လါယူၤလံ(၃၀)သီ,၂၀၂၄နံၣ်
တနီသရံးကီၢ်ဆၣ်အပူၤထံဒိၣ်နိယွၤအဃိ လၢတၢ်လီၢ်တနီၤ သ၀ီဒီဖျၢၣ်ဘၣ်သုးလီၢ်သုးကျဲအဂ့ၢ် လီၢ်က၀ီၤကမျၢၢ်တဖၣ် တဲ၀ဲန့ၣ်လီၤ. သ၀ီလၢကွၢ်ဆၢၣ်မဲၥ်ဘၣ်ထံဒိၣ်နိယွၤတဖၣ်အဂီၢ် တၢ်အီၣ်တၢ်အီဒီးကသံၣ်ကသီတဖၣ် လၢၥ်ကွံၥ်၀ဲအဂ့ၢ် ပှၤလၢမၤစၢၤတၢ်တဖၣ်တဲ၀ဲန့ၣ်လီၤ.
တနီသရံးကီၢ်ဆၣ်, သ၀ီတနီၤအပူၤ ဖဲအပူၤကွံၥ် လါယူၤလံ(၂၆)သီအနံၤလံၤလံၤန့ၣ် ထံဒိၣ်ထီၣ်၀ဲအါထီၣ်၀ံၤ တုၤတနံၤအံၤ ထံလီၤသံးက့ၤတအိၣ်ဒံးဘၣ်အဂ့ၢ် လီၢ်က၀ီၤကမျၢၢ်တဖၣ်တဲ၀ဲန့ၣ်လီၤ. ထံဟဲဒိၣ်ထီၣ်သတူၢ်ကလၥ်အဃိ တၢ်ကတဲၥ်ကတီၤဆိပၥ်သးတအိၣ်ဘၣ်ဒီး ဘၣ်လဲၤသုးအိၣ်လၢတၢ်လီၢ်လၢအပူၤအလီၢ်အဂ့ၢ် တဲ၀ဲန့ၣ်လီၤ.
ပှၤဘၣ်ကီဘၣ်ခဲလၢကွၢ်ဆၢၣ်မဲၥ်ဘၣ်ထံတဖၣ်အဂီၢ် လိၣ်ဘၣ်တၢ်မၤစၢၤအဂ့ၢ် တဲ၀ဲန့ၣ်လီၤ. ဟံၣ်လၢအခီၣ်ထီတနီၤတဖၣ်တခီ တၢ်ဖီလၥ်တကထၢထံလူၤဘၢကွံၥ်အဃိ ဘၣ်အိၣ်၀ဲဒၣ်လၢတၢ်ဖီခိၣ်ဘၣ်ဆၣ် တုၤခဲအံၤထံဒိၣ်ဆဲးတဲးန့ၣ်လီၤ. သ၀ီ(၃)ဖျၢၣ်လၢကွၢ်ဆၢၣ်မဲၥ်ဘၣ်ထံလူၤဘၢအပူၤ ဟံၣ်ခိၣ်အိၣ်၀ဲ(၇၀၀)ဃၣ်ဃၣ်အဂ့ၢ် နွ့ၣ်အူမၠ့းတၣ်ကရၢလၢ အမၤစၢၤပှၤဃ့ၢ်သုးထံလီၢ်ကီၢ်ပူၤပှၤဘၣ်ဘၣ်ခဲမူဒါခိၣ် မးည့တဲ၀ဲန့ၣ်လီၤ. ‘
တနီသရံးထံကျိထံဒိၣ်ထီၣ်တဘီယူၥ်ဃီအဃိ တၢ်အီၣ်တၢ်အီဒီးကသံၣ်ကသီတဖၣ်စ့ၢ်ကီး လၢၤကွံၥ်န့ၣ်လီၤ. စုက၀ဲၤတၢ်သဘံၣ်သဘူၣ်တဖၣ်အဘၢၣ်စၢၤ တၢ်ကးတံၥ်ဃၣ်တၢ်တီၣ်တၢ်အီၣ်တၢ်အီအခွဲးအဃိ လီၢ်က၀ီၤကမျၢၢ်တဖၣ်အဂီၢ် ဖဲလၢကွၢ်ဆၢၣ်မဲၥ်ဘၣ်မူခိၣ်ကလံၤသီၣ်ဂီၤတၢ်ကီတၢ်ခဲအဆၢကတီၢ် ဟဲကီခဲဒိၣ်ထီၣ်၀ဲအဂ့ၢ် ပှၤလၢမၤစၢၤတၢ်တဖၣ်တဲ၀ဲန့ၣ်လီၤ.
တနီသရံးကီၢ်ဒိၣ်အပူၤ တုၤလၢလါယူၤလံ(၃၀)သီအနံၤန့ၣ် မူခိၣ်စူၤဒိၣ်သ့၀ဲအဂ့ၢ် မူခိၣ်ကလံၤသီၣ်၀ဲၤကျိၤတယၣ်ဃၣ်၀ဲန့ၣ်လီၤ. လၢလါယူၤလံအတီၢ်ပူၤ ပျ့ၣ်လိၥ်ကျိ, ပရဲလိၥ်ကျိ, ဆီထံးကျိ,ပကိထံကျိဒီးဃိၣ်လိၥ်ကျိပၥ်ဃုၥ် င၀ၣ်ဒီးဘံလ့ထံကျိၤတဖၣ်စ့ၢ်ကီး ၀့ၢ်တနီၤအပူၤ ထံဒိၣ်ထီၣ်တုၤလၢ တၢ်လီၤဘၣ်ယိၣ်တၢ်ပနီၣ်အဃိ ပှၤလၢကွၢ်ဆၢၣ်မဲၥ်ဘၣ်ထံလူၤဘၢတၢ်တဖၣ်အိၣ်၀ဲအဂ့ၢ် ပှၤလၢမၤစၢၤတၢ်တဖၣ်ဒီးမံၣ်ဒံၣ်ယၣ်တဖၣ် ပၥ်ဖျါဃၣ်၀ဲန့ၣ်လီၤ.
Ref: VOA
