လၢတၢ်ဃူတၢ်ဖိးအပူၤ တၢ်ကနုၥ်လီၤသကိးတၢ်ဒုးအပူၤအဂီၢ် ကလံၤစိးသိၣ်မှံကရၢ(၃)ဖုဆီၣ်တခုထီၣ်

လါယူၤလံ(၃၁)သီ,၂၀၂၄နံၣ်

တၢ်ကဒုးလီၤပှီၢ်သကိး သုးမီၤစိရိၤသနူလၢတၢ်ဃူးတၢ်ဖိးအပူၤအဂီၢ် ကလံၤစိးသိၣ်မှံကရၢ(၃)ဖုအံၤ ဖဲလၢလါယူၤလံ(၃၀)သီအနံၤန့ၣ် ဆီၣ်တခုထီၣ်တဲလီၤ၀ဲန့ၣ်လီၤ.

ယိၤဒိၣ်ကလံၤစိးတပၤ တၢ်ထီၣ်ဒုးမၤန့ၢ်၀့ၢ်တဖၣ်အသဟီၣ်ဆူၣ်အဆၢကတီၢ် သိၣ်မှံကရၢ(၃)ဖုထုးထီၣ်တဲဖျါထီၣ်၀ဲဒ်အံၤန့ၣ်လီၤ.

ကီၢ်ပယီၤထံဖိကမျၢၢ်ဖိလၢ ထီဒါပၥ်ဖျါထီၣ်တၢ်ပၥ်သးလၢတၢ်မုၥ်တၢ်ခုၣ်အပူၤ၀ံၤ အိၣ်ဆၢထၢၣ်န့ၢ်ဃုၥ်၀ဲလၢ တၢ်ပၢၢ်ဆၢတကပၤအဃိ တၢ်ပၥ်ကဖၢလၢဘၣ်အီၤအဂ့ၢ်စ့ၢ်ကီး AA,MNDAA,TNLAသိၣ်မှံကရၢ(၃)ဖုတဲလီၤ၀ဲန့ၣ်လီၤ.

သိၣ်မှံကရၢသုးတဖၣ်အံၤ လၢယိၤကီၢ်စဲၣ်ကလံၤစိးတပၤ နုၥ်လီၤတၢ်ဒုးလၢ ၁၀၂၇ခံ၀ီတ၀ီဒုးယၤရဲၣ်ကျဲၤအဃိ တၢ်ဒုးတဖၣ်ဆူၣ်ထီၣ်၀ဲဒီးသုးကီၣ်ကးအဘၢၣ်စၢၤန့ၣ်လီၤ.

လၢဒုးယၤရဲၣ်ကျဲၤအံၤအပူၤ TNLAတီခိၣ်ရိၣ်မဲသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၣ်၀ဲ ၀့ၢ်မိကိးအသိး MNDAAစ့ၢ်ကီး ထီၣ်ဒုးမၤန့ၢ်ဃၣ်၀ဲ ၀့ၢ်လါရှိအဂ့ၢ်ဘိးဘၣ်ရၤလီၤဃၣ်၀ဲန့ၣ်လီၤ.

ဘၣ်ဆၣ် သုးကီၣ်ကးတပၤတခီ တဲ၀ဲလၢ၀့ၢ်လါရှိအံၤတလီၤဒံးဘၣ်၀ံၤ တၢ်ခီၣ်ဆၢဒုးက့ၤအီၤလၢ ကလံၤကျါပၥ်ဃုၥ်အကျိၤအကျဲကလုၥ်ကလုၥ်အဃိ ၀့ၢ်လါရှိအပူၤတၢ်ဒုးတဖၣ်ဆူၣ်ထီၣ်ဒံး၀ဲအဖၢမုၢ်န့ၣ်လီၤ.

ရၢၢ်ခၢၣ်သုးမုၢ်ဒိၣ်(AA)လၢထီၣ်ဒုးမၤန့ၢ်ဃၣ် ရၢၢ်ခၢၣ်ကီၢ်စဲၣ်တ၀ၥ်ဃၣ်ဃၣ်စ့ၢ်ကီး ရၢၢ်ခၢၣ်ကီၢ်စဲၣ်ပူၤ သုးကီၣ်ကးအသုးကလၢၤလၢအိၣ်တ့ၢ်တဖၣ် တၢ်ကဒုးကွံၥ်အီၤ၀ံၤ တၢ်ကထီၣ်ဒုးအီၤဒ်တၢ်ကပၢဆှၢန့ၢ် ကီၢ်စဲၣ်ဒီတဘ့ၣ်န့ၣ်လီၤ.

တကးဒံးဘၣ် သိၣ်မှံကရၢတဖၣ်ပၥ်ဃုၥ် NUGအစုတီဖီလၥ် ကမျၢၢ်ဒီသဒၢသုး(PDF)တဖၣ်စ့ၢ်ကီး လၢ၁၀၂၇ဒုးယၤရဲၣ်ကျဲၤခံ၀ီတ၀ီအပူၤနုၥ်လီၤဒုးလီၤတၢ်၀ံၤ စ့းကူ၀့ၢ်(စဉ်းကူးမြို့)လၢအိၣ်ဘူးဒီးမါတလ့၀့ၢ်စ့ၢ်ကီး တၢ်ထီၣ်ဒုးမၤန့ၢ်ဃၣ်၀ဲ၀ံၤ တၢ်ထီၣ်ဒုး၀ဲ မတယၣ်၀့ၢ်(မတ္တရာမြို့)ဒီးသပ့းကၠ့၀့ၢ်(သပိတ်ကျင်းမြို့)အဖၢမုၢ်န့ၣ်လီၤ.