လါအီကူး(၁၃)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ စးထီၣ်လၢ(၂၀၂၁)နံၣ်တုၤ(၂၀၂၄)နံၣ်,လါယူၤလံကတီၢ်, (၃)နံၣ်ဘျဲၣ်အတီၢ်ပူၤ သုးကီၣ်ကးတပၤ မၤကမၣ်၀ဲပှၤဟီၣ်ခိၣ်ဖိခွဲးယာ်အကလုၥ်ကလုၥ်အဂ့ၢ် ကီၢ်ရ့ၣ်ချၢၣ်လွံၢ်ထူၣ်ပှၤဘၣ်မူဘၣ်ဒါ တဲ၀ဲအဖီခိၣ် တၢ်သ့ၣ်ညါဘၣ်န့ၣ်လီၤ.
(၃)နံၣ်ဘျဲၣ်အတီၢ်ပူၤ သုးကီၣ်ကးအသုးတဖၣ် ခးလီၤကျိဖးဒိၣ်အကလုၥ်ကလုၥ်ဆူ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ (၁၈၄၅)ဘျီဒီး ခးလီၤ၀ဲကျိသၣ်အဖျၢၣ်(၅၈၄၃)ဖျၢၣ်အဂ့ၢ်စံး၀ဲန့ၣ်လီၤ.
တကးဘၣ် လၢကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ သုးကီၣ်ကးလဲၤတ့ၢ်လီၤမ့ၣ်ပိၢ်ဒီးခးလီၤတၢ်အဘျီ(၃၅၁)ဘျီ၀ံၤ လဲၤတ့ၢ်လီၤမ့ၣ်ပိၢ်ဒီးခးလီၤမ့ၣ်ပိၢ်အဖျၢၣ်(၆၅၉)ဖျၢၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲၥ်ညါ (၃)နံၣ်ဘျဲၣ်အတီၢ်ပူၤ သုးကီၣ်ကးအသုးလဲၤတ့ၢ်လီၤဒြိမ့ၣ်ပိၢ်အဘျီ(၁၁၇)ဘျီ၀ံၤ တ့ၢ်လီၤဒြိမ့ၣ်ပိၢ်အဖျၢၣ်(၁၃၀)ဖျၢၣ်န့ၣ်လီၤ.
ဒ်န့ၣ်အသိး ခီဖျိလၢတၢ်ဂ့ၢ်အကလုၥ်ကလုၥ်အဖီခိၣ် သုးကီၣ်ကးအသုးတဖၣ် ဖီၣ်န့ၢ်ဆူၣ်ကမျၢၢ်(၇၀)ဂၤ ဒီး မၤကမၣ်၀ဲပှၤဟီၣ်ခိၣ်ဖိခွဲးယၥ်တဖၣ်န့ၣ်လီၤ.
လၢတၢ်န့ၣ်အဃိ(၃)နံၣ်ဘျဲၣ်အတီၢ်ပူၤ လၢကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ သုးကီၣ်ကးအတၢ်မၤကမၣ်ပှၤဟီၣ်ခိၣ်ဖိခွဲးယၥ်လၢအမ့ၢ် ခးလီၤကျိးဖးဒိၣ်တဖၣ်,သူ၀ဲကဘီယူၤဒီးလဲၤခးလီၤတၢ်ဒီးလဲၤတ့ၢ်လီၤမ့ၣ်ပိၢ်တဖၣ်,လဲၤတ့ၢ်လီၤဒြိမ့ၣ်ပိၢ်တဖၣ် ဒီး ဖီၣ်န့ၢ်ဆူၣ်တဖၣ်အပူၤ လီၢ်က၀ီၤကမျၢၢ်သံ၀ဲ(၁၄၈)ဂၤ, ဘၣ်ဒိ(၂၇၅)ဂၤ, ကမျၢၢ်ဟံၣ်ဃီဟးဂီၤကွံၥ်(၃၁၀)ဖျၢၣ်, တၢ်သိၣ်လိကၠိဟးဂီၤကွံၥ်(၂)ဖျၢၣ်, တၢ်ဆါဟံၣ်ဟးဂီၤကွံၥ်(၁)ဖျၢၣ်,သီခါဖၠၣ်ဟးဂီၤကွံၥ်(၂)ဖျၢၣ် ဒီး တၢ်ဘူၣ်တၢ်ဘါတၢ်ဘါယွၤသရိၥ်ဟးဂီၤကွံၥ်၀ဲ(၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
