လါယူၤလံ(၃၀)သီ,၂၀၂၄နံၣ်
ကလံၤစိးခိၣ်ရံယါပူၤ ထံဒိၣ်နိယွၤအဃိ ပှၤ(၅၀၀၀)ဂၤဃၣ်ဃၣ် မၤပူၤဖျဲးထီၣ်၀ဲအဂ့ၫ် ကလံၤစိးခိၣ်ရံယါ ထံကီၫ် တၫ်ကစီၣ်သန့ KCNAပာ်ဖျါ၀ဲဖဲလါယူၤလံ(၂၉)သီနံၤန့ၣ်လီၤ.ဖဲမုၫ်ဃုနံၤ မူခိၣ်စူၤဒိၣ်အဃိ ကလံၤစိးခိၣ်ရံယါဒီးတရူး ကီၫ်ဆၢ ထံကျိထံတၫ်ပာ်ပနီၣ် ထံထီၣ်လုၫ်ဘၢ၀ဲအဃိ တူၫ်ဘၣ်ထံလုၫ်ဘၢတၫ်လီၤ.
ထံကီၫ်မုၫ်နုာ်ကလံၤစိးတကပၤ ရှ့၀ံၣ်ကၠူ(ရှင်းဝီဂျူး)ဒီးအံၣ်ကၠူ(အီဂျူး)၀့ၫ်ပူၤ တၫ်မၤပူၤဖျဲးထီၣ်သးသမူ တၫ်ဖံးတၫ် မၤအပူၤ ဖဲမုၫ်အိၣ်ဘှံးနံၤန့ၣ် ကလံၤစိးခိၣ်ရံယါအခိၣ် က့ၣ်ကၠိၣ်အိ(ကင်ဂျုံအွန်း)အနီၫ်ကစၫ်ဒၣ်၀ဲတီခိၣ်ရိၣ်မဲ၀ဲ၀ံၤ ပှၤလၢတူၫ်ဘၣ်တၫ်တဖၣ် တၫ်ကဟ့ၣ်မၤစၢၤတၫ်အီၣ်တၫ်အီဒီးတၫ်လိၣ်ဘၣ်လၢအဂၤတဖၣ်အဂီၫ် နဲၣ်လီၤဃာ်၀ဲလီၤ.
မၤပူၤဖျဲးထီၣ်တၫ်လၢ ကဘီယူၤအခိၣ်(၁၀)ဒီးထံသုးကဘီတဖၣ်ပာ်ဃုာ်ဘၣ်ဆၣ် တၫ်သံတၫ်ပှၫ်ဒီးတၫ်ဟးဂုၤဟးဂီၤ အိၣ်ထဲလဲၣ်တခီ KCNAတၫ်ကစီၣ်သန့ တပာ်ဖျါ၀ဲဘၣ်.သ့ၣ်ပှၫ်ဟးဂီၤထီၣ်,ထံကျိၤတဖၣ် တၫ်တခူၣ်အီၤလၢ အသနူ ဘၣ်ဘၣ်အဃိ ညီနုၫ်မ့ၫ်တုၤဃီၤအကတီၫ်၀ဲအံၤန့ၣ် ထံဒိၣ်ထီၣ်၀ံၤ တၫ်သူၣ်တၫ်ဖျးလီၫ်တဖၣ် ဘၣ်ဟးဂီၤ၀ဲန့ၣ်လီၤ.
တဲၣ်ဖိ(တိုင်ဖုန်း)ဒီးမူခိၣ်စူၤဒိၣ်အဃိ ဖဲ၂၀၂၀နံၣ်အပူၤစ့ၫ်ကီး ကလံၤစိခိၣ်ရံယါ ကွၫ်ဆၢၣ်မဲာ်ဘၣ် ထံဒိၣ်နိယွၤ ဒိၣ်ဒိၣ် မုာ်မုာ်လီၤ.အလီၫ်ခံ ခိၣ်ဘံးတၫ်ဘၣ်ကူဘၣ်ဂာ်တၫ်ဆါ,ကန့ၫ်ပၢဘၣ်နူကလံယါတၫ်စုက၀ဲၤအဂီၫ် တၫ်ဂုၤကျဲးစၢး တဖၣ်ဒီးဘီမုၫ်စၢဖှိၣ်ကရၢအတၫ်ကးတံာ်ဃာ်မုာ်ကျိၤ၀ဲၤကွာ်တဖၣ်အဃိ ကလံၤစိးခိၣရံယါ ကွၫ်ဆၢၣ်မဲာ်ဘၣ် တၫ်ဃံးတၫ်စ့ၤတဖၣ်လီၤ.
Ref: VOA
