လါယူၤလံ(၂၂)သီ, ၂၀၂၄နံၣ်
ဖၣ်အၣ်, ကြုၢ်တုတုၤကီးတရံးကျဲမုၢ်အဖီခိၣ် သုးကီၣ်ကးတပၤမၤပှဲၤအထီၣ်သုးအဂံၢ်အဘါတဖၣ်၀ံၤ ဖဲလၢကီးတရံးန့ၣ် အခဲအံၤစှၤသီအတီၢ်ပူၤ သုးကီၣ်းကးဒီးတၢ်ပၢၢ်ဆၢသုးပၥ်ဖှိၣ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိၥ်သးတဖၣ်အိၣ်ထီၣ်၀ဲခဲအံၤခဲအံၤအဂ့ၢ် တၢ်သ့ၣ်ညါဘၣ်လၢပှၤလၢအဘူးဒီးတၢ်ပၢၢ်ဆၢကရၢတဖၣ်အအိၣ်န့ၣ်လီၤ.
“ကတီၢ်ခဲအံၤတၢ်ဘၣ်သဂၢၢ်ခးလိၥ်သးတဖၣ်ကဲထီၣ်သးခဲအံၤခဲအံၤလီၤ. ခံခီခံကပၤတၢ်ဖ့ၣ်ဆၢတဖၣ်ဆူၣ်ထီၣ်၀ဲလီၤ”အဂ့ၢ် တၢ်ကစီၣ်ဂံၢ်ထံးစံး၀ဲန့ၣ်လီၤ.
သုးကီၣ်ကးတပၤ ဒ်သိးကတိဖျိန့ၢ်ဆူ၀့ၢ်ရၤမတံအဂီၢ် ဂုၥ်ကျဲးစၢး၀ဲလၢအကျိၤအကျဲအကလုၥ်ကလုၥ်အဂ့ၢ်စ့ၢ်ကီးအ၀ဲတဲ၀ဲန့ၣ်လီၤ. ဖဲလၢအပူၤကွံၥ်တနွံဃၣ်ဃၣ်အတီၢ်ပူၤန့ၣ်တၢ်ဖီၣ်န့ၢ်အီၤသုးကီၣ်ကးလီၢ်လၤအိၣ်(၄)ဂၤလၢဟဲထီၣ်လၢရၤမတံအဂ့ၢ်စ့ၢ်ကီးစံး၀ဲန့ၣ်လီၤ.
လါယူၤလံ(၁၈)သီအနံၤ, မုၢ်ထူၣ်(၂)နၣ်ရံၣ်ဘျဲၣ်အဆၢကတီၢ် သိလ့ၣ်(၃)ခိၣ်ဟဲထီၣ်ဆူကြုၢ်တု၀ံၤ တဆီအိၣ်ဟးထီၣ်လၢမၠးပတဲၣ်တုၤယ့ၣ်ကွဲတီၣ်တၢ်သမံသမိးတြဲၤဒီး လဲၤထီၣ်၀ဲဆူ၀့ၢ်ကီးတရံး၀ံၤ သိလ့ၣ်တခိၣ်အပူၤန့ၣ် အပှၤသုးဖိအဂံၢ်အဘါ(၂၀)ဂၤပၥ်ဃုၥ်၀ဲအဂ့ၢ်စံး၀ဲန့ၣ်လီၤ.
လၢကၠိကိ(ကျွန်ကုန်း)တကပၤ သုးကီၣ်ကးခးလီၤကျိဖးဒိၣ်တဖၣ်, လဲၤတ့ၢ်လီၤမ့ၣ်ပိၢ်လၢဒြိဒီးမ့ၣ်ပိၢ်တဖၣ်အိၣ်၀ဲအဃိ လီၢ်က၀ီၤမျၢၢ်တဖၣ်ဘၣ်ယိၣ်ဘၣ်ဘှီ၀ံၤ ဘၣ်ဃ့ၢ်ပူၤဖျဲးသးအဂ့ၢ်စ့ၢ်ကီးစံး၀ဲန့ၣ်လီၤ.
Ref: Salween Press
