လါအီကူး(၂၂)သီ,၂၀၂၄နံၣ်
ဖဲလၢလါအီကူး(၂၀)သီအနံၤ, ဟါလီၤခီ(၃)နၣ်ရံၣ်အဆၢကတီၢ်န့ၣ် မၠ့ခၠၣ်(မြင်းခြံ)ကီၢ်ရ့ၣ်သုးရ့ၣ်(၄), သုးရ့ၣ်(၁၀), တတါအူ(တံတားဦး)ပကဖ, မၠ့ခၠၣ်ကီၢ်ရ့ၣ် ဒြိသုးတဖၣ်ပၥ်ဖှိၣ်သး၀ံၤ လဲၤထီၣ်ဒုး၀ဲ မါတလ့ကီၢ်ခီ, တတါအူကီၢ်ဆၣ်, မၠဲၣ်သၣ်(မြိုင်သာ)တၢ်ဒီသဒၢကလံၤကျါသုးကလၢၤအပူၤ သုးကီၣ်ကးအပှၤသုးဖိတဖၣ်ဃ့ၢ်ပဒ့ၣ်သးအဃိ (PDF)သုးတဖၣ်ထီၣ်ဒုးမၤန့ၢ်၀ဲသုးကလၢၤအံၤအသိး တၢ်မၤန့ၢ်စ့ၢ်ကီးကျိချံပှၥ်သၣ်အါအါဂီၢ်ဂီၢ်၀ံၤ တၢ်မၤဟးဂီၤကွံၥ်စၢ်ကီး သုးကလၢၤအဂ့ၢ် တၢ်သ့ၣ်ညါဘၣ်လၢကမျၢၢ်တၢ်ဒီသဒၢသုး(ပကဖ)အအိၣ်န့ၣ်လီၤ.
မၠဲၣ်သၣ်(မြိုင်သာ)တၢ်ဒီသဒၢကလံၤကျါသုးကလၢၤအံၤ အိၣ်ဆီလီၤပၥ်သးဖဲ တတါအူကီၢ်ဆၣ်ဒီး နွါထိကၠံ(နွားထိုးကြီး)ကီၢ်ဆၣ်အဆၢ၀ံၤ အိၣ်စီၣ်စုၣ်ဒီး တတါအူကဘီယူၤသန့ ထဲဒၣ်(၁၃)မံၤလၤဒီး ပၥ်လီၤဃၣ်၀ဲသုးအဂံၢ်အဘါ(၁၅)ဂၤဒီး ဆီၣ်လီၤဃၣ်၀ဲန့ၣ်လီၤ.
“သုးကီၣ်ကးအပှၤသုးဖိတဖၣ် ပၥ်တ့ၢ်သုးကလၢၤဃ့ၢ်ပဒ့ၣ်သးအဃိ တၢ်ဘၣ်သဂၢၢ်ခးလိၥ်သးတကဲထီၣ်၀ဲဂ့ၤဂ့ၤဘၣ်ဒီးတၢ်မၤန့ၢ်၀ဲ သုးကလၢၤန့ၣ်လီၤ. တၢ်ဒွဲၣ်အူမၤဟးဂီၤကွံၥ်စ့ၢ်ကီး သုးကလၢၤအဂ့ၢ်” မၠ့ခၠၣ်ကီၢ်ရ့ၣ်ကမျၢၢ်တၢ်ဒီသဒၢသုး(ပကဖ)ပှၤဘၣ်မူဘၣ်ဒါတဂၤ တဲ၀ဲန့ၣ်လီၤ.
တၢ်နုၥ်လီၤဒုး မၠဲၣ်သၣ်တၢ်ဒီသဒၢကလံၤကျါသုးကလၢၤအပူၤ တၢ်မၤန့ၢ်၀ဲ ဟုသးဒီးတၢ်အီၣ်တၢ်အီတနီၤ, သုးတၢ်ပီးတၢ်လီလီၢ်လံၤတနီၤ၀ံၤ တၢ်တီၣ်ထီၣ်၀ဲကမျၢၢ်တၢ်ဒီသဒၢသုးအနီၢ်တယၢ်ဖဲသုးကလၢၤအမဲၥ်ညါဒီး တၢ်ဂုၢ်က့ၤအခံလီအဂ့ၢ် တၢ်သ့ၣ်ညါဘၣ်န့ၣ်လီၤ.
တတါအူကဘီယူၤသန့သုးကလၢၤအကပၤ တၢ်ဆီလီၤပၥ်၀ဲ တၢ်ဒီသဒၢကလံၤကျါသုးကလၢၤ(၁၂)ဖျၢၣ်ဃၣ်ဃၣ်၀ံၤ မၠဲၣ်သၣ်တၢ်ဒီသဒၢကလံၤကျါသုးကလၢၤအပူၤ သုးကီၣ်ကးအသုးလၢဃ့ၢ်ပဒ့ၣ်သးတဖၣ် က့ၤပၥ်ဖှိၣ်ထီၣ်သးဒီးသုးကလၢၤလၢအဘူးဒီးဖဲန့ၣ်အဂ့ၢ် တၢ်ပၢၢ်ဆၢဂံၢ်ဘါကရူၢ်တဖၣ် စံး၀ဲန့ၣ်လီၤ.
သုးကီၣ်ကးအံၤ ဒိးသန့ၤ၀ဲ တတါအူကဘီယူၤသန့သုးကလၢၤ၀ံၤ မၤ၀ဲကလံၤကျါဒုးယၤရဲၣ်ကျဲၤတဖၣ် ဖဲယိၤဒိၣ်ကီၢ်စဲၣ်ကလံၤစိး, မါတလ့ကီၢ်ခီကလံၤစိးတပၤ မတယၣ်(မတ္တရာ), စ့းကူ(စဉ့်ကူး), သပ့းကၠ့း(သပိတ်ကျင်း) ဒီး စကဲကီၢ်ခီ,မကွ့ကီၢ်ခီတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: The Irrawaddy
