အ့ၣ်ယၣ်၀တံၣ်ကီၫ်ခီ ထံဒိၣ်အဃိ ကၠိအဖျၢၣ်(၂၀၀)ဃၣ်ဃၣ် ဘၣ်တၫ်ကးတံာ်ဃာ်၀ံၤ တနီသရံးလီၫ်က၀ီၤဖိ(၁)ဂၤလီၤအုးသံထံ

လါအီကူး(၁)သီ,၂၀၂၄နံၣ်

အ့ၣ်ယၣ်၀တံၣ်ကီၫ်ခီ, ကီၫ်ဆၣ်(၄)ဘ့ၣ်အပူၤ ထံကျိထံဒိၣ်ထီၣ်ဟဲနုာ်လီၤအဃိ ဂ့ၫ်ခီၣ်ထံးတၫ်သိၣ်လိကၠိအဖျၢၣ်(၂၀၀)ဃၣ်ဃၣ် ဘၣ်တၫ်ကးတံာ်ကွံာ်အဂ့ၫ် တၫ်သ့ၣ်ညါဘၣ်လၢ ပှၤအိၣ်ဘူးဒီးကူၣ်သ့၀ဲၤဒၢးတဖၣ်န့ၣ်လီၤ.

အ့ၣ်ယၣ်၀တံၣ်,ဒါကး(ဒါးက),တိ(တိုး)ဒီးင၀ၣ်ထံကျိထံ(ငဝန်မြစ်ရေ) ဒိၣ်ထီၣ်ဟဲနုာ်လီၤအဃိ ပါတနီၣ်ကီၫ်ဆၣ်ပူၤ ကၠိ (၉၇)ဖျၢၣ်,ကၠိကိကီၫ်ဆၣ်(ကျောင်းကုန်းမြို့နယ်)ပူၤ ကၠိ(၄၇)ဖျၢၣ်,ပသံၣ်ကီၫ်ဆၣ်ပူၤ ကၠိ(၁၃)ဖျၢၣ်,မအူၣ်ပ့ၣ် ကီၫ်ဆၣ် အပူၤ ကၠိ(၂၆)ဖျၢၣ်,ကၠိခဲလၢာ်ပာ်ဖှိၣ် (၁၈၃)ဖျၢၣ် ဖဲလါယူၤလံ(၂၉)သီနံၤဒီး အသီ(၃၀)အနံၤန့ၣ် တၫ်စးထီၣ် ကးတံာ်ဃာ် ၀ဲအဂ့ၫ် တၫ်သ့ၣ်ညါဘၣ်လီၤ.

ပှၤလၢအိၣ်ဘူးဒီးကူၣ်သ့၀ဲၤဒၢးတဲ၀ဲလၢ ထံကျိထံဟဲထီၣ်၀ဲ သတူၫ်သလာ်လၢအသဟီၣ်ဆူၣ်ဆူၣ်အဃိ ကၠိပူၤထံထီၣ် ဒီးလီၤဘျၢကွံာ်၀ဲလီၤ.တၫ်သိၣ်လိတၫ်ဖံးတၫ်မၤတဖၣ် တၫ်အိၣ်သးအိၣ်လၢ တၫ်မၤတန့ၫ်လၢၤဘၣ်အဃိ ပှၤဘၣ်မူဘၣ် ဒါတဆီဘၣ်တဆီ အတၫ်နဲၣ်လီၤအဖီခိၣ် ဘၣ်ကးတံာ်ဃာ်၀ဲအဂ့ၫ် တဲ၀ဲလီၤ.

ကၠိတဖၣ် ဖဲတၫ်ကးတံာ်ကွံာ်ဃာ်အီၤအတီၫ်ပူၤ ဖိသၣ်တဖၣ်အတၫ်မၤလိသုတစဲၤခံတဂ့ၤအဂီၫ် ကိးနွံဒဲး မုၫ်အိၣ်ဘှံးနံၤန့ၣ် တၫ်ကက့ၤအိးထီၣ်သိလိန့ၫ်၀ဲအဂ့ၫ် တၫ်သ့ၣ်ညါဘၣ်လီၤ.

မူခိၣ်ကလံၤသီၣ်ဂီၤ၀ဲၤကျိၤ အလါယူၤလံ(၃၁)သီနံၤ ဂီၤ(၇)နၣ်ရံၣ်ကတီၫ် တၫ်ဘိးဘၣ်ရၤလီၤအဖီခိၣ် လါအီကူး(၁)သီ နံၤ တုၤဟါခီ လၢစကဲကီၫ်ခီအဆၢလာ်ဒီး ကရ့ၣ်နံၣ်ကီၫ်စဲၣ်တဖၣ်အပူၤ တၫ်ကစူၤ၀ဲပူၤတီၤပူၤတီၤ,မါတလ့ကီၫ်ခီဒီး မကွ့ကီၫ်ခီတဖၣ်အပူၤ တၫ်ကစူၤ၀ဲဘူးဘူးဒီး ကီၫ်ခီ,ကီၫ်စဲၣ်လၢအိၣ်တ့ၫ်တဖၣ် တၫ်ကစူၤလၢန့ၣ်တတီၤလၢအံၤတတီၤ ၀ံၤ ရခၢၣ်ကီၫ်စဲၣ်ပူၤ ဒ်လီၫ်က၀ီၤအသိးဒီးန့ၣ်ပၠံၣ်တီၣ်,စကဲကီၫ်ခီအဆၢခိၣ်, အ့ၣ်ယၣ်၀တံၣ်,ယိၤဒိၣ်ကီၫ်စဲၣ်,ကညီ ကီၫ်စဲၣ်ဒီးတလၢၤကီၫ်စဲၣ်တဖၣ်အပူၤ တၫ်စူၤဒိၣ်သ့ပူၤတီၤပူၤတီၤအဂ့ၫ် တၫ်သ့ၣ်ညါဘၣ်လီၤ.

တကးဘၣ်အလီၫခံ(၂)သီ တၫ်တယာ်အပူၤ န့ၣ်ပၠံၣ်တီၣ်,ပကိကီၫ်ခီ,တနီသရံၣ်ကီၫ်ခီ,ယိၤဒိၣ်ကီၫ်စဲၣ်, ရခၢၣ်ကီၣ်စဲၣ်, ကညီကီၫ်စဲၣ်ဒီးတလၢၤကီၫ်စဲၣ်တဖၣ်အပူၤ မူခိၣ်စူၤကဒိၣ်၀ဲအဂ့ၫ်တဲ၀ဲလီၤ.

ထံဒိၣ်ထီၣ်ဒီးတနီသရံၣ်ကီၫ်ဆၣ်လၢကွၫ်ဆၢၣ်မဲာ်ဘၣ်ထံတၫ်လီၤဘၣ်ယိၣ်အံၤအပူၤ ပၠံၣ်အ့သ၀ီဖိ ပိာ်ခွါတဂၤ လီၤအုးသံထံအဂ့ၫ် တၫ်သ့ၣ်ညါဘၣ်လၢအဟံၣ်ဖိဃီဖိဒီးသ၀ီဖိလၢအိၣ်ဘူးတဖၣ်အိၣ်လီၤ.

ဖဲလါယူၤလံ(၂၉)သီနံၤ ဟါ(၃)နၣ်ရံၣ်ဃၣ်ဃၣ်အကတီၫ် သးနံၣ်(၃၀)နံၣ် ပၠံၣ်အ့သ၀ီဖိ ကိၣ်စီၣ်ထွ့အံၤ လၢကလဲၤ ကျီ ၀ၣ်အဂီၫ် ဟးထီၣ်ဒီးထိတခိၣ်၀ံၤအလီၫ်ခံ ဟဲက့ၤလၢဟံၣ်ဖိဃီဖိအိၣ်တတုၤလၢၤဘၣ်ဒီး လီၤမၫ်ကွံာ်၀ဲန့ၣ်လီၤ.လၢခံ(၁) သီ ဂီၤ(၈)နၣ်ရံၣ်ဃၣ်ဃၣ်အကတီၫ် ဟဲက့ၤလီၤထွံဃုာ်ဒီးထိလၢပၠံၣ်အ့သ၀ီပူၤလီၤ. အ၀ဲန့ၣ်အနီၫ်ဆံးခါအိၣ်ဒီး တၫ်ထီၣ် တၫ်ဆါအဃိ ပှၤသ၀ီဖိတဖၣ်တယာ်တဲ၀ဲလၢ တၫ်ထီၣ်တၫ်ဆါအဃိ လီၤတဲာ်လၢထံကျါ၀ံၤသံသ့၀ဲအသိးဘၣ်ဆၣ် တၫ်ဂ့ၫ်လီၤတံၫ်လီၤဆဲးန့ၣ် တၫ်တသ့ၣ်ညါဒံးဘၣ်အဂ့ၫ် သ၀ီဖိတဂၤတဲ၀ဲလီၤ.

တနီသရံၣ်ကီၫ်ဆၣ်ပူၤ ထံကျိထံတဖၣ် ထီၣ်တလၢတၫ်ဘၣ်ယိၣ်ပနီၣ်၀ံၤ ဟဲထီၣ်အဃိ တၫ်အိၣ်သးလီၤဘၣ်ယိၣ်လၢ လီၫ်က၀ီၤဖိတဖၣ်အဂီၫ်၀ံၤ ဂ့ၫ်ဂီၫ်အူ တၫ်သုးလီၫ်သုးကျဲအဂီၫ် ပှၤမၤပူၤဖျဲးထီၣ်သးသမူတၫ်ကရၢကရိတနီၤ မၤထွဲ၀ဲ အဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အိၣ်န့ၣ်လီၤ.

Ref: DVB