လါယူၤလံ(၃၀)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၣ်ထူၣ်တၢ်ပၢဟီၣ်က၀ီၤ, ကီၢ်ဆၣ်(၃)ဘ့ၣ်စလၢၥ်အပူၤ စးထီၣ်လၢလါယူၤလံ(၂၅)သီအနံၤန့ၣ် ထံကျိတဖၣ်ထံဒိၣ်နိယွၤကဲထီၣ်သးအဃိ သ၀ီ(၄၁)ဖျၢၣ်ထံလူၤဘၢကွံၥ်၀ံၤ ဘၣ်ကွၢ်ဆၢၣ်မဲၥ်ဘၣ် တၢ်ကီတၢ်ခဲအကလုၥ်ကလုၥ်လီၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
“ခီဖျိလၢထံဒိၣ်ထီၣ်အဃိ ကမျၢၢ်ပၥ်ကီၤဃၣ် ဟူ,ဘု,တၢ်အီၣ်တၢ်အီဒီးတၢ်အိၣ်ဆိးလီၢ်ကျဲတဖၣ်ဟးဂီၤကွံၥ်၀ဲ, ဆၣ်ဖိကီၢ်ဖိတဖၣ်သံကွံၥ်၀ဲ,ကျဲမုၢ်ကျဲဘိတဖၣ်ဟးကွံၥ်၀ဲ,ဘုလီၢ်တဖၣ်ဟးဂီၤကွံၥ်၀ဲ,တၢ်သိၣ်လိကၠိတဖၣ်တၢ်ဘၣ်ကးတံၥ်ဃၣ်အီၤ,ခီဖျိလၢတၢ်လဲၤတၢ်က့ၤကီခဲ၀ဲအဃိတၢ်အိၣ်ဆူၣ်အိၣ်ချ့တၢ်ကဟုးကယၥ်တန့ၢ်လၢၥ်ဘၣ်ဒီးတၢ်လူၢ်အီၣ်သးသမူအဂီၢ်တၢ်မၤအီၤတန့ၢ်လၢၤဘၣ်အဃိ ဘၣ်ကွၢ်ဆၢၣ်မဲၥ်ဘၣ်တၢ်ကီတၢ်ခဲအါအါဂီၢ်ဂီၢ်အဂ့ၢ်” စံး၀ဲန့ၣ်လီၤ.
မူကီၢ်ဆၣ်အပူၤ စးထီၣ်လၢလါယူၤလံ(၂၅)သီအနံၤတုၤခဲကနံၤအံၤန့ၣ် သ၀ီလၢထံလူၤဘၢကွံၥ်အိၣ်ထီၣ်၀ဲ(၅၇)သ၀ီၤ၀ံၤ လါယူၤလံ(၂၅)သီအနံၤ ခီဖျိလၢထံဒိၣ်နိယွၤအဃိ မၠီၣ်အူသ၀ီဖိ နီၢ်ဒီမၤ၀ၤလၢအမ့ၢ် အူထဲးလ့အီၣ်ဒီးမခၠိၣ်ခၠိၣ်ထ့အဖိမုၢ် ကၠံၣ်နဒံၣ်သ့သးနံၣ်(၄)နံၣ်တဂၤစ့ၢ်ကီးသံ၀ဲန့ၣ်လီၤ.
လၢၢ်ဒိၣ်ကီၢ်ဆၣ်ဒီးဆီထံးကီၢ်ဆၣ်အပူၤ စးထီၣ်လၢလါယူၤလံ(၂၁)သီအနံၤတုၤခဲကနံၤအံၤန့ၣ် သ၀ီလၢအိၣ်ဖဲ ပရဲလိၥ်ကျိမုၢ်နုၥ်ဒီးမုၢ်ထီၣ်တပၤတဖၣ် ထံလူၤဘၢကွံၥ်၀ဲန့ၣ်လီၤ. မ့မ့ၢ်လၢလၢၢ်ဒိၣ်ကီၢ်ဆၣ်ပူၤတခီ သ၀ီခဲလၢၥ်(၄၂)ဖျၢၣ်,ဟံၣ်ခိၣ်ခဲလၢၥ်(၆၈၁၃)ဖျၢၣ် ဒီးပှၤနီၣ်ဂံၢ်ခဲလၢၥ်(၁၈၆၉၈)ဂၤ ဘၣ်ကွၢ်ဆၢၣ်မဲၥ်ဘၣ်ထံလူၤဘၢတၢ်န့ၣ်လီၤ.
ဆီထံးကီၢ်ဆၣ်ပူၤတခီ သ၀ီ(၃၂)လၢဘၣ်ကွၢ်ဆၢၣ်မဲၥ်ဘၣ်ထံလူၤဘၢအကျါ ယ့ၣ်ဖၠူၣ်သ၀ီဒီးခၠိၣ်အ့သ၀ီ,ကွ့ကိသ၀ီဒီးကီးမဲၢ်သူသ၀ီတဖၣ် ဘၣ်ကွၢ်ဘၣ်၀ဲ ထံတၢ်လီၤဘၣ်အသိးဘၣ်ကွၢ်ဆၢၣ်စ့ၢ်ကီး သုးတၢ်ကီတၢ်ခဲအဂ့ၢ် ပှၤလၢဃ့ၢ်အိၣ်ကဒုသးတဖၣ်တဲ၀ဲန့ၣ်လီၤ.
မ့မ့ၢ်လၢဆီထံးကီၢ်ဆၣ်ဒီးမူကီၢ်ဆၣ်ပူၤတခီ ဟံၣ်ဃီလၢထံလီၤဘၢကွံၥ်ဒီးဆၣ်ဖိကီၢ်ဖိလၢသံအနီၣ်ဂံၢ်နီၣ်ဒွးတဖၣ် တၢ်ထၢဖှိၣ်အီၤအဖၢမုၢ်ဒံးလီၤ၀ံၤ ကီၢ်ရ့ၣ်ချၢၣ်လွံၣ်ထူၣ်ဟီၣ်က၀ီၤပူၤ ကမျၢၢ်လၢဘၣ်ကွၢ်ဆၢၣ်မဲၥ်ထံလီၤဘၢကွံၥ်တဖၣ် လိၣ်ဘၣ်တၢ်မၤစၢၤတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
