လါအီကၢး(၁၂)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤ, သ၀ီတဖၣ်အပူၤ ခီဖျိလၢသုးကီၣ်ကးခးလီၤကျိဖးဒိၣ် ကိးမုၢ်နံၤအဃိ စးထီၣ်ဖဲလါအီကၢး(၁)နံၤတုၤ(၈)သီအနံၤ တနွံအတီၢ်ပူၤ လီၢ်က၀ီၤကမျၢၢ်သံ၀ဲ(၁)ဂၤ ဒီးဘၣ်ဒိ၀ဲ(၅)ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
သုးကီၣ်ကးအသုးလၢအမ့ၢ် ခလရ – ၂၆၄, ခမရ – ၃၀၇, ခလရ – ၇၃သုးတဖၣ် ခးလီၤကျိဖးဒိၣ်ဆူ ခၠိၣ်အ့(ချုံအင်း),ဖၠၣ်တလ့(ဖျံတလင်း),အလဲၣ်(အလှိုင်),သပၠ့ၣ်ညိး(သပြေညွန့်),ကၠီးကၠံပီး(ကျောက်ကြီးပေါက်),ထိ၀ါစဲး(ထိုးစိုက်ဝါး),ကည့ၣ်ကၠိ(ကညင်ကျိုး),ငတိခ့ၣ်(ငတိုးခင်),သ့းဖၠူၣ်ဆ့း(သစ်ဖြူဆိပ်)ဒီးသနးကွ့(သေနပ်ကွင်း)သ၀ီတဖၣ်အပူၤအဃိ လီၢ်က၀ီၤကမျၢၢ်တၢ်ဘၣ်ဒိဘၣ်ထံးဒီး တၢ်သူၣ်ထီၣ်တၢ်ဟးဂုၤဟးဂီၤတဖၣ် အိၣ်ထီၣ်၀ဲအဂ့ၢ်စံး၀ဲန့ၣ်လီၤ.
သုးကီၣ်ကးခးလီၤကျိဖးဒိၣ်တဖၣ်အပူၤသ့းဖၠူၣ်ဆ့းသ၀ီဖိသးနံၣ်(၆၆)နံၣ်,အူကၠံၣ်အ့သံ၀ဲ၀ံၤပှၤလၢဘၣ်ဒိၣ်ဘၣ်ထံးအကျါ သးနံၣ်(၁၁)နံၣ်တုၤ(၉၅)နံၣ်အိၣ် လီၢ်က၀ီၤကမျၢၢ်(၅)ဂၤပၥ်ဃုၥ်၀ဲအဂ့ၢ် စံး၀ဲန့ၣ်လီၤ.
ခီဖျိလၢသုးကီၣ်ကးအသုးခးလီၤကျိဖးဒိၣ်အဃိ လီၢ်က၀ီၤကမျၢၢ်တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တဖၣ်အိၣ်ထီၣ်၀ဲတကးဘၣ် သီခါဖၠၣ်, သ၀ီလီမ့ၣ်အူဒၢးဒီးဟံၣ်ဃီတနီၤဟးဂီၤကွံၥ်၀ဲအသိး ဆၣ်ဖိကီၢ်ဖိတဖၣ်စ့ၢ်ကီး သံ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
စးထီၣ်လၢ ၂၀၂၁နံၣ်, သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ဒီးတုၤ(၂၀၂၄)နံၣ်,လါမ့ၤအတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်က၀ီၤအပူၤ ကမျၢၢ်လၢပၥ်တ့ၢ်ဟံၣ်ဃီဃ့ၢ်ပူၤဖျဲးသး ထံလီၢ်ကီၢ်ပူၤပှၤဘၣ်ကီဘၣ်ခဲ အိၣ်ထီၣ်၀ဲ(၁၀)အကလီၢ်ဘျဲၣ်လံအဂ့ၢ် ဖဲလၢလါယူၤန့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
