လါယူၤလံ(၂၂)သီ, ၂၀၂၄နံၣ်
ကီၢ်တရူးအတၢ်ဃ့ထီၣ်အဖီခိၣ် ကိကးသုးမုၢ်ဒိၣ်(MNDAA)ကမၤအါထီၣ် တၢ်ပတုၥ်တၢ်ခးတုၤလါယူၤလံ(၃၁)သီအနံၤအဂ့ၢ် ထုးထီၣ်ပၥ်ဖျါဃၣ်၀ဲဖဲလါယူၤလံ(၁၉)သီအနံၤန့ၣ်လီၤ.
ကီၢ်တရူးတကပၤဃ့ထီၣ်ဃၣ်၀ဲလၢ တၢ်ကမၤ၀ဲတၢ်ပတုၥ်တၢ်ခးတဘျီဃီဒီးတၢ်ကပတုၥ်ကွံၥ်တၢ်ဒုးတဖၣ်တၢ်ဃ့ထီၣ်အဖီခိၣ် တၢ်ခီၣ်ဆၢကဒါက့ၤအဂီၢ် ကိကးသုးမုၢ်ဒိၣ်(MNDAA) သုးဂ့ၢ်၀ီခီၣ်မရှ့ၣ်ဆဲတဲၥ်လီၤ၀ဲလၢ တၢ်ကမၤတၢ်ပတုၥ်တၢ်ခး စးထီၣ်လၢလါယူၤလံ(၁၉)သီတုၤ(၃၁)သီအနံၤအဂ့ၢ် ပၥ်ဖျါဃၣ်၀ဲန့ၣ်လီၤ.
ကိးကးသုးမုၢ်ဒိၣ်(MNDAA)တပၤ တၢ်လီၢ်လၢအ၀ဲသ့ၣ်တုၤအိၣ်တဖၣ်အပူၤ ကမၤဒၣ်တၢ်ခီၣ်ဆၢတၢ်ဒုးလီၤ၀ံၤ လၢအ၀ဲသ့ၣ်တပၤကပတုၥ်ဃၣ်၀ဲတၢ်ထီၣ်ဒုးယၤရဲၣ်ကျဲၤဒီး ကမၤ၀ဲကလံၤကျါတၢ်ဒီသဒၢတဖၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
တၢ်ပတုၥ်ဃၣ်တၢ်ထီၣ်ဒုးရဲၣ်ကျဲၤအဆၢကတီၢ် တၢ်ကမၤ၀ဲတၢ်မၤပူၤဖျဲးဒီးတၢ်ဟ့ၣ်တၢ်မၤစၢၤတဖၣ်ဆူ ပှၤဃ့ၢ်သုးပှၤလီၢ်အိၣ်ကမှံၤတဖၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
တၢ်မၤ၀ဲတၢ်ပတုၥ်တၢ်ခးအဆၢကတီၢ်အဘၢၣ်စၢၤပူၤ သုးကီၣ်ကးတပၤတၢ်မ့ၢ်ဟဲထီၣ်ဒုး ကိကးသုးမုၢ်ဒိၣ်(MNDAA)န့ၣ် တၢ်ဒီသဒၢလီၤနီၢ်ကစၢ်သးအဂီၢ် တၢ်ကခီၣ်ဆၢဒုးက့ၤအီၤအဂ့ၢ် စံး၀ဲန့ၣ်လီၤ.
ကိကးသုးမုၢ်ဒိၣ်(MNDAA) တၢ်ပၢဆှၢရဲၣ်ကျဲၤသုးခိၣ်သုးနၢ်တဖၣ်,လီၢ်လၤအိၣ်တဖၣ် ဒီးသုးမုၢ်သံၣ်ဘိခဲလၢၥ်စ့ၢ်ကီး တၢ်ကလူၤပိၥ်မၤထွဲဘၣ်တၢ်နဲၣ်လီၤအံၤလၢ လီၤတံၢ်လီၤစဲးအဂီၢ်စ့ၢ်ကီး ပၥ်ဖျါဃၣ်၀ဲန့ၣ်လီၤ.
ဖဲအပူၤကွံၥ် စးထီၣ်လၢလါယူၤလံ(၁၄)သီအနံၤတုၤ(၁၈)သီအနံၤစ့ၢ်ကီး တရူးအတၢ်လီၤဘၣ်ယိၣ်အဖီခိၣ် MNDAAတပၤ မၤ၀ဲတၢ်ပတုၥ်တၢ်ခး(၄)သီကတီၢ်ပူၤန့ၣ်လီၤ
