လါယူၤလံ(၃၀)သီ,၂၀၂၄နံၣ်
၂၀၂၄နံၣ်, လါယူၤလံ(၂၃)သီအနံၤတုၤ(၂၇)သီအနံၤ, (၅)သီအတီၢ်ပူၤတၢ်မၤ၀ဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ် (၁၇)၀ီတ၀ီခီးကရဲး တၢ်အိၣ်ဖှိၣ်ဖးဒိၣ်၀ံၤ၀ဲလံအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
ကီၢ်ရ့ၣ်ဒူပျၥ်ယၥ်(၁၇)၀ီတ၀ီခီးကရဲးအပူၤ ခၢၣ်စးလၢဒိးဃုထၢအသးအိၣ်၀ဲ(၁၁၈)ဂၤ၀ံၤ ပှၤလၢတၢ်ဃုထၢအီၤဒ် ကီၢ်ရ့ၣ်ခိၣ်တဖၣ်မ့ၢ်၀ဲ-ကီၢ်ရ့ၣ်ခိၣ်-ပဒိၣ်စီၤလ့ၣ်စတၣ်, ကီၢ်ရ့ၣ်ခိၣ်ခံ-ပဒိၣ်စီၤကိးထူ,ကီၢ်ရ့ၣ်နဲၣ်ရွဲၣ်-ပဒိၣ်စီၤမီထူ,ကီၢ်ရ့ၣ်နဲၣ်ရွဲၣ်သဃၢၤအသိး ပဒိၣ်စီၤမိအဲးဒိးတဖၣ်၀ံၤ ပဒိၣ်စီၤန့ၢ်ထူစ့ၢ်ကီး တၢ်ဃုထၢအီၤဒ် ကီၢ်ရ့ၣ်စံၣ်ညီၣ်ပီတ့ခိၣ်ကျၢၢ်အသိးအဂ့ၢ် စံး၀ဲန့ၣ်လီၤ.တကးဘၣ် ကီၢ်ရ့ၣ်ဒူပျၥ်ယၥ်(၁၇)၀ီတ၀ီခီးကရဲးအပူၤ တၢ်ဃုထၢထီၣ်၀ဲ ကီၢ်ရ့ၣ်ထီဘိကမံးတံၥ် (၃၁)ဂၤန့ၣ်လီၤ.
လၢန့ၣ်အမဲၥ်ညါ တၢ်စံၣ်ညီၣ်ပီတ့ကမံးတံၥ်ဒီးကမံးတံၥ်(၆)ခါလၢအမ့ၢ် ဒီကလုၥ်တၢ်ဘံၣ်တၢ်ဘၢဒီး သုးဂ့ၢ်၀ီကမံးတံၥ်, တၢ်ပၢဆှၢတၢ်သိၣ်တၢ်ဘျၢကမံးတံၥ်, ကျိၥ်စ့ကမံးတံၥ်, ထံရူၢ်ကီၢ်သဲးဒီးတၢ်ကရၢကရိကမံးတံၥ်, မုၥ်ကျိၤ၀ဲၤကွၥ်ဒီး စံၣ်ပှဲၤသူၣ်ဖျးကမံးတံၥ် ပှၤပၢၤလီၢ်ဆ့ၣ်နီၤတဖၣ်စ့ၢ်ကီး တၢ်ဃုထၢထီၣ်၀ဲန့ၣ်လီၤ.
ကီၢ်ရ့ၣ်ဒူပျၥ်ယၥ် (၁၇)၀ီတ၀ီခီကရဲးအပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံတံၥ်ခိၣ်နၢ်တဖၣ်,ကီၢ်ရ့ၣ်ခၢၣ်စးခိၣ်နၢ်တဖၣ်, သုးဂ့ၢ်၀ီခၢၣ်စးခိၣ်နၢ်တဖၣ်ဒီး ကီၢ်ဆၣ်ခၢၣ်စခိၣ်နၢ်တဖၣ်စ့ၢ်ကီး လဲၤထီၣ်၀ဲအဂ့ၢ် ပၥ်ဖျါဃၣ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢအံၤ မ့ၢ်တၢ်ကရၢကရိတဖုလၢ အဂုၥ်ကျဲးစၢမၤအိၣ်ထီၣ် ကညီဒီကလုၥ်ပၥ်ဃုၥ်ကလုၥ်ဒူၣ်ခဲလၢၥ်လၢ တၢ်ဆီၣ်ဘံၣ်ဆီၣ်ဘၢအီၤတဖၣ် ဒ်သိးကဒိးန့ၢ်ဘၣ် ဖဲၣ်ဒရဲၣ်ဒံၣ်မိၣ်ကရ့ၣ်စံၣ်ခွဲးယၥ်လၢလၢပှဲၤပှဲၤအဂီၢ်န့ၣ်လီၤ.
