လါအီကၢး(၈)သီ,၂၀၂၀၄နံၣ်
ကီၫ်ပယီၤ,ကီၫ်စဲၣ်ဒီးကီၫ်ခီ(၅)ခါအပူၤ ပှၤလၢအကလီၫ် ကွၫ်ဆၢၣ်မဲာ်ဘၣ် ထံတၫ်မၤဘၣ်ဒိဘၣ်ထံးတဖၣ်အဂီၫ် တၫ်မၤပူၤဖျဲးသးသမူတၫ်ဖံးတၫ်မၤဒီး တၫ်အီၣ်တၫ်အီတဖၣ် ဟ့ၣ်မၤစၢၤ၀ဲအဂ့ၫ် ဘီမုၫ်စၢဖှိၣ်ကရၢဟီၣ်ခိၣ်ဒီဖျၢၣ်တၫ်အီၣ်တၫ်အီတၫ်ရဲၣ်တၫ်ကျဲၤ(WFP)တဲလီၤ၀ဲလီၤ.
စးထီၣ်လၢလါယူၤဘူးကလၢာ်, မူခိၣ်စူၤဒိၣ်အဃိ ထံဒိၣ်နိယွၤဘၣ်ကဲထီၣ်၀ံၤ ပှၤခဲလၢာ်ပာ်ဖှိၣ် (၂)ကလီၫ်ဂၤဘျဲၣ်တူၫ်ဘၣ်တၫ်၀ံၤ အါတက့ၫ် ဘၣ်ကဲထီၣ်ပှၤဟံၣ်ဃီတအိၣ်အဂ့ၫ် ထုးထီၣ်ဘိးဘၣ်ရၤလီၤ၀ဲလီၤ.
ကီၫ်ပယီၤပူၤတၫ်အိၣ်သးအိၣ်ထီၣ်လၢ တၫ်အီၣ်တၫ်အီတလၢတလီၫ်အကတီၫ် ဘၣ်ကွၫ်ဆၢၣ်မဲာ်ထံတၫ်မၤဘၣ်ဒိတဖၣ်အဂ့ၫ် WFPအကီၫ်ပယီၤ ခၢၣ်စး Paolo Matteiတဲ၀ဲလီၤ.လၢမူကပိာ် တၫ်မၤန့ၫ်တၫ်ဂ့ၫ်တၫ်ကျိၤအဖီခိၣ် တုၤလါအီကၢး(၆)သီနံၤ ဟီၣ်က၀ီၤလၢထံတၫ်လီၤဘၣ်ယိၣ်အိၣ်အပူၤ တၫ်တယာ်၀ဲပှၤ(၈)ကလီၫ်တခီဘျဲၣ် အိၣ်ဆိး၀ဲအဂ့ၫ်တဲ၀ဲလီၤ.
ကခၠ့ၣ်ဒီးကညီကီၫ်စဲၣ်,ပကိကီၫ်ခီ,မကွ့ကီၫ်ခီဒီးစကဲကီၫ်ခီတဖၣ်အပူၤ ပှၤလၢကွၫ်ဆၢၣ်မဲာ်ဘၣ် ထံတၫ်မၤဘၣ်ဒိဘၣ်ထံးအိၣ်၀ဲ(၁)ကလီၫ်(၂)ကလးဂၤအဂ့ၫ်၀ံၤ ကျိာ်စ့,ဟုသး,တၫ်အီၣ်တၫ်အီလၢတၫ်ရဲၣ်တၫ်ကျဲၤန့ၫ်လီၤဆီတဖၣ်စ့ၫ်ကီး ဆီၣ်ထွဲမၤစၢၤ၀ဲအဂ့ၫ် တၫ်ဘိးဘၣ်ရၤလီၤအပူၤပာ်ဖျါ၀ဲလီၤ.
လၢထံကီၫ်ဒီတဘ့ၣ်အပူၤ ထံတၫ်လီၤဘၣ်ယိၣ်တဖၣ် ဘၣ်တၫ်အိၣ်ခိးကွၫ်၀ဲ၀ံၤ အလီၫ်မ့ၫ်အိၣ်န့ၣ် တၫ်ခီၣ်ဆၢထံတၫ်လီၤဘၣ်ယိၣ်တၫ်ရဲၣ်တၫ်ကျဲၤတဖၣ် တၫ်ကမၤအါထီၣ်၀ဲအိၣ်စ့ၫ်ကီးအဂ့ၫ် WFPတဲ၀ဲလီၤ.
Ref: VOA
