လါယူၤလံ ၁၈သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, ကီၫ်ဆၣ်မူဟီၣ်က၀ီၤအပူၤ ပှၤဃ့ၫ်သုးပှၤလီၫ်အိၣ်ကမှံဖိသၣ်ပာ်ဃုာ် တၫ်ဟၢပၢလူတၫ်ဆါ,ဘ့ၣ်ခိၣ်သးတၫ်ဆါဒီးကွၫ်ဆၢၣ်မဲာ်ဘၣ် ကသံၣ်ကသီတအိၣ်လၢၤ ဘၣ်အဂ့ၫ် ပှၤလၢမၤစၢၤပှၤလီၫ်အိၣ်ကမှံဖိတဖၣ်တဲ၀ဲန့ၣ်လီၤ.၀့ၫ်မူအပူၤသ၀ီတဖၣ် သုးကီၣ်ကးအသုး ခမရ-၄၃၉ဒီး ခမရ-၃၀၇ သုးရ့ၣ်တဖၣ် ခးစိဃီၤကျိဖးဒိၣ်ကိးမုၫ်နံၤဃၣ်ဃၣ်အဃိ လီၫ်က၀ီၤကမျၢၫ်တဖၣ်ဘၣ်ဃ့ၫ်ပူၤဖျဲးသးလီၤ.
ပှၤဃ့ၫ်သုးပှၤလီၫ်အိၣ်ကမှံတဖၣ် တၫ်စူၤအကတီၫ် အီဘၣ်ထံလၢတကဆှီတဖၣ်အဃိ, တၫ်ဟၢဖၢလူတၫ်ဆါ, ပစိၤအ့ၣ်အဃိ ဖံးဘ့ၣ်တၫ်ဆါကဲထီၣ်၀ဲအဂ့ၫ် ပှၤမၤစၢၤပှၤလီၫ်အိၣ်ကမှံဖိတဂၤတဲ၀ဲလီၤ.
“မူခိၣ်စူၤကတီၫ်တမ့ၫ်ထဲဟၢဖၢလူတၫ်ဆါဘၣ်,ဖိသၣ်သးပှၫ်တၫ်ဘ့ၣ်ခိၣ်သးတၫ်ဆါကဲထီၣ်လီၤ.ဖဲအ၀ဲသ့ၣ်အိၣ်ကဒုအလီၫ်ထံတကဆှီဘၣ်,ပစိၤစ့ၫ်ကီးအိၣ်၀ဲလီၤ.မ့မ့ၫ်ပှၤလၢဃ့ၫ်အိၣ်ကဒုလၢသ၀ီတဖၣ်အပူၤတခီကိညၣ်၀ဲတစဲးအဂ့ၫ် “တဲ၀ဲလီၤ.
ပှၤလီၫ်အိၣ်ကမှံဖိအိၣ်တၫ်လီၫ် လၢတၫ်ဆါကဲထီၣ်န့ၣ် ကျဲမုၫ်ကျဲဘိတၫ်ဆဲးကျိးကီခဲ,သုးကီၣ်ကးအသုးကလၢၤတဖၣ် တဟ့ၣ်တၫ်ပျဲလၢတၫ်ကစိာ်ဆှၢကသံၣ်ကသီတဖၣ်အဃိ တၫ်ကွၫ်ဆၢၣ်မဲာ်ဘၣ်ကသံၣ်ကသီတအိၣ်ဘၣ်လီၤ.
ပှၤမၤစၢၤပှၤလီၫ်အိၣ်ကမှံဖိတဂၤတဲ၀ဲလၢ”ကသံၣ်ကသီတၫ်ဂ့ၫ်ကီအိၣ်၀ဲလီၤ.တၫ်မ့ၫ်လဲၤထီၣ်ဆူ ဖၠူဒီးကညိးကွ့ တကပၤန့ၣ် (၄၃၉)သုးကလၢၤအိၣ်အဃိ ဟုသးဒၣ်လဲၣ် တၫ်ဘၣ်ပာ်ခူသူၣ်ဒီးစိာ်ဆှၢ၀ဲန့ၣ်လီၤ.မ့မ့ၫ်ကသံၣ်ကသီဒု မ့ၫ်ထံၣ်၀ဲန့ၣ် တန့ၫ်ဘၣ်.တနီၤဒုတၫ်ဘၣ်ပာ်ခူသူၣ်ဒီးစိာ်ဆှၢခီ၀ဲအဂ့ၫ်”တဲ၀ဲလီၤ.
ဖဲလါယူၤလံ(၈)သီအနံၤ, ကီၫ်ဆၣ်လၢၫ်ဒိၣ်အပူၤသ၀ီတဖၣ်အပူၤ သုးကီၣ်ကးအသုးလၢအိၣ်ဆီလီၤအသးဖဲ ပ့စလိး ခမရ-၂၆၄ ဒီး ခမရ-၄၃၇ အသုးတဖၣ် ဖးလီၤမစဲးဒြိတဖၣ်, ကျိဖးဒိၣ်တဖၣ်ဒီးတ့ၫ်လီၤမ့ၣ်ပိၫ်လၢဒြိတဖၣ်အဃိ လီၫ်က၀ီၤကမျၢၫ်(၂)ဂၤ ဘၣ်သံဖဲအလီၫ်တဘျီဃီ၀ံၤ အမျၢၫ်အိၣ်ဟံၣ်တစှၤန့ၣ်(၄)ဖျၢၣ် ဘၣ်ဟးဂီၤ၀ဲအဂ့ၫ် ခ့ၣ်အဲၣ်ယူၣ်-လီၢ်ခၢၣ်သး ဘိးဘၣ်ပာ်ဖျါ၀ဲလီၤ.
သုးကီၣ်ကးခးလီၤကျိဖးဒိၣ်ကိးမုၫ်နံၤဃၣ်ဃၣ်, ကွၫ်ဟုၣ်တၫ်လၢဒြိအမဲာ်ညါ ကျဲတၫ်ဆဲးကျိးတဖၣ်အဃိ ဖိသၣ်သးပှၫ် လၢတၫ်ဆါကဲထီၣ် အနီၫ်ဂံၫ်နီၫ်ဒွး တၫ်မၤလီၤတံၫ်တန့ၫ်ဒံးဘၣ်အဂ့ၫ် ပှၤမၤစၢၤပှၤလီၫ်အိၣ်ကမှံဖိတဖၣ်တဲ၀ဲလီၤ.
ကညီဆူၣ်ချ့မၤစၢၤ၀ဲၤကျိၤ နဲၣ်ရွဲၣ်သဃဲၤ စီၤစကဲ(စောစကိုင်း)တဲ၀ဲလၢ “ဖဲအပူၤကွံာ်နွံန့ၣ် ဆှၢလီၤကသံၣ်ကသီ အိၣ်၀ဲလီၤ.ကီၫ်ရ့ၣ် ဂ့ၫ်ဂီၫ်အူကသူ၀ဲအဂီၫ် လီၤဂာ်လၢတုၤလၢကီၫ်ရ့ၣ်ပူၤလံ.ပှၤလီၫ်အိၣ်ကမှံဖိ ဆူၣ်ချ့တၫ်ကဟု ကယာ်တဖၣ်ဒိးန့ၫ်၀ဲလံဧါ,တဒိးန့ၫ်ဘၣ်၀ဲဒံးဧါန့ၣ် ပကဘၣ်သံကွၫ်ကဒါအဂ့ၫ်” တဲ၀ဲလီၤ.
ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ စးထီၣ်လၢသုးဟံးန့ၫ်ဆူၣ်ထံကီၫ်တၫ်စိတၫ်ကမီၤလံၤလံၤ ၂၀၂၄နံၣ်, တုၤလါအ့ဖြ့ၣ်အပူၤ ပှၤဘၣ်ပာ်တ့ၫ်ဟံၣ်ဃီဃ့ၫ်ပူၤဖျဲးသး အိၣ်၀ဲ(၄)ကလီၫ်ဂၤဘျဲၣ်၀ံၤ ပှၤလီၫ်အိၣ်ကမှံဖိတဖၣ် လိၣ်ဘၣ်တၫ်အီၣ်တၫ်အီဒီး ကသံၣ်ကသီတဖၣ်အဂ့ၫ် ပှၤမၤစၢၤတၫ်တဖၣ်တဲ၀ဲလီၤ.
Ref: DVB
