လါယူၤလံ ၁၉သီ, ၂၀၂၄နံၣ်
ဖဲလါယူၤလံ(၁၇)သီအနံၤ, ဟါ(၈)နၣ်ရံၣ်အဆၢကတီၢ် သုးကီၣ်ကးအသုးလၢအိၣ်ဆီလီၤအသးဖဲ ၀့ၢ်လၢၢ်တြဲၤ(ကျောက်တံခါးမြို့)အံၤ ဟဲတ့ၢ်လီၤမ့ၣ်ပိၢ်ဒီးဒြိ ဖဲကီၢ်ရ့ၣ်ချၢၣ်လွံၢ်ထူၣ်, ကီၢ်ဆၣ်လၢၢ်ဒိၣ်, နိၣ်ထိးအ့ၣ်သ၀ီ, တၢ်ဘါယွၤသရိၥ်အဃိ တၢ်ဘါယွၤသရိၥ်ဃီသွါဟးဂီၤကွံၥ်၀ဲအဂ့ၢ် လီၢ်က၀ီၤဖိတဂၤတဲ၀ဲန့ၣ်လီၤ.
“မ့ၢ်လီၤ ဖဲလၢဟါ(၈)နၣ်ရံၣ်အဆၢကတီၢ်န့ၣ် ဟဲတ့ၢ်လီၤမ့ၣ်ပိၢ်လၢဒြိအဃိ ဃီသွါဟးဂီၤကွံၥ်၀ဲလီၤ. ဘၣ်ဆၣ်ဒူသ၀ီဖိ တၢ်ဘၣ်ဒိဘၣ်ထံးတခီတအိၣ်၀ဲဘၣ်. လၢ၀့ၢ်လၢၢ်တြဲၤန့ၣ် တၢ်န့ၢ်ဘၣ်တၢ်ကစီၣ်လၢ တၢ်ဟဲပၥ်လီၤဃၣ် ဒြိ(၂)ခိၣ်လီၤ” အဂ့ၢ် လီၢ်က၀ီၤဖိတဂၤတဲ၀ဲန့ၣ်လီၤ.
လီၢ်က၀ီၤကမျၢၢ်တဖၣ်အံၤ အပူၤကွံၥ်န့ၣ်ဘၣ်ကွၢ်ဆၢၣ်မဲၥ်ဘၣ်ဒၣ် ကျိဖးဒိၣ်တၢ်လီၤဘၣ်ယိၣ်ဘၣ်ဆၣ် မ့မ့ၢ်ခဲအံၤတခီ ဘၣ်ကွၢ်ဆၢၣ်မဲၥ်အါထီၣ်လၢဒြိတၢ်လီၤဘၣ်ယိၣ်အဂ့ၢ်အ၀ဲစံးအါထီၣ်၀ဲန့ၣ်လီၤ.
“အပူၤကွံၥ်န့ၣ် ဘၣ်ကွၢ်ဆၢၣ်မဲၥ်ဘၣ်ဒၣ် ကျိဖးဒိၣ်လီၤ. မ့မ့ၢ်ခဲအံၤန့ၣ် ဟဲအါထီၣ်လၢဒြိတခါအဂ့ၢ်”စံး၀ဲန့ၣ်လီၤ.
မ့မ့ၢ်လၢလီၢ်က၀ီၤကမျၢၢ်တၢ်ဖံးအီၣ်မၤအီၣ်တခီ မ့ၢ်ဒၣ်ပှၤထူစံၣ်ဖိတဖၣ်အဃိ ပှၤလၢလဲၤအိၣ်၀ဲလၢ စံၣ်ပျီပူၤတဖၣ်အိၣ်၀ဲအသိး ပှၤလၢအအိၣ်လၢသ၀ီပူၤတဖၣ်စ့ၢ်ကီးအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါယူၤလံ(၄)သီအနံၤ, မုၢ်ထူၣ်(၁၂)နၣ်ရံၣ်ဘျဲၣ်အဆၢကတီၢ် သုးကီၣ်ကးအသုး(ခလရ-၂၆၄)လၢအိၣ်ဆီလီၤအသးဖဲ၀့ၢ်ပ့စလိးအံၤခးလီၤ(၁၂၀မမ)ကျိဖးဒိၣ်(၂)ဖျၢၣ်ဆူလၢၢ်ဒိၣ်ကီၢ်ဆၣ်ပူၤအဃိလဲၤလီၤတဲၥ်ပိၥ်ဖးထီၣ်၀ဲဒၣ်ဖဲနိၣ်ထိးအ့ၣ်သ၀ီအကပၤ၀ံၤ သ၀ီဖိတဂၤလၢအမ့ၢ် စီၤကျိၥ်ထူ, သးနံၣ်(၅၀)စ့ၢ်ကီးသံ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲာ်ညါ ဖဲအပူၤကွံာ်လါယူၤ(၁)လါအတီၫ်ပူၤစ့ၫ်ကီး သုးကီၣ်ကးအသုးတဖၣ်လၢအမ့ၫ် (ခလရ-၂၆၄),(ခမရ-၃၀၇),(ခလရ-၆၀),ဒီး(ခလရ-၂၀)တဖၣ် ခးလီၤကျိဖးဒိၣ်(၁၈၅)ဖျၢၣ်ဒီးဒြိ(၁)ဖျၢၣ်ဆူ လၢၫ်ဒိၣ်ကီၫ်ဆၣ်ဟီၣ်က၀ီၤပူၤအဃိ လီၫ်က၀ီၤကမျၢၫ်သံ၀ဲ(၈)ဂၤ, ဘၣ်ဒိ(၅)ဂၤ, ဟံၣ်ဟးဂီၤကွံာ်(၄)ဖျၢၣ်ဒီး ကျီၫ်(၂)ဒုဘၣ်ဒိ၀ဲအဂ့ၫ် တၢ်သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
