လါယူၤလံ ၁၉, ၂၀၂၄နံၣ်
လါယူၤလံ(၁၈)သီအနံၤ, စးထီၣ်ဖဲဂီၤ(၁၈)နၣ်ရံၣ်အဆၢကတီၢ် သုးကီၣ်ကးဒီးKNLAသုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်သး ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ကၠဲးထိၣ်ကီၢ်ဆၣ်, ပ့နဲကိဒီးကၠီးပိၣ်ကၠံသ၀ီတဖၣ်အပူၤအဂ့ၢ် တၢ်သ့ၣ်ညါဘၣ်လၢတၢ်ပၢၢ်ဆၢဂံၢ်ဘါကရူၢ်အအိၣ်န့ၣ်လီၤ.
သုးကီၣ်ကးလၢသုးအဂံၢ်အဘါ(၁၃၀)ဘျဲၣ်အံၤ နီၤဖးလီၤ၀ဲသုးကျိၤ(၂)ကျိၤ၀ံၤ ဟဲနုၥ်လီၤသုးကျိၤဆူ ကီၢ်ရ့ၣ်ဒူသထူၣ်, ကၠဲးထိၣ်ကီၢ်ဆၣ်ပူၤအဃိ တၢ်ဒုးကဲထီၣ်သးန့ၣ်လီၤ.
တၢ်ဒုးအပူၤ၀့ၢ်လၢၢ်ကတံၢ်အိၣ်သူၣ်လီၤ သုးကီၣ်ကးအနီၣ်ဂံၢ်(၃၁၀)ကျိဖးဒိၣ်သုးအံၤ ခးစၢၤ၀ဲလၢကျိဖးဒိၣ်တဖၣ်ဒီး မ့မ့ၢ်လၢခံခီခံကပၤ တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတခီ တၢ်မၤလီၤတံၢ်အီၤတန့ၢ်ဒံးဘၣ်.
ခံခီခံကပၤတၢ်ဒုးအပူၤ ပ့နဲကိ, ကၠီးပိၣ်ကၠံ, မဲယိၣ်လ့ပၥ်ဃုၥ် တစှၤန့ၣ်သ၀ီ(၄)ဖျၢၣ်အပူၤ လီၢ်က၀ီၤကမျၢၢ်တဖၣ် ဘ့ၣ်ဃ့ၢ်ပူၤဖျဲးသးဆူ တၢ်လီၢ်လၢပူၤဖျဲးသးတၢ်လီၢ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.
တၢ်ဒုးအပူၤသုးကီၣ်ကးအသုးအံၤ လီၢ်က၀ီၤကမျၢၢ်(၅)ဂၤလၢ ထံၣ်န့ၢ်ဖဲကျဲတဖၣ် တၢ်ဖီၣ်န့ၢ်ဆူၣ်အီၤဒ် ကမျၢၢ်တၢ်ဒီသဒၢအသိးအဂ့ၢ် တၢ်ပၢၢ်ဆၢဂံၢ်ညါကရူၢ် ပှၤဘၣ်မူဘၣ်ဒါတဖၣ်အတၢ်တဲအဖီခိၣ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါယူၤ(၂၀)သီအနံၤစ့ၢ်ကီး သုးကီၣ်ကးအသုးကျိၤဟဲနုၥ်လီၤ ဖဲပ့နဲကိသ၀ီပူၤအဃိ သုးကီၣ်ကးဒီး KNLA သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်သး၀ံၤ ခံခီခံကပၤတၢ်သံတၢ်ပှၢ်, တၢ်ဘၣ်ဒိဘၣ်ထံးအိၣ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးအတၢ်ထုးထီၣ်ပၥ်ဖျါအဖီခိၣ် ကီၢ်ရ့ၣ်ဒူသထူၣ်ဟီၣ်က၀ီၤပူၤ စးထီၣ်လၢလါယနူၤအါရံၤတုၤလါယူၤ(၆)လါအတီၢ်ပူၤ တၢ်ဒုးကဲထီၣ်တ့ၢ်၀ဲ (၁၇၇)ဘျီအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Than Lwin Times
