လါယူၤလံ ၁၈သီ, ၂၀၂၄နံၣ်
တၢ်သူ၀ဲကီၢ်ပယီၤခီကီၢ်ပှၤမၤတၢ်ဖိ(၅၀)ဘျဲၣ် အBank Account(၁၀၀)ဘျဲၣ်၀ံၤ စ့ယိၤအကကွဲၢ်(၃)ကထိအိၣ် အီၣ်လဲတၢ်လံၣ်တၢ်လီတၢ်ဖံးတၢ်မၤလၢလဲၤသရံးသးတဖၣ် ကၠီၣ်တဲၣ်ပၢၤကီၢ်မၤဖျါထီၣ်၀ဲအဂ့ၢ် ဖဲလါယူၤလံ(၁၂)သီအနံၤန့ၣ် Bangkok Postတၢ်ကစီၣ်သန့ပၥ်ဖျါဃၣ်၀ဲန့ၣ်လီၤ.
တၢ်သူ၀ဲ Bank Accountတဖၣ်၀ံၤ အီၣ်လဲဒီးတၢ်လံၣ်အီၣ်လီအီၣ်တၢ်မူၤတၢ်ရၤတဖၣ် ကၠီၣ်တဲၣ်ပၢၤကီၢ်ဖီၣ်န့ၢ်အီၤ ဖဲအယိးတယး, နိၣ်ထးဘူၣ်ရံၣ်, နခိၣ်ပထိၣ်,ပထိၣ်ထၣ်နံၣ်ဟီၣ်က၀ီၤပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအ့ဖြ့ၣ်အတီၢ်ပူၤ တၢ်ထံၣ်န့ၢ်၀ဲကီၢ်ပယီၤပှၤမၤတၢ်ဖိ Accountတခါလၢ ဘၣ်ထွဲဒီးအီၣ်လဲကဲအဖီခိၣ် လဲၤထုးထီၣ်ယိၤစ့အကလီၤ(၂၀)၀ံၤအလီၢ်ခံ ကၠီၣ်တဲၣ်ပဒိၣ်အံၤ ဖဲလါမ့ၤ(၂၇)သီအနံၤန့ၣ် စးထီၣ်သမံသမိး၀ဲ Bank Accountခဲလၢၥ်ပၥ်ဖှိၣ်(၁၀၆)ကကွဲၢ်အဖီခိၣ် မၤဖျါထီၣ်၀ဲန့ၣ်လီၤ.
ကီၢ်ပယီၤပှၤမၤတၢ်ဖိလၢတၢ်လံၣ်အီၤသူန့ၢ်BankAccountတဖၣ်အကျါ ပှၤလၢဟဲမၤတၢ်လၢထံကီၢ်(၂)ဘ့ၣ်တၢ်အၢၣ်လီၤ(MoU)သနူတဖၣ်စ့ၢ်ကီးပၥ်ဃုၥ်၀ဲ၀ံၤ ဖဲလၢအ၀ဲသ့ၣ်ဟဲတုၤ၀ဲလၢကီၢ်ကၠီၣ်တဲၣ်အဆၢကတီၢ် ဖဲလၢအအိးထီၣ်၀ဲBankစရီပူၤ တနၢ်ပၢၢ်၀ဲအကျိၤအကျဲၤတဖၣ်ဂ့ၤဂ့ၤဘၣ်အဃိ ခီပနံၥ်ခၢၣ်စးတဖၣ်တဲလီၤ၀ဲအဖီခိၣ်ဘၣ်မၤထွဲ၀ဲဒီးတနီၤန့ၣ်ဟံးတ့ၢ်၀ဲပှၤမၤတၢ်ဖိ Bank Accountအဂ့ၢ် တၢ်သ့ၣ်ညါဘၣ်န့ၣ်လီၤ.
Bank Accountတဖၣ်လၢ တၢ်လံၣ်သူန့ၢ်အီၤတဖၣ်အပူၤ စ့နုၥ်လီၤဟးထီၣ်အါ၀ဲ, တၢ်ပၥ်ဖှိၣ်စ့နီၢ်ဂံၢ်နီၢ်ဒွးအါ၀ဲအဃိ ပှၤဘၣ်မူဘၣ်ဒါတဖၣ် ဖီၣ်န့ၢ်၀ဲကီၢ်ပယီၤပှၤမၤတၢ်ဖိလၢအမ့ၢ် Bank Accountအကစၢ်တဖၣ်အဃိ ပှၤကီၢ်ပယီၤဖိလၢတၢ်ပၥ်လီၤအီၤလၢဃိၣ်ပူၤအိၣ်၀ဲအသိး ပှၤလၢဃ့ၢ်ပူၤဖျဲးသးတဖၣ်စ့ၢ်ကီးအိၣ်၀ဲအဂ့ၢ် ပၥ်ဖျါဃၣ်၀ဲန့ၣ်လီၤ.
ကၠီၣ်တဲၣ်ကိတိၥ်ခိၣ်ကျၢၢ် ဆဲးထၣ်သၣ်ဘံၣ်ဆ့ၣ်ပၢတၢ်အစိၤ တၢ်ပၥ်လီၤဃၣ်၀ဲလၢ တၢ်ကဒုးလီၤပှီၢ်ကွံၥ်ဆဲၣ်ဘၣ်ကွီၢ်မ့ၣ်တၢ်တိၥ်ကျၢၤ အက့ၢ်အဂီၤတခါလၢ Save Foreign Workersလၢအမ့ၢ် တၢ်ကဒီသဒၢန့ၢ် ကီၢ်ချၢပှၤမၤတၢ်ဖိတၢ်ဟူးတၢ်ဂဲၤအဖီခိၣ် တၢ်မၤဖျါထီၣ်၀ဲအီၣ်လဲကျိၥ်စ့တၢ်လံၣ်တၢ်လီတၢ်မူၤတၢ်ရၤအဂ့ၢ် တၢ်သ့ၣ်ညါဘၣ်န့ၣ်လီၤ.
