လါအီကူး(၁၂)သီ,၂၀၂၄နံၣ်
လၢ၀့ၫ်တကူၣ် ကမျၢၫ်လၢစံၣ်သုးဟဲအါထီၣ်အဃိ သုးကီၣ်ကးသမံသမိးအါထီၣ် ဖးဖီမုၫ်စရီ၀ံၤ ပှၤလၢဘၣ်တၫ်ဖီၣ်အီၤ အိၣ်စ့ၫ်ကီး၀ဲအဂ့ၫ် တၫ်သ့ၣ်ညါဘၣ်လီၤ.
ပှၤပၠ့ၣ်အူလွ့ၣ်,မါတလ့ဒီးမိကိးတကပၤ ဟဲစံၣ်သုးလၢ၀့ၫ်တကူၣ် အါထီၣ်ကယီကယီအဃိ သုးကီၣ်ကးသမံသမိးအါ ထီၣ် ဖးဖီမုၫ်စရီအသိး ဖဲလါအီကူး(၁၀)သီအနံၤန့ၣ် လၢအ့စ့ၣ်ကီၫ်ဆၣ်,မ့စ့ၣ်တံၣ်က၀ီၤဒ့ကမျၢၫ်(၁၃)ဂၤ ဘၣ်တၫ်ဖီၣ်အီၤအဂ့ၫ် ပှၤ၀့ၫ်ဖိဖဲန့ၣ်တဖၣ်တဲ၀ဲလီၤ.
“ကတီၫ်ခဲအံၤ သမံသမိးဖးဖီမုၫ်စရီတပယူာ်ဃီလီၤ.ဖဲနုာ်လီၤသမံသမိးတၫ်လၢ မ့စ့ၣ်တံၣ်က၀ီၤဒ့ပူၤန့ၣ် ဖီၣ်ပှၤ(၁၃)ဂၤ လီၤ.ဘၣ်တၫ်ဖီၣ်အီၤတၫ်လီၫ်တတီၤဃီတမ့ၫ်ဘၣ်.လူၤသမံသမိး၀ဲ၀ံၤ တဲ၀ဲလၢ ပှၤအိၣ်ဟဲလၢပၠ့ၣ်အူလွ့ၣ်,မိကိး မ့ၫ်အိၣ် န့ၣ် မၢဟဲပိာ်အခံဒီးက့ၤကိး၀ဲအဂ့ၫ် “ ပှၤလၢအိၣ်ဖဲမ့စ့ၣ်တံၣ်က၀ီၤဒ့ပူၤတဂၤတဲ၀ဲလီၤ.
အခဲအံၤ ပှၤဟးဆှဲးတၫ်ဒုးတၫ်ယၤဒီးဟဲအိၣ်ကဒု လၢ၀့ၫ်တကူၣ်အါထီၣ်အသိး တၫ်သမံသမိးဖးဖီမုၫ်စရီအါထီၣ်အဃိ ဟံၣ်ကစၫ်တဖၣ် ဒုးအိၣ်ပှၤစံၣ်သုးတဖၣ်လၢအဟံၣ်တဘူၣ်ဘၣ်အသိး,လၢဟံၣ်ဒွဲတဖၣ်စ့ၫ်ကီး ဟံၣ်ဒွဲကစၫ်တဖၣ် တတူၫ်လိာ်ပှၤစံၣ်သုးတဖၣ်အိၣ်၀ဲန့ၣ်လီၤ.
“ပအဲၣ်ဒိးမၤစၢၤလီၤ.ပှၤစ့ၫ်ကီး ဘၣ်ကွၫ်ဆၢၣ်မဲာ်တၫ်ကီတၫ်ခဲလီၤ.တၫ်မ့ၫ်တူၫ်လိာ်ဃး ပှၤစံၣ်သုးတဖၣ်ဒီးတၫ်ဂ့ၫ်ကီမ့ၫ် အိၣ်ထီၣ်တခါခါန့ၣ် တၫ်ကဘၣ်ကးတံာ်ကွံာ်ဟံၣ်အဃိ တၫ်ဘၣ်ပျံၤ၀ဲအဂ့ၫ်”ဟံၣ်ကစၫ်တဂၤတဲ၀ဲလီၤ.
သမံသမိးဖးဖီမုၫ်စရီ ဖီၣ်တၫ်ဒ်သိးအံၤအဃိ ပှၤစံၣ်သုးလၢ ငါအိၣ်ဟံၣ်တဖၣ် ဟံၣ်ကစၫ်မၢ သုးလီၫ်သုးကျဲဆူ တၫ်လီၫ် လၢအဂၤအိၣ်၀ဲအဂ့ၫ် တၫ်သ့ၣ်ညါဘၣ်လီၤ.
Ref: DVB
