လါယူၤလံ ၁၇သီ, ၂၀၂၄နံၣ်
ကီၢ်ပယီၤဒီတဘ့ၣ်အပူၤ သုးကီၣ်ကးအတၢ်မၤအၢမၤသီတဖၣ် ကပတုၥ်ကွံၥ်တဘျီဃီအဂီၢ် အမဲရကၤ, ယူၣ်က့ၣ်ဒီယူရပၤပၥ်ဃုၥ်ထံကီၢ်(၃၇)ဘ့ၣ် ဃ့ထီၣ်၀ဲန့ၣ်လီၤ.
သုးကီၣ်ကးအံၤတ့ၢ်လီၤမ့ၣ်ပိၢ်ဆူကမျၢၢ်အိၣ်ဆိးလီၢ်ကျဲတဖၣ်,ဒွဲၣ်အူကွံၥ်ဟံၣ်ဃီတၢ်သူၣ်ထီၣ်တဖၣ်,သူ၀ဲကမျၢၢ်ဒ်ကမျၢၢ်တၢ်ဒီသဒၢတဖၣ် ဒီးထၢန့ၢ်ဆူၣ်သုးတဖၣ်အဖီခိၣ်ထံကီၢ်(၃၇)ဘ့ၣ်ဘီမုၢ်စၢဖှိၣ်ကရၢဘၣ်ထွဲထီဘိခၢၣ်စးတဖၣ် ဃ့ထီၣ်၀ဲဖဲလါယူၤ(၁၅)သီအနံၤန့ၣ်လီၤ.
လၢကီၢ်ပယီၤပူၤတၢ်မၤအၢမၤသီတၢ်သဘံၣ်သဘုၣ်တဖၣ်ဟဲဒိၣ်ထီၣ်၀ံၤ ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်စ့ၢ်ကီး ဟဲဃံးထီၣ်စ့ၢ်ထီၣ်အဖီခိၣ် ဘၣ်ယိၣ်၀ဲအဂ့ၢ် လံၥ်ဘိးဘၣ်ပၥ်ဖျါအပူၤစံး၀ဲန့ၣ်လီၤ.
ကလုၥ်ဒူၣ်ဟီၣ်က၀ီၤတဖၣ်အပူၤတၢ်ထၢန့ၢ်ဆူၣ်ဖိသၣ်တဖၣ်ဒ်ပှၤသုးဖိအသိးန့ၣ် ဒုးကဲထီၣ်အါထီၣ်၀ဲကလုၥ်ဒူၣ်တၢ်သဘံၣ်သဘုၣ်အသိး၀ံၤ ပှၤဟီၣ်ခိၣ်ဖိတၢ်ဒိသူၣ်ဒိသးတၢ်အိၣ်သးတဖၣ်အၢထီၣ်သ့အဃိ တၢ်လီၤဘၣ်ယိၣ်အိၣ်၀ဲအဂ့ၢ်တဲ၀ဲန့ၣ်လီၤ.
ကီၢ်ပယီၤသုးမုၢ်ဒိၣ်အံၤလီၤဆီဒၣ်တၢ် တကွၢ်၀ဲကမျၢၢ်ဒီးကမျၢၢ်စုလီၢ်ခီၣ်ခိၣ်တဖၣ်ဘၣ်အမဲၥ်ညါ လဲၤတ့ၢ်လီၤလၢမ့ၣ်ပိၢ်တဖၣ်,ဒွဲၣ်အူမၤဟးဂီၤကွံၥ်ကမျၢၢ်ဟံၣ်ဃီတၢ်သူၣ်ထီၣ်တဖၣ်,ပညိၣ်ဒုး၀ဲပှၤလၢအမၤစၢၤပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်ဒီးတၢ်ဖံးတၢ်မၤတဖၣ်,တၢ်ကးတံၥ်ဃၣ်ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်အံၤန့ၣ်တူၢ်လိၥ်၀ဲတသ့ဘၣ်အဂ့ၢ် ဘီမုၢ်စၢဖှိၣ်ကရၢဘၣ်ထွဲထီဘိခၢၣ်စးတဖၣ်ဟ့ၣ်ပလီၢ်ဃၣ်၀ဲန့ၣ်လီၤ.
၂၀၂၁နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ပှၤလၢအလိၣ်ဘၣ်ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤ အိၣ်ထီၣ်တုၤ(၁၈.၆)ကကွဲၢ်န့ၣ်လီၤ. ပှၤလၢလဲၤအိၣ်ကဒုဖဲ ထံကီၢ်လၢအဘူးလိၥ်သးဒီးကီၢ်ပယီၤတဖၣ်အပူၤ အိၣ်ထီၣ်တုၤ(၆၆,၀၀၀)ပၥ်ဃုၥ် ပှၤ(၂.၉)ကကွဲၢ်အံၤဘၣ်ကဲထီၣ်၀ဲဒ်ပှၤဟံၣ်တအိၣ်ဃီတအိၣ်အသိး ပှၤမိၣ်စ့လ့ၣ်ဘၣ်ကီဘၣ်ခဲဖိစ့ၢ်ကီးဟဲအါထီၣ်၀ဲ(၁)ကကွဲၢ်ဘျဲၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ပိၥ်မုၣ်တဖၣ်,ဖိသၣ်တဖၣ်,ကလုၥ်ဒူၣ်တဖၣ်ဒီးကလုၥ်ဒူၣ်ဆံးတဖၣ်ပၥ်ဃုၥ် ပှၤလၢအလိၣ်ဘၣ်ပှၤဟီၣ်ခိၣ်တၢ်ဒိသူၣ်ဒိသးတၢ်မၤစၢၤတဖၣ်အဂီၢ် တၢ်ကမၤစၢၤန့ၢ်အလၢအပှဲၤ,အဆိအချ့,လၢတၢ်ဘံၣ်တၢ်ဘၢအပူၤ၀ံၤတၢ်တြီမၤတံၥ်တၢ်သူတအိၣ်တဂ့ၤအဂီၢ် ထံကီၢ်(၃၇)ဘ့ၣ်ဃ့ထီၣ်ဃၣ်၀ဲန့ၣ်လီၤ.
သုးကီၣ်ကးဒီးပှၤလၢဘၣ်ထွဲတဖၣ်ခဲလၢၥ်အံၤတၢ်ကလူၤပိၥ်မၤထွဲဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိတၢ်ဒိသူၣ်ဒိသးဘၣ်ထွဲတၢ်ဘျၢသဲစးတဖၣ်ဒီး ပှၤဟီၣ်ခိၣ်ဖိခွဲးယၥ်တၢ်ဘျၢသဲစးတဖၣ်အဂီၢ်, တၢ်ကဒီသဒၢန့ၢ်ကမျၢၢ်တဖၣ်အဂီၢ် ဒီး တၢ်ကမၤဖျါထီၣ် ဘီမုၢ်စၢဖှိၣ်ကရၢတၢ်ဆဲတဲၥ် ၂၆၆၉ အဂီၢ်စ့ၢ်ကီး မီၢ်သီတဖၣ် ထုးထီၣ်သဃဲၤဃ့ထီၣ်ဃၣ်၀ဲန့ၣ်လီၤ.
