လါအီကူး(၁၂)သီ,၂၀၂၄နံၣ်
လါယူၤလံ(၁)သီနံၤတုၤ လါအီကူး(၉)သီနံၤ အသီ(၄၀)ဆံအတီၫ်ပူၤ လၢထံကီၫ်ဒီတဘ့ၣ် သုးကီၣ်ကးသုးအဃိ ပှၤဘၣ်သံ(၁၀၀)ဂၤဃၣ်ဃၣ်အဂ့ၫ် ထံရူၫ်ကီၫ်သဲးပှၤလီၤဃိၣ်ဖိကရၢ(AAPP)ဘိးဘၣ်ပာ်ဖျါ၀ဲလီၤ.
ပိာ်မုၣ်(၂၇)ဂၤဒီးပိာ်ခွါ(၇၂)ဂၤ ခဲလၢာ်ပာ်ဖှိၣ် ပှၤ(၉၉)ဂၤဃုာ်ဒီးအမံၤစရီ တၫ်ပာ်ဂၢၫ်ပာ်ကျၢၤန့ၫ်၀ဲအဂ့ၫ် AAPPတဲ၀ဲလီၤ.
စးထီၣ်လၢ၂၀၂၁နံၣ် လါဖ့ၤဘြူၤအါရံၤ(၁)သီနံၤတုၤ ၂၀၂၄နံၣ် လါအီကူး(၉)သီနံၤ ပှၤဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီ ဒီးကမျၢၫ်ခဲလၢာ်ပာ်ဖှိၣ် (၅၄၈၂)ဂၤ ဘၣ်သံ၀ံၤ စရီလၢတၫ်မၤနီၣ်မၤဃါဃးလီၤဆီလၢ ပှၤဘၣ်တၫ်မၤသံလၢ တၫ်ပာ်ဂၢၫ် ပာ်ကျၢၤတန့ၫ်ဒီးတၫ်သမံသမိးအဖၢမုၫ်အိၣ်၀ဲ(၂၃၀၀)ဂၤအဂ့ၫ် AAPPတဲ၀ဲလီၤ.
ဘၣ်ထွဲဒီးသုးဟံးန့ၫ်ထံကီၫ်တၫ်စိတၫ်ကမီၤအဖီခိၣ် ပှၤဘၣ်တၫ်ဖီၣ်အိၣ်၀ဲ(၂၇,၁၇၅)ဂၤ၀ံၤ လၢအကျါ(၂၀,၇၃၃)ဂၤ ဘၣ်တၫ်ဖီၣ်ဃာ်အဖၢမုၫ်အဂ့ၫ် AAPPစရီပူၤ ပာ်ဖျါ၀ဲလီၤ.ပှၤဘၣ်တၫ်ဖီၣ်အီၤအကျါ ပှၤ(၉၃၂၃)ဂၤတခီ တၫ်ဒုးလီၤအီၤဃိၣ်န့ၣ်လီၤ.
ပှၤလၢတၫ်ဒုးလီၤတၫ်စံၣ်ညီၣ်သံအိၣ်၀ဲ(၁၆၇)ဂၤ၀ံၤ တၫ်ဖီၣ်အီၤ၀ံၤအလီၫ်ခံ ပှၤလၢဟဲက့ၤပူၤဖျဲးထီၣ်အိၣ်၀ဲ(၆၄၄၂)ဂၤအဂ့ၫ် AAPPထုးထီၣ်ပာ်ဖျါ၀ဲလီၤ.
