လါအီကူး(၂၇)သီ,၂၀၂၄နံၣ်
တနီသရံၣ်ကီၫ်ဆၣ်ပူၤ သုးကီၣ်ကးသုးရ့ၣ်,သုးကလၢၤဒီးတၫ်သမံသမိးတြဲၤတဖၣ် တၫ်လဲၤဒုးအီၤလၢတသီအတီၫ်ပူၤအဂ့ၫ် တၫ်သ့ၣ်ညါဘၣ်လၢလီၫ်က၀ီၤဖိတဖၣ်ဒီးတၫ်ပၢၫ်ဆၢသုးအိၣ်န့ၣ်လီၤ.
ဖဲလါအီကူး(၂၄)သီနံၤ ဂီၤ(၈)နၣ်ရံၣ်တခီဃၣ်ဃၣ် နုာ်လီၤဒုး၀ဲသုးကီၣ်ကးအသုးရ့ၣ်(ခမရ-၅၅၇)လၢအိၣ်ဆီလီၤ အသးဖဲအီးက့သ၀ီ(အောက်ကင်းရွာ)၀ံၤ ဂီၤ(၉)နၣ်ရံၣ်ဃၣ်ဃၣ်အကတီၫ် ဒုးကဒီး၀ဲတနီသရံၣ်၀့ၫ်နုာ်လီၤ တိၤတၫ်သမံသမိးတြဲၤအဂ့ၫ် တၫ်ပၢၫ်ဆၢသုးဖိတဖၣ်တဲ၀ဲလီၤ.
ခမရ(၅၅၇)တၫ်ဒုအပူၤ ကဒဲကဒဲခးလိာ်သးယံာ်(၁၅)မံးနံး၀ံၤတၫ်နုာ်လီၤဒုးတၫ်သမံသမိးတြဲၤန့ၣ် ယံာ်၀ဲအမံးနံး (၃၀)ဃၣ်ဃၣ်အဂ့ၫ် မၠ့းကီၫ်ရ့ၣ်(မြိတ်ခရိုင်), ကမျၢၫ်တၫ်ဒီသဒၢသုးပာ်ဖှိၣ်သုးကျိၤ-၂ ပှၤဘၣ်မူဘၣ်ဒါတဲ၀ဲလီၤ.
ဖဲဟါ(၃)နၣ်ရံၣ်တခီဃၣ်ဃၣ်အကတီၫ် တနီသရံၣ်၀့ၫ်နုာ်လီၤ ဘိးခၠိးအီၣ်ဆါတၫ်ဂီၤစိးပျၫ်အမဲာ်ညါ သုးကီၣ်ကးအသုး ကလၢၤ လၢအိၣ်ဆီလီၤဃာ်အသးဖဲကစၢၫ်ခိၣ် တၫ်လဲၤဒုးအီၤအကတီၫ် ယံာ်၀ဲအမံးနံး(၂၀)ဃၣ်ဃၣ်အဂ့ၫ်တဲ၀ဲလီၤ.
“တၫ်လဲၤထီၣ်ဒုးအီၤတၫ်လီၫ်(၃)တီၤလၢတနံၤဃီအတီၫ်ပူၤဒ်သိးအံၤန့ၣ် သုးကီၣ်ကးတကပၤ ထၢမံထၢမၫ်၀ဲလီၤ.ဖုးသံ ပျီၫ်ဂီၤအိၣ်၀ဲအဂ့ၫ်” သုးကျိၤ-၂ ဘၣ်မူဘၣ်ဒါတဲ၀ဲလီၤ.
တၫ်ဒုးအပူၤ သုးကီၣ်ကးအသုးဖိသံ(၁)ဂၤ,ဘၣ်ဒိ(၅)ဂၤ၀ံၤ တၫ်ပၢၫ်ဆၢသုးပာ်ဖှိၣ်တကပၤ တၫ်ဘၣ်ဒိဘၣ်ထံး တအိၣ်ဘၣ်အဂ့ၫ် တဲ၀ဲလီၤ. တသီအတီၫ်ပူၤ တၫ်လဲၤဒုးအီၤတၫ်လီၫ်(၃)တီၤဒ်သိးအံၤအဃိ သုးကီၣ်ကးဆီလီၤအါထီၣ်တၫ်ဘံၣ်တၫ်ပၢ၀ံၤ မၤတၫ်သမံသမိးဃံးဃံးအဂ့ၫ် တနီသရံၣ်ပှၤ၀့ၫ်ဖိတဂၤတဲ၀ဲလီၤ. တၫ်ဒုး(၃)ခါလၢာ်အံၤ မၠ့းကီၫ်ရ့ၣ်(မြိတ်ခရိုင်) ကမျၢၫ်တၫ်ဒီသဒၢသုးပာ်ဖှိၣ်သုးကျိၤ-နီၫ်ဂံၫ်(၁) ဒီးနီၫ်ဂံၫ်(၂)ပာ်ဖှိၣ်ဒုး၀ဲအဂ့ၫ် ပာ်ဖျါဃာ်၀ဲလီၤ.
