ်ဒုးဟီၣ်က၀ီၤအဒ့ကျိဖးဒိၣ်သုး,ဆၣ်တူၫ်ဂီၤပတီၫ်ထီတၫ်သ့တၫ်ဘၣ်ကရၢ, KLOUD Drone Team,သုးက့နီၫ်ဂံၫ်(၂) သုးရ့ၣ်(၅),သုးက့နီၫ်ဂံၫ်(၂)သုးရ့ၣ်လီၤဆီ,ကမျၢၫ်တၫ်ဒီသဒၢသုး တီအူကီၫ်ရ့ၣ်နီၫ်ဂံၫ်(၂)သုးရ့ၣ်(၃၅၀၂,တၫ်ခၢၣ်သးကီၫ်ခီ သုး၀ဲၤလီၫ်ခိၣ် သ့ၣ်,န့ၣ်ပၠံၣ်တီၣ်သုးကီၫ်ခီသုးတဖၣ် ပာ်ဖှိၣ်ဒုး၀ဲအဂ့ၫ် ကလံၤထံးသုးဟီၣ်က၀ီၤ,တၫ်ပၢဆှၢရဲၣ်ကျဲၤနီၫ်ဂံၫ်(၂)တၫ်ဒုးဟီၣ်က၀ီၤ ပာ်ဖျါဃာ်၀ဲလီၤ.
တီအူကလံၤသုး၀ဲၤလီၫ်ခိၣ်သ့ၣ်န့ၣ် ဖဲအပူၤကွံာ်လါမ့ၤအပူၤ တၫ်လဲၤဒုးအီၤလၢမျိာ်သၣ်ယူၤအဖျၢၣ်(၁၀)အကတီၫ် သုးကီၣ်ကးတကပၤ ပတီၫ်ထီခိၣ်နၫ်(၂)ဂၤပာ်ဃုာ် ပှၤတစှၤန့ၫ်အဂၤ(၁၀)ဘၣ်သံ၀ံၤ ကဘီယူၤဒုးသုး(၂)ခိၣ် ဟးဂီၤ၀ဲအဂ့ၫ် Mountain Knights Civilian Defense Force (MKCDF)ပာ်ဖျါ၀ဲလီၤ.ဖဲ၂၀၂၃နံၣ် လါဒံၣ်စဲဘၢၣ်(၁)သီနံၤစ့ၫ်ကီး ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီးPDFသုးပာ်ဖှိၣ်တဖၣ်လဲၤဒုး၀ဲလၢဒြိဒံးန့ၣ်လီၤ.ဒ်န့ၣ်အသိး ဖဲ၂၀၂၃နံၣ် လါမး(၁၄)သီအနံၤစ့ၫ်ကီး Brave Warriors for Myanmar (BWM)ဒီးသုးပာ်ဖှိၣ်တဖၣ် လဲၤခး၀ဲဒီးမျိာ်သၣ်ယူၤ (၅)ဖျၢၣ်ဒံးန့ၣ်လီၤ.
တီအူကလံၤသုး၀ဲၤလီၫ်ခိၣ်သ့ၣ်န့ၣ် မ့ၫ်ကလံၤသုး၀ဲၤလီၫ်ခိၣ်သ့ၣ်တခါလၢမၤ၀ဲ ကလံၤကျါဒုးယၤလၢ ကရ့ၣ်နံၣ်ကီၫ်စဲၣ်, ကညီကီၫ်စဲၣ်ဒီးပကိကီၫ်ခီပာ်ဃုာ် ကီၫ်ပယီၤအဆၢလာ်တၫ်လီၫ်တဖၣ်အဂ့ၫ် တၫ်ပၢၫ်ဆၢဂံၫ်ဘါကရၢ အတၫ်အိၣ်ခိးကွၫ်မၤနီၣ်အဖီခိၣ် တၫ်သ့ၣ်ညါဘၣ်လီၤ.
