လါအီကူး(၁)သီ,၂၀၂၄နံၣ်
လၢကညီကီၢ်စဲၣ်ပူၤ ခီဖျိလၢထံဒိၣ်အဃိ ကမျၢၢ်လၢကွၢ်ဆၢၣ်မဲၥ်ဘၣ်ထံတၢ်ကီတၢ်ခဲအိၣ်၀ဲအါအါဂီၢ်ဂီၢ်အဃိ တၢ်ဘၣ်အိးထီၣ်ဃၣ်၀ဲ ဒဲက၀ီၤလၢဘၣ်ကွၢ်ဆၢၣ်မဲၥ်ဘၣ်ထံတၢ်လီၤဘၣ်ယိၣ်(၆၀)ဃၣ်ဃၣ်၀ံၤ ဘၣ်မၤစၢၤအီၤအဖၢမုၢ်ဒံးလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်စဲၣ်အပူၤ ခီဖျိလၢထံလူၤဘၢကွံၥ်တၢ်အဃိ ပှၤလီၤအူးသံလၢထံအိၣ်၀ဲ(၃)ဂၤဒီး တကးဘၣ် ကျဲမုၢ်ကျဲဘိတၢ်ဆဲးကျိးဆဲကျဲတဖၣ်စ့ၢ်ကီးဟးဂီၤကွံၥ်၀ဲအဃိ တၢ်ဟးထီၣ်လ့ၤလိၤဆူ၀့ၢ်ရၤမတံတန့ၢ်လၢၤဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“ကျဲမုၢ်တဖၣ်ဟးဂီၤကွံၥ်အဃိ တၢ်လၤဆူရၤမတံန့ၣ်တညီဘၣ်. ကျဲဖဲလဲၣ်တဘိဂ့ၤန့ၣ်တညီလၢၤဘၣ်. မူခိၣ်စူၤဒိၣ်၀ံၤ ထံကျိထံဒိၣ်ထီၣ်အဃိ တၢ်လ့ၤလိၤဟးထီၣ်အဃိကီခဲ၀ဲန့ၣ်လီၤ. မမ့ၢ်၀့ၢ်ရၤမတံန့ၣ် တုၤခဲအံၤ တၢ်ကမှံၤ လၢတၢ်မၤပျီရှဲအီၤတ၀ံၤဒံး အိၣ်ဒီဒူၣ်လီၤ. သူမွဲကျိထံဒိၣ်ထီၣ်ဘၣ်ဆၣ် ထံဒိၣ်ဃၢအဂ့ၢ်” ၀့ၢ်ရၤမတံကမျၢၢ်ဖိတဂၤတဲ၀ဲန့ၣ်လီၤ.
ကညီကီၢ်စဲၣ်ပူၤ ထံဒိၣ်နိယွၤအဃိ ကျဲမုၢ်ကျဲဘိတဖၣ်ဟးဂီၤကွံၥ်၀ဲအသိး တိၤတနီၤစ့ၢ်ကီး ထံဆီၣ်ဖျိးကွံၥ်အီၤအိၣ်အသိး တၢ်သိၣ်လိကၠိတဖၣ်စ့ၢ်ကီး တၢ်ဘၣ်ကးတံၥ်ဃၣ်အီၤတစိၤတလီၢ်န့ၣ်လီၤ.
ကညီကီၢ်စဲၣ်ပူၤ ခီဖျိလၢမူခိၣ်စူၤဒိၣ်၀ံၤ ထံကျိထံဒိၣ်ထီၣ်အဃိ ဖၣ်အၣ်,လူၢ်ပျဲၢ်,ရွံၣ်ကိ,ကမးမီ,ရၤမတံ,ကီးတရံး,နိၣ်တကီကီၢ်ဆၣ်တဖၣ်အပူၤ ထံလူၤဘၢတဖၣ်ကဲထီၣ်သး၀ံၤ တၢ်ဘၣ်အိးထီၣ်ဃၣ်၀ဲ ဒဲက၀ီၤလၢဘၣ်ကွၢ်ဆၢၣ်မဲၥ်ဘၣ်ထံတၢ်လီၤဘၣ်ယိၣ်(၅၇)ဖျၢၣ်၀ံၤ ဟံၣ်ခိၣ်(၆၃၉၉)လၢဘၣ်ကွၢ်ဆၢၣ်မဲၥ်ဘၣ်ထံတၢ်ကီတၢ်ခဲတဖၣ် တၢ်ဘၣ်သုးလီၢ်သုးကျဲဃၣ်အီၤ၀ံၤ တၢ်အီၣ်တၢ်အီ, ထံကဆှီဒီးလိၣ်ဘၣ်၀ဲတဖၣ် တၢ်ဟ့ၣ်မၤစၢၤအီၤန့ၣ်လီၤ.
ကတီၢ်ခဲအံၤန့ၣ် လၢဖၣ်အၣ်၀့ၢ်ပူၤ ဃိၣ်လိၥ်ကျိထံလီၤက့ၤ၀ံၤ အိၣ်ဒံးဒၣ်လၢ တၢ်လီၤဘၣ်တၢ်ပနီၣ်အဖီခိၣ် (၄)ပျၢ်အသိး သူမွဲကျိထံစ့ၢ်ကီး ဒိၣ်ထီၣ်တုၤလၢ ၀့ၢ်ရၤမတံတၢ်လီၤဘၣ်ယိၣ်တၢ်ပနီၣ်အဖီခိၣ် (၁)ပျၢ်၀ံၤ ကထီၣ်အါထီၣ်ဒံး (၁)ပျၢ်တခီအဂ့ၢ် မူခိၣ်ကလံၤသီၣ်ဂီၤ၀ဲၤကျိၤ ဒုးသ့ၣ်ညါဃၣ်၀ဲန့ၣ်လီၤ.
“ဖၣ်အၣ်န့ၣ် ထံလီၤက့ၤဘၣ်ဆၣ် အိၣ်ဒံးဒၣ်လၢတၢ်လီၤဘၣ်ယိၣ်တၢ်ပနီၣ်ဒံးလီၤ. သိလ့ၣ်ကျဲအဖီခိၣ် ထံလီၤက့ၤသ့ဘၣ်ဆၣ် မမ့ၢ်လၢဟံၣ်ပူၤတဖၣ်တခီ ထံနုၥ်လီၤ၀ဲဒံးအဖၢမုၢ်န့ၣ်လီၤ. ပှၤလၢကွၢ်ဆၢၣ်မဲၥ်ဘၣ်ထံတၢ်ကီတၢ်ခဲတဖၣ် က့ၤဆူအဟံၣ်အဃိတန့ၢ်ဒံးဘၣ်”အဂ့ၢ် လီၢ်က၀ီၤကမျၢၢ်တဖၣ် တဲ၀ဲန့ၣ်လီၤ.
ကတီၢ်ခဲအံၤန့ၣ်လၢကညီကီၢ်စဲၣ်ဟီၣ်ခိၣ်လီၤဘံးဟီၣ်က၀ီၤ သ၀ီတဖၣ်ဒီးက၀ီၤဒ့တဖၣ်အပူၤ ထံဒိၣ်နိယွၤအိၣ်ဒံးဒၣ်အဃိ ထံတၢ်လီၤဘၣ်ယိၣ်ဒဲက၀ီၤကမျၢၢ်တဖၣ်ပၥ်ဃုၥ် ဟံၣ်ပူၤကမျၢၢ်လၢကွၢ်ဆၢၣ်မဲၥ်ဘၣ်ထံတၢ်လီၤဘၣ်တဖၣ်အဂီၢ် တၢ်မၤစၢၤတဖၣ်လိၣ်ဒံး၀ဲအဖၢမုၢ်န့ၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
