ကီၢ်ပယီၤထံလီၢ်ကီၢ်ပူၤတၢ်ဒုးတၢ်ယၤအဃိ ကီၢ်ဆၢတၢ်ကူၤလဲၤမၤကၤကျဲတဖၣ် ဆီတလဲ

လါယူၤလံ ၁၈သီ, ၂၀၂၄နံၣ်

လၢကီၢ်ပယီၤပူၤတၢ်ဒုးတၢ်ယၤတဖၣ်အဃိ ကၠီၣ်တဲၣ်-ပယီၤကီၢ်ဆၢတၢ်ကူၤလဲၤမၤကၤအပူၤ သူ၀ဲကျဲလၢတၢ်ဘၣ်လဲၤ၀ဲဒၣ်လၢယနီ(ရနောင်း)ဒီးတဆီဘၣ်ခီ၀ဲပီၢ်လဲၣ်နံၤ ကဘီသန့ၤတဖၣ်အဃိ ကၠီၣ်တဲၣ်ပဒိၣ်အကျဲဒီးတိၤတၢ်သူၣ်ထီၣ်တၢ်တိၥ်ကျၢၤအဂီၢ် တၢ်ဘၣ်ဘျူးအိၣ်၀ဲအဂ့ၢ်န့ၣ် ကၠီၣ်တဲၣ်၀ံစိၥ်တီဆှၢကိတိၥ်ခိၣ်(ခံ) Manaporn Charoensriတဲလီၤ၀ဲန့ၣ် Bangkok Post ကွဲးဖျါဃၣ်၀ဲန့ၣ်လီၤ.

ကီၢ်ပယီၤပူၤစုက၀ဲၤတၢ်သဘံၣ်သဘုၣ်တဖၣ်အဃိ တၢ်၀ံစိၥ်တီဆှၢတၢ်ဖိတၢ်လံၤလၢ ခိခိၣ်ကျဲအဖီခိၣ်အိၣ်ပတုၥ်သးလံအဂ့ၢ် ကိတိၥ်ခိၣ်(ခံ)Manapornတဲ၀ဲန့ၣ်လီၤ. မဲဆီးကီၢ်ရ့ၣ်, Takခိကျဲအလီၢ် တၢ်သူ၀ဲယနီ(ရနောင်း)ကဘီသန့ၤဒီး တၢ်၀ံစိၥ်တီဆှၢတၢ်ဖိတၢ်လံၤလၢကဘီတဖၣ်၀ံၤ တလါအံၤအတီၢ်ပူၤန့ၣ် ကိၣ်တ့ၣ်နၣ်(၃၉)ခိၣ်လၢအိၣ်ဟးထီၣ်၀ဲဒၣ်ဖဲ ၀့ၢ်တကူၣ်အံၤဟဲတုၤ၀ဲအဂ့ၢ် ကၠီၣ်တဲၣ်ပှၤဘၣ်မူဘၣ်ဒါတဖၣ်တဲ၀ဲန့ၣ်လီၤ.

တကတီၢ်ဃီ တရူး-ပယီၤကီၢ်ဆၢတၢ်ကူၤလဲၤမၤကၤတခီ သုးကီၣ်ကးတပၤဂုၥ်ကျဲးစၢးအိးထီၣ်က့ၤ၀ဲ ဖဲယိၤဒိၣ်ကီၢ်စဲၣ်မုၢ်ထီၣ်တပၤ တၣ်ခၠံၣ်လ့း၀့ၢ်အဂ့ၢ်န့ၣ် ပှၤကူၤလဲၤမၤကၤတၢ်ဖိဒီးတၢ်မၤကစၢ်တဖၣ်တဲ၀ဲန့ၣ်လီၤ.

ယိၤဒိၣ်ကီၢ်စဲၣ်ကလံၤစိးတပၤ တရူး-ပယီၤကီၢ်ဆၢတၢ်ကူၤလဲၤမၤကၤဟီၣ်က၀ီၤအံၤ ကလံၤစိးသိၣ်မှံကရၢတဖၣ် ပၢဆှၢက့ၤ၀ဲ၀ံၤအလီၢ်ခံ သုးကီၣ်ကးတပၤ ဂုၥ်ကျဲစၢးအိးထီၣ်က့ၤ၀ဲတၢ်ကူၤလဲၤမၤကၤကျဲလၢ ၀့ၢ်တၣ်ခၠံၣ်လ့းတပၤန့ၣ်လီၤ.

ဖဲအပူၤကွံၥ်စှၤသီအတီၢ်ပူၤန့ၣ် သုးကီၣ်ကးမုၥ်ကျိၤ၀ဲၤကွၢ်ဒီးတၢ်ကူၤလဲၤမၤကၤ၀ဲၤကျိၤပှၤဘၣ်မူဘၣ်ဒါတဖၣ် ဟဲတုၤ၀ဲဖဲ၀့ၢ်တၣ်ခၠံၣ်လ့း၀ံၤတၢၣ်ပီၣ်တဲသကိးတၢ်ဒီးတရူးဘၣ်ထွဲတၢ်ကူၤလဲၤမၤကၤအဂ့ၢ် ကီၢ်ဆၢပှၤကူၤလဲၤမၤကၤဖိတဖၣ်တဲ၀ဲန့ၣ်လီၤ. တရူး-ပယီၤကီၢ်ဆၢ တၢ်ကူၤလဲၤမၤကၤအံၤ တနံၣ်န့ၣ် ဒိးန့ၢ်ဘၣ်၀ဲ အမဲရကၤစ့ဒီလၣ်(၄)ဘံၣ်လံၣ်ယၣ်ဘျဲၣ်အဂ့ၢ် တၢ်တယၣ်၀ဲန့ၣ်လီၤ.

Ref: VOA