လါအီကူး(၂၂)သီ,၂၀၂၄နံၣ်
ဖဲလၢလါအီကူး(၂၁)သီအနံၤ, ဂီၤအဆၢကတီၢ်, တလၢၤကီၢ်စဲၣ်, ကၠဲးထိၣ်ကီၢ်ဆၣ်, လဲးပၠးသ၀ီ(လက်ပြကျေးရွာ) ဘဲလ့(ဘဲလေး)တၢ်အီၣ်ကျးအကပၤ ဟံၣ်တဖျၢၣ်လၢကၠဲးထိၣ်တၢ်ပၢၢ်ဆၢဂံၢ်ဘါကရူၢ်(KRF)အပှၤသုးဖိတဖၣ်ဟဲတုၤအိၣ်အပူၤ သုးကီၣ်ကးအသုးနုၥ်လီၤဒုး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးန့ၢ်ဘၣ်တၢ်ကစီၣ်လၢ KRFအပှၤသုးဖိတဖၣ် ဟဲတုၤအိၣ်ဆူဟံၣ်တဖျၢၣ်န့ၣ်အဃိ ဖဲဂီၤအဆၢကတီၢ်(၉)နၣ်ရံၣ်န့ၣ် ဟဲနုၥ်လီၤဒုး၀ဲလၢအဂံၢ်အဘါအါအါဂီၢ်ဂီၢ်၀ံၤ ခံခီခံကပၤတၢ်ခးလိၥ်သးအိၣ်ထီၣ်၀ဲအဂ့ၢ် လီၢ်က၀ီၤကမျၢၢ်တဖၣ် တဲ၀ဲန့ၣ်လီၤ.
တၢ်နုၥ်လီၤဒုး၀ဲအပူၤ ဟံၣ်အကစၢ်ဖံတဂၤလၢသးနံၣ်အိၣ်(၉၀)နံၣ်ဒီး KRFအပှၤသုးဖိ(၂)ဂၤ, CJ ပှၤထၢတၢ်ကစီၣ်ဖိ(၂)ဂၤစ့ၢ်ကီး သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“သုးကီၣ်ကးန့ၢ်ဘၣ် တၢ်ကစီၣ်လၢဖဲဟံၣ်တဖျၢၣ်န့ၣ်အပူၤ PDFဟဲတုၤအိၣ်၀ဲအဃိနုၥ်လီၤဒုး၀ဲလီၤ. နုၥ်လီၤဒုး၀ဲအဃိ ခံခီခံကပၤတၢ်ခးလိၥ်သးကဲထီၣ်၀ဲလီၤ. တၢ်ကစီၣ်ဟးထီၣ်ကွံၥ်အဃိလီၤ. တကတီၢ်ညါအံၤ ဘၣ်ထွဲဒီး PDFတဖၣ်အဖီခိၣ် ပှၤလၢဘၣ်တၢ်ဖီၣ်အီၤတဖၣ်စ့ၢ်ကီးအိၣ်၀ဲအဂ့ၢ်” ကၠဲးထိၣ်လီၢ်က၀ီၤကမျၢၢ်တဂၤ စံး၀ဲန့ၣ်လီၤ.
တၢ်ခးလိၥ်သးကဲထီၣ်၀ံၤအလီၢ်ခံ လၢကၠဲးထိၣ်၀့ၢ်ပူၤ သုးကီၣ်ကးအသုး ပၥ်လီၤအါထီၣ်ဃၣ်၀ဲတၢ်ဘံၣ်တၢ်ဘၢအါအါဂီၢ်ဂီၢ်အသိး မၤ၀ဲတၢ်သမံသမိးတဖၣ်ဃံးဃံးလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးတပၤစ့ၢ်ကီးဘၣ်ထွဲဒီးတၢ်နုၥ်လီၤဒုး၀ဲကၠဲးထိၣ်တၢ်ပၢၢ်ဆၢဂံၢ်ဘါကရူၢ်(KRF)အသုးတဖၣ်အိၣ်ဟံၣ်အပူၤအဂ့ၢ်, ခံခီခံကပၤတၢ်ခးလိၥ်သးကဲထီၣ်၀ဲ၀ံၤ တၢ်ထံၣ်န့ၢ်၀ဲ KRFအပှၤသုးဖိ အစိၣ်(၄)စိၣ်စ့ၢ်ကီးအဂ့ၢ် ကွဲးပၥ်ဖျါဃၣ်၀ဲလၢ တဲၣ်လံၣ်ကရၣ်ခၠၣ်နဲၣ်အပူၤန့ၣ်လီၤ.
သုးကီၣ်ကးအသုးနုၥ်လီၤဒုး၀ဲအပူၤ ဒိးန့ၢ်၀ဲကျိဖုၣ်(၃)ခိၣ်, ကျိသၣ်(၄၀)ဖျၢၣ်ဒီး ကျိဆၣ်အဒၢ(၄)ခါလၢ KRFအပှၤသုးဖိတဖၣ်အအိၣ်၀ံၤ KRFအပှၤသုးဖိ(၇)ဂၤစ့ၢ်ကီး ဃ့ၢ်ပူၤဖျဲးအသးန့ၣ်လီၤ.
ကၠဲးထိၣ်ကီၢ်ဆၣ်အပူၤ သုးကီၣ်ကးတဲ၀ဲလၢ တၢ်ဆီၣ်ထွဲမၤစၢၤ ကမျၢၢ်တၢ်ဒီသဒၢသုး(PDF)တဖၣ်၀ံၤ ကတီၢ်အံၤစှၤသီအတီၢ်ပူၤ သုးကီၣ်ကးဖီၣ်န့ၢ်ဆူၣ် လီၢ်က၀ီၤကမျၢၢ်ဖိအိၣ်ထီၣ်၀ဲတပယူၢ်ဃီန့ၣ်လီၤ.
လၢန့ၣ်အမဲၥ်ညါ သုးကီၣ်ကးတဲ၀ဲလၢ ကၠဲးထိၣ်ကီၢ်ဆၣ်ပၢၤကီၢ်ခိၣ်ဒီး ပၢၤကီၢ်ခိၣ်နၢ်ဒိၣ်ထီတဖၣ် ဟ့ၣ်၀ဲတၢ်ကစီၣ်ဆူ PDFအဂ့ၢ်၀ံၤ ဖဲလၢလါအီကူးသၢနွံတနွံအတီၢ်ပူၤန့ၣ် ဖီၣ်၀ဲ၀ံၤ မၤ၀ဲတၢ်သမံသမိးတဖၣ်န့ၣ်လီၤ.
Ref: Dawei Watch
