လါအီကၢး(၈)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့ကိးဘ့ၣ်ဒဲးန့ၣ် ကဒုးလီၤပှီၢ်ကွံၥ်မီၤစိရိၤအဂ့ၢ် ခ့ၣ်အဲၣ်ယူၣ်ပှၤကတိၤတၢ်ပၢ ပဒိၣ်စီၤတီနံတဲလီၤ၀ဲန့ၣ်လီၤ.
သုးက့နီၣ်ဂံၢ်(၁,၃,၅)တဖၣ်ပၥ်ဖှိၣ်ထီၣ်သး၀ံၤ ပရဲလိၥ်ကျိၤဟီၣ်က၀ီၤတဖၣ်အပူၤ ကမၤ၀ဲဒုးယၤရဲၣ်ကျဲၤအဂီၢ် ခ့ၣ်အဲၣ်ယူၣ်,ပှၤပၢၤလီၢ်ဆ့ၣ်နီၤဒီးသုးရိၣ်မဲခိၣ်ကျၢၢ်တဖၣ်ကူၣ်ထီၣ်၀ဲအဂ့ၢ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤမီၤစိရိၤအခိၣ် တဲလီၤ၀ဲအဖီခိၣ် ပဒိၣ်စီၤတီနံတဲခီၣ်ဆၢဃၣ်၀ဲဆူ ကညီဒီကလုၥ်မံၣ်ဒံၣ်ယၣ်သဘျ့မၤ၀ဲဖဲ အၣ်ထၣ်ပၠူအဆၢကတီၢ်န့ၣ်လီၤ.
“စံး၀ဲလၢ ပသုးက့ ၁,၃,၅တဖၣ် ကမၤ၀ဲဒုးယၤရဲၣ်ကျဲၤ ဖဲပရဲလိၥ်ကျိၤဟီၣ်က၀ီၤဒီတဘ့ၣ်အဂ့ၢ်ဒီး တဲနီၤဖးလီၤ၀ဲဒ်အံၤန့ၣ် ယနၢ်ပၢၢ်လၢ မ့ၢ်ဒၣ်အ၀ဲသ့ၣ်မၤညီနုၥ်လၢ ကမၤလီၤဖးကွံၥ်ပတၢ်ကရၢကရိလီၤ. ပတၢ်ကရၢကရိန့ၣ် လီၤဆီဒၣ်တၢ်စးထီၣ်ဖဲ ၂၀၂၁နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးမီၤစိရိၤသနူကလီၤပှီၢ်ကွံၥ်အဂီၢ် သုးက့ကိးဘ့ၣ်ဒဲးန့ၣ် အ၀ဲသ့ၣ်အမူလီၢ်ဘၣ်အသိးန့ၣ်မၤ၀ဲအဂ့ၢ်” ပဒိၣ်စီၤတီနံၤ စံး၀ဲန့ၣ်လီၤ.
တကးဘၣ် ခ့ၣ်အဲၣ်ယူၣ်တခီ မၤကမၣ်၀ဲ ကီၢ်ပယီၤဒီတဘ့ၣ်တၢ်ပတုၥ်တၢ်ခးလံၥ်ဃံးဃၣ်(NCA)အဂ့ၢ် သုးကီၣ်ကးအခိၣ်တဲလီၤ၀ဲန့ၣ် မ့ၢ်ဒၣ်ဘၣ်က့ၤတဲခိၣ်ခံကဒါလီၤအဂ့ၢ်, ဘၣ်မနုအဃိလဲၣ် (NCA)အကံၢ်အလဲန့ၣ် မ့ၢ်ထံရူၢ်ကီၢ်သဲးတၢ်ဂ့ၢ်ကီန့ၣ် တၢ်ကဘၣ်ဘှါရှဲအီၤလၢ တၢ်တသူစုဆူၣ်ခီၣ်တကးကျဲဘၣ်ဆၣ် သုးကီၣ်ကးအခိၣ်န့ၣ် ခီဖျိလၢဟံးန့ၢ်ဆူၣ်တၢ်စိတၢ်ကမီၤလၢ တၢ်သူစုဆူၣ်ခီၣ်တကးအကျဲအဃိ ပှၤလၢမၤကမၣ် (NCA)လံၥ်ဃံးဃၣ်န့ၣ် အကဲမတၤလဲၣ်န့ၣ် တလိၣ်တဲလီၤလီၤဆီဆီလဲၣ်ဘၣ်အဂ့ၢ် အ၀ဲစံး၀ဲန့ၣ်လီၤ.
သုးကီၣ်ကးအခိၣ် တဲလီၤ၀ဲဒ်အံၤန့ၣ် မ့ၢ်ဒၣ်သုးကီၢ်ခီဖးဒိၣ်(၁၄)ခါအကျါ အဂံၢ်အဘါအဒိၣ်ကတၢၢ်ကီၢ်ခီတခါလၢအမ့ၢ် မုၢ်ထီၣ်ကလံၤစိးကီၢ်ခီသုး၀ဲၤလီၢ်ခိၣ်သ့ၣ် လီၤကွံၥ်၀ဲလၢတလါအတီၢ်ပူၤ၀ံၤအလီၢ်ခံ အ၀ဲတဲ၀လီၤ၀ဲဒ်န့ၣ်လီၤအဂ့ၢ် စံး၀ဲန့ၣ်လီၤ.
