လါအီကၢး(၈)သီ,၂၀၂၄နံၣ်
ရၢၢ်ခၢၣ်ကီၢ်စဲၣ်ကလံၤစိးတပၤ, ဘူသံတီၣ်(ဘူးသီးတောင်)ဒီးမီၣ်တီ၀့ၢ်(မောင်တောမြို့)တဖၣ်အပူၤ ပှၤလၢဒုးအိၣ်ထီၣ် ကလုၥ်ဂ့ၢ်၀ီဒီးတၢ်ဘူၣ်တၢ်ဘါတၢ်သဘံၣ်သဘုၣ်ကဲထီၣ်သ့တၢ်မၤပျီၣ်မၤဂီၤသနူတဖၣ်လၢအမ့ၢ် သုးကီၣ်ကးဒီးအစုတီဖီလၥ်တၢ်မၤပျီၣ်မၤဂီၤပှၤဖီၣ်စုက၀ဲၤတဖၣ် သူအိၣ်ဖျါထီၣ်တသ့အဂီၢ် တၢ်ကဒုးသဘှံးကွံၥ်အီၤအဂ့ၢ်ရၢၢ်ခၢၣ်သုးမုၢ်ဒိၣ် (AA)တဲဟ့ၣ်ပလီၢ်၀ဲန့ၣ်လီၤ.
သုးကီၣ်ကးအစုတီၤဖီလၥ် ပှၤဖီၣ်စုက၀ဲၤလၢအမ့ၢ် RSO၊ ARSAဒီး ARAတဖၣ်အံၤ တၢ်ဒွဲၣ်အူမၤဟးဂီၤကွံၥ် ကမျၢၢ်ဟံၣ်ဃီတၢ်သူၣ်ထီၣ်တဖၣ်, တိၤတဖၣ်တၢ်ထုးအီၤလၢမ့ၣ်ပိၢ်မၤဟးဂီၤကွံၥ်တဖၣ်, တၢ်ဖီၣ်န့ၢ်ဆူၣ်တဖၣ်, တၢ်မၤသံမၤ၀ီတဖၣ်ဒီးတၢ်နုၥ်လီၤဂုၢ်ဆူၣ်ဟံးန့ၢ်ကမျၢၢ်တၢ်အိၣ်ယၢၤတဖၣ်အဂ့ၢ်(AA)ထုးထီၣ်ပၥ်ဖျါဃၣ်၀ဲဖဲလါအီကၢး(၇)သီအနံၤ တၢ်ထုးထီၣ်ပၥ်ဖျါအပူၤန့ၣ်လီၤ.
တကးဘၣ် ဘၣ်ထွဲကလုၥ်,တၢ်ဘူၣ်တၢ်ဘါဒီးတၢ်သူၣ်ဟ့သးဟ့တဖၣ်ကကဲထီၣ်အဂီၢ်ဒီး တၢ်ကထီဒါ(AA)အဂီၢ် တၢ်တဲဆီၣ်တခူတဖၣ်, တၢ်ထုးထီၣ်ရၤလီၤလံၥ်တၢ်ကစီၣ်ကဘျံးဖိတဖၣ် မၤ၀ဲအဂ့ၢ်စံး၀ဲန့ၣ်လီၤ.
ပှၤဖီၣ်စုက၀ဲၤတဖၣ်အံၤ အိၣ်ဆီလီၤအသးဖဲ ဘူသံတီၣ်, မီၣ်တီ၀့ၢ်တဖၣ်ဒီး ကီၢ်ဘ့ကဘါဒ့းရှ်-ကီၢ်ပယီၤကီၢ်ဆၢအကပၤ၀ံၤ ပၥ်ဖှိၣ်ဟူးဂဲၤ၀ဲဒီးသုးကီၣ်ကးအပှၤသုးဖိတဖၣ်အဂ့ၢ်စံး၀ဲန့ၣ်လီၤ.
သုးကီၣ်ကးအံၤ ထၢန့ၢ်ဆူၣ်သုးသီ လၢမီၣ်တီတကးဘၣ် ကီၢ်ဘ့ကလါဒ့းရှ်ပှၤဘၣ်ကီဘၣ်ခဲဒဲက၀ီၤတဖၣ်အပူၤ၀ံၤ ဟ့ၣ်၀ဲသုးတၢ်သိၣ်လိတဖၣ်တဘိယူၥ်ဃီအဂ့ၢ် AAစံး၀ဲန့ၣ်လီၤ.ကတီၢ်ခဲအံၤန့ၣ် သုးကီၣ်ကးဟဲတ့ၢ်လီၤမ့ၣ်ပိၢ်ဖဲ ၀့ၢ်မီၣ်တီအဃိ လီၢ်က၀ီၤကမျၢၢ်အါအါဂီၢ်ဂီၢ် သံ၀ဲ၀ံၤ တၢ်ဒုးဆူၣ်ထီၣ်၀ဲအဂ့ၢ် စံး၀ဲန့ၣ်လီၤ.
ရၢၢ်ခၢၣ်ဟီၣ်က၀ီၤအပူၤ သုးကီၣ်ကးဒီးအစုတီဖီလၥ်တၢ်ကရၢကရိတဖၣ်အတၢ်မၤပျီၣ်မၤဂီၤတၢ်အဃိ ကတီၢ်ခဲအံၤ ဘူသံတီၣ်,မီၣ်တီဟီၣ်က၀ီၤပူၤ ကလုၥ်ဒူၣ်ဆံးဖိတဖၣ်တကးဘၣ် လီၢ်က၀ီၤကမျၢၢ် အသးသမူတၢ်လီၤဘၣ်ယိၣ်, တၢ်အိၣ်ယၢၤတဖၣ် တၢ်မၤပျံၤမၤဖုးအီၤအိၣ်ထီၣ်၀ဲတပယူၥ်ဃီအဂ့ၢ် AAစံး၀ဲန့ၣ်လီၤ.
ရၢၢ်ခၢၣ်သုးမုၢ်ဒိၣ်(AA)တခီ ရၢၢ်ခၢၣ်ကီၢ်စဲၣ်, မီၣ်တီဟီၣ်က၀ီၤပူၤ သုးကီၣ်ကးအသုးကလၢၤလၢအိၣ်တ့ၢ်တဖၣ် တၢ်ကမၤန့ၢ်ကွံခဲလၢၥ်အဂီၢ် တၢ်ကထီၣ်ဒုး၀ဲအဂ့ၢ် လၢအတၢ်ဘိးဘၣ်ရၤလီၤအပူၤ ဒုးသ့ၣ်ညါဃၣ်၀ဲန့ၣ်လီၤ.
