လါယူၤလံ(၃၁)သီနံၤ,၂၀၂၄နံၣ်
တရူးပဒိၣ်တကပၤ သုတပာ်ဖှိၣ်မၤသကိးတၫ်ဒီးသုးကီၣ်ကးတဂ့ၤအဂီၫ်အမဲာ်ညါ ကအိၣ်ဆၢထၢၣ်ဃုာ်ဒီးကီၫ်ပယီၤ ထံဖိကီၫ်ဖိအဂီၫ် ပှၤကီၫ်ပယီၤဖိလၢလဲၤတုၤဆူ ကီၫ်အဲကလံးတဖၣ် ပာ်ဖျါထီၣ်တၫ်ပာ်သးဃ့ထီၣ်၀ဲလီၤ.လၢ၀့ၫ်လိဒိၣ် တရူးမီၫ်သီ၀ဲၤဒၢးအမဲာ်ညါ ပှၤကီၫ်ပယီၤဖိ(၁၅၀)ဂၤ ပာ်ဖှိၣ်ထီၣ်သးပာ်ဖျါထီၣ်တၫ်ပာ်သးလီၤ.
တရူးပဒိၣ်တဖၣ် ကပတုာ်ကွံာ်တၫ်ဆါန့ၫ် သုးကီၣ်ကး တၫ်စုက၀ဲၤတဘျီဃီအဂီၫ်စ့ၫ်ကီး ပှၤပာ်ဖျါထီၣ်သးတဖၣ်ဃ့ထီၣ်၀ဲလီၤ.
ပှၤပာ်ဖျါထီၣ်တၫ်ပာ်သးတဂၤတဲ၀ဲလၢ တရူးပဒိၣ်သုတပာ်ဖှိၣ်မၤသကိးတၫ်ဒီးသုးကီၣ်ကး၀ံၤ ကအိၣ်ထၢထၢၣ်ဃုာ်ဒီး ကီၫ်ပယီၤထံဖိကီၫ်ဖိအဂီၫ်ဒီးတၫ်ဆါန့ၫ်သုးကီၣ်ကးတၫ်စုက၀ဲၤကပတုာ်ကွံာ်၀ဲတဘျီဃီအဂီၫ်ဃ့ထီၣ်၀ဲလီၤ. တၫ်အံၤမ့ၫ်တၫ်ပာ်ဖျါထီၣ် ထံဖိကီၫ်ဖိအတၫ်ပာ်သးလၢအမ့ၫ်အတီန့ၣ်လီၤ.
ပှၤကီၫ်ပယီၤဖိလၢ လဲၤတုၤဆူကီၫ်အဲကလံးတကးဘၣ်,ပှၤကီၫ်ပယီၤဖိလၢလဲၤတုၤဆူ ကီၫ်အမဲရၤကၤဒီးကလံၤထံးကီၫ်ခိၣ်ရံယါတဖၣ်စ့ၫ်ကီး ဖဲစှၤသီအတီၫ်ပူၤ ပာ်ဖျါထီၣ်အတၫ်ပာ်သးဒ်န့ၣ်အသိးန့ၣ်လီၤ.
ကလံၤစိးကလုာ်ဒူၣ်ဖီၣ်စုက၀ဲၤတဖၣ်အဖီခိၣ် ကပတုာ်ကွံာ်တၫ်ခးဒီးသုးကီၣ်ကးအဂီၫ် ဖဲတရူးဟ့ၣ်အါထီၣ် တၫ်ဆီၣ်သနံးအကတီၫ် တၫ်ပာ်ဖျါထီၣ်တၫ်ပာ်သးဘၣ်အိၣ်ထီၣ်ဒ်သိးအံၤလီၤ.
တရူးပဒိၣ်န့ၣ် လၢတယံာ်ဒံးဘၣ်အတီၫ်ပူၤ ထံၣ်လိာ်အသးဒီးသုးကီၣ်ကးအတၫ်ဃုထၢခီၣ်မံးရှၢၣ် တကးဘၣ် သုးကီၣ်ကးခိၣ်နၫ်ဒိၣ်ထီတဖၣ်,သုးခိၣ်နၫ်လီၫ်လံၤတဖၣ်ဒီးထံရူၫ်ကီၫ်သဲးပာ်တံၣ်ခိၣ်နၫ်တဖၣ် တပယူာ်ဃီလီၤ.
တၫ်ဃုသ့ၣ်ညါ ကီၫ်ပယီၤဂ့ၫ်၀ီဒီးတၫ်သဘံၣ်သဘုၣ်ကရၢ(Burma Affairs and Conflict Study – BACS) အလံာ်ပာ်ဖျါအပူၤ တၫ်ဃုထၢလၢသုးကီၣ်ကးကမၤ၀ဲန့ၣ် တရူးပာ်ဃုာ်ပာ်ဂီၫ်၀ဲအဂ့ၫ် ပာ်ဖျါ၀ဲလီၤ.
