လါအီကၢး(၁၂)သီ,၂၀၂၄နံၣ်
ကီၢ်ဘရၣ်စံ, ဆီၣ်ပီၣ်လိၣ်(ဆော်ပေါ်လို)ကီၢ်စဲၣ်အပူၤ ကဘီယူၤတခိၣ်ဆဲးဖီကဟၣ်တဘၣ်လီၢ်ဘၣ်စး၀ံၤ လီၤတဲၥ်ကွံၥ်၀ဲအဃိ ပှၤ(၆၁)ဂၤလၢလဲၤဒိးပိၥ်ကဘီယူၤတဖၣ် သံ၀ဲအဂ့ၢ်ပှၤဘၣ်မူဘၣ်ဒါတဖၣ်တဲ၀ဲန့ၣ်လီၤ.
ကဘီယူၤတခိၣ်လၢအိၣ်ဟးထီၣ်၀ဲဒၣ်ဖဲ ကလံၤထံးပၣ်ရၣ်နၣ်ကီၢ်စဲၣ်ဒီးတၢ်လဲၤဆူ ဆီၣ်ပီၣ်လိၣ်ကီၢ်စဲၣ်, ကွးရူးဟီး(ဂွါရူဟော့စ်)ကဘီယူၤသန့ကတီၢ် လီၤတဲၥ်ကွံၥ်၀ဲအဂ့ၢ် Voepass ကလံၤကျိၤတဲ၀ဲန့ၣ်လီၤ.
ကဘီယူၤအံၤ လၢကလံၤကျါယူၤ၀့ၤ၀ီၤ၀ံၤလီၤတဲၥ်ကွံၥ်၀ဲဘျၢယုၢ်ကလၥ်အဂ့ၢ် လၢတၢ်ဂီၤမူအပူၤပၥ်ဖျါဃၣ်၀ဲန့ၣ်လီၤ. ATR 72-500ကဘီယူၤကလုၥ်အပူၤ ပှၤဟးထီၣ်လ့ၤလိၤဖိ(၅၇)ဂၤဒီးကဘီယူၤပှၤမၤတၢ်ဖိ(၄)ဂၤ ဟဲဒိးပိၥ်၀ဲ၀ံၤ သံ၀ဲခဲလၢၥ်န့ၣ်လီၤ.
ပှၤလၢသံတဖၣ်အဂီၢ် သူၣ်အုးသးအုး၀ဲအဂ့ၢ် ဘရၣ်စံကီၢ်ခိၣ် လူၢ်လၢ်(လူလာ)တဲ၀ဲန့ၣ်လီၤ. တၢ်ဂ့ၢ်အံၤအဃိ ကီၢ်စဲၣ်အပူၤတၢ်ကမၤ၀ဲတၢ်သူၣ်အုးသးအုးတၢ်ရဲၣ်တၢ်ကျဲၤ(၃)သီအတီၢ်ပူၤအဂ့ၢ် ဆီၣ်ပီၣ်လိၣ်ကီၢ်စဲၣ်ခိၣ် ဘိးဘၣ်ရၤလီၤ၀ဲန့ၣ်လီၤ.
ကတီၢ်ခဲအံၤန့ၣ် ကဘီယူၤအယူၤ၀ဲတၢ်မၤနီၣ်မၤဃါတၢ်ပီးတၢ်လီတဖၣ် တၢ်ဃုထံၣ်န့ၢ်ဃၣ်၀ဲ၀ံၤ ဖြၣ်စ့ၣ်-အံၣ်တလံၣ် ကဘီယူၤခီပနံၣ် ARTစ့ၢ်ကီဒီးကပၥ်ဖှိၣ်မၤသကိးတၢ်လၢ တၢ်ဃိထံၣ်သ့ၣ်ညါတၢ်သမံသမိးအပူၤအဂ့ၢ် တၢ်သ့ၣ်ညါဘၣ်န့ၣ်လီၤ. ကဘီယူၤအံၤ လဲၤလီၤတဲၥ်၀ဲဒၣ်ဖဲ ပှၤကညီအိၣ်က၀ီၤဒ့တဖၣ်အပူၤဘၣ်ဆၣ် ပှၤလၢအဘၣ်ဒိဘၣ်ထံးတအိၣ်၀ဲနီတဂၤဘၣ်အဂ့ၢ် ပှၤဘၣ်မူဘၣ်ဒါတဖၣ်တဲ၀ဲန့ၣ်လီၤ.
Ref: BBC
