လါအီကၢး(၁)သီ, ၂၀၂၄နံၣ်
သုးကီၣ်ကးအမူဒါလၢၥ်ကွံၥ်လၢတနံၤအံၤ တၢ်ကိး၀ဲဒီကလုၥ်တၢ်ဒီသဒၢဒီးတၢ်ဘံၣ်တၢ်ဘၢကီၣ်ကးအပူၤ မၤအါထီၣ်၀ဲ ဂ့ၢ်၀ီၤအူတၢ်ပၢ(၆)လါအဂ့ၢ်ဆဲတဲၥ်လီၤ၀ဲအဂ့ၢ်တၢ်သ့ၣ်ညါဘၣ်န့ၣ်လီၤ. ဂံၢ်ခီၣ်ထံးတၢ်ဘျၢခိၣ်သ့ၣ်တၢ်ဘျၢသဲစး(၂၀၀၈), အဆၢဒိၣ်(၄၂၅)အဖီခိၣ် တၢ်ဆဲတဲၥ်လီၤ၀ဲအဂ့ၢ်စံး၀ဲန့ၣ်လီၤ.
တၢ်အိၣ်ဖှိၣ်အံၤ သုးကီၣ်ကးအခိၣ်ဟံးန့ၢ်မူဒါသဃဲၤဒ် ကီၢ်ခိၣ်ပတြီၤမူဒါ၀ံၤ ရဲၣ်ကျဲၤမၤ၀ဲန့ၣ်လီၤ. သုးကီၣ်ကးပှၤပၢၤလီၢ်ဆ့ၣ်နီၤလၢ သုးကီၣ်ကးအခိၣ်အံၤ လၢတၢ်အိၣ်ဖှိၣ်အပူၤ ကီၢ်ခိၣ်ပတြီၤအူမၠ့းဆွ့ၣ်အံၤ ခီဖျိလၢတၢ်အိၣ်ဆူၣ်အိၣ်ချ့တၢ်အိၣ်သးအဃိမၤလၢပှဲၤ၀ဲမူဒါတန့ၢ်ဘၣ်အဆၢကတီၢ် ဒီကလုၥ်တၢ်ဒီသဒၢဒီးတၢ်ဘံၣ်တၢ်ဘၢဂ့ၢ်၀ီတဖၣ်အဂီၢ် တၢ်ဆီတလဲဟံးန့ၢ်မူဒါဒ် (၂၀၀၈)တၢ်ဘျၢခိၣ်သ့ၣ်အဖီခိၣ်အဂ့ၢ် တဲလီၤ၀ဲန့ၣ်လီၤ.
တကးဘၣ် သုးကီၣ်ကးတပၤတခီ အမူဒါလၢပှဲၤ၀ဲ(၂)နံၣ်အဆၢကတီၢ် ပညိၣ်ဃၣ်၀ဲလၢ တၢ်ကမၤ၀ဲတၢ်ဃုထၢဘၣ်ဆၣ် ခီဖျိလၢတၢ်မၤဘျီၣ်မၤဂီၤတဖၣ်အဃိ တၢ်မၤရဲၣ်ကျဲၤ၀ဲတန့ၢ်ဘၣ်အဂ့ၢ် တဲ၀ဲန့ၣ်လီၤ.
NUG PDFဒီးကလုၥ်ဒူၣ်ဖီၣ်စုက၀ဲၤကရၢတနီၤ အတၢ်ဟူးဂဲၤတဖၣ်အဃိ ဟီၣ်က၀ီၤတၢ်မုၥ်တၢ်ခုၣ်ကအိၣ်အဂီၢ် လိၣ်ဒံး၀ဲအဂ့ၢ်ဒီးတၢ်ကထၢန့ၢ်ဖးဖီမုၢ်စရီအဂီၢ် လိၣ်ဒံး၀ဲသပှၢ်ကတၢၢ်အဂ့ၢ် သုးကီၣ်ကးကမၤအါထီၣ်၀ဲ (၆)လါအဂီၢ် တီၣ်ဖျါထီၣ်၀ဲအဂ့ၢ် စံး၀ဲန့ၣ်လီၤ.
ခီဖျိလၢတၢ်တီၣ်ဖျါထီၣ်အဖီခိၣ် ပှၤလၢဟဲထီၣ်တၢ်အိၣ်ဖှိၣ်တဖၣ် ဆဲတဲၥ်လီၤ၀ဲလၢ တၢ်ကမၤအါထီၣ်၀ဲဂ့ၢ်ဂီၤအူတၢ်အိၣ်သး(၆)လါအဂ့ၢ်န့ၣ်လီၤ.
တၢ်မၤ၀ဲ ဒီကလုၥ်တၢ်ဒီသဒၢဒီးတၢ်ဘံၣ်တၢ်ဘၢတၢ်အိၣ်ဖှိၣ်အပူၤ သုးကီၣ်ကးပှၤပၢၤလီၢ်ဆ့ၣ်နီၤပၥ်ဃုၥ် ကမျၢၢ်ဘျီၣ်ဒိၣ်ပှၤပၢၤလီၢ်ဆ့ၣ်နီၤ အူတံၣ်ခိၣ်မၠ့း, သုးခိၣ်ကျၢၢ်ဒိၣ်စိ စိ၀့, တၢ်ဒီသဒၢကိတိၥ် သုးခိၣ်ကျၢၢ်ဒိၣ်စိ တ့ၣ်အီၣ်စါ, ထံလီၢ်ကီၢ်ပူၤကိတိၥ် သုးခိၣ်ကျၢၢ်စိ ယၣ်ပၠ့း, ကီၢ်ဆၢဂ့ၢ်၀ီကိတိၥ် သုးခိၣ်ကျၢၢ်စိ ထိထိနီၢ်တဖၣ် ဟဲထီၣ်တၢၣ်ပီၣ်တဲသကိး၀ဲန့ၣ်လီၤ.
ပှၤလၢတၢ်ကွဲမုၥ်အီၤလီၤဆီတဖၣ်တခီ သုးကီၣ်ကးအနဲၣ်ရွဲၣ် သုးခိၣ်ကျၢၢ်စိ အီၣ်လ့ဒွဒီး နဲၣ်ရွဲၣ်သဃဲၤ သုးခိၣ်ကျၢၢ်စိ ယဲ၀့အူတဖၣ်စ့ၢ်ကီး ဟဲထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
