လါယူၤလံ ၁၃သီ, ၂၀၂၄နံၣ်
၂၀၂၄နံၣ်, စးထီၣ်လၢလါယနူၤအါရံၤဒီးတုၤလါယူၤ, (၆)လါအတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးမီၤစိရိၤသုးကီၣ်ကးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A),ကညီဒီကလုၥ်ဂၢၤသးကရၢ(K.N.D.O),တၢ်ပၢၢ်ဆၢသုးပၥ်ဖှိၣ်တဖၣ်အဘၢၣ်စၢၤ တၢ်ဒုးအဒိၣ်အဆံးကဲထီၣ်တ့ၢ်သးခဲလၢၥ်ပၥ်ဖှိၣ်(၁၈၂၇)ဃၣ်ဃၣ်၀ံၤ သုးကီၣ်ကးတပၤသံ၀ဲဘူးထီၣ်(၂)ကထိဃၣ်ဃၣ်၀ံၤ ဘၣ်ဒိ၀ဲ(၁၂၀၀)ဘျဲၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲဖဲလါယူၤလံ(၁၂)သီအနံၤန့ၣ်လီၤ.
လၢတၢ်ဒုးတဖၣ်အပူၤ (K.N.L.A), (K.N.D.O) ဒီးတၢ်ပၢၢ်ဆၢသုးပၥ်ဖှိၣ်တပၤစ့ၢ်ကီး ဟ့ၣ်လီၤကွံၥ်အသးသမူ(၈၁)ဂၤ၀ံၤ (၂၉၈)ဂၤဃၣ်ဃၣ်ဘၣ်ဒိ၀ဲအဂ့ၢ် ပၥ်ဖျါဃၣ်၀ဲန့ၣ်လီၤ.
တၢ်ဒုးတဖၣ်အံၤကဲထီၣ်တ့ၢ်အသး ဖဲကီၢ်သူလ့ၤတၢ်ပၢဟီၣ်က၀ီၤတဖၣ်လၢအမ့ၢ် ကီၢ်ရ့ၣ်ဒူသထူၣ်ဟီၣ်က၀ီၤပူၤ(၁၇၇)ဘျီ, ကီၢ်ရ့ၣ်တီအူဟီၣ်က၀ီၤပူၤ(၂၆၄)ဘျီ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ(၄၃၃)ဘျီ, ကီၢ်ရ့ၣ်ဘျံး-ဒ၀ဲၢ်ဟီၣ်က၀ီၤပူၤ(၆၇)ဘျီ, ကီၢ်ရ့ၣ်မုၢ်တြီၢ်ဟီၣ်က၀ီၤပူၤ(၄၅၁)ဘျီ, ကီၢ်ရ့ၣ်ဒူပျၥ်ယၥ်ဟီၣ်က၀ီၤပူၤ(၂၈၅)ဘျီ ဒီးကီၢ်ရ့ၣ်ဖၣ်အၣ်ဟီၣ်က၀ီၤပူၤ(၁၅၀)ဘျီခဲလၢၥ်ပၥ်ဖှိၣ်(၁၈၂၇)ဘျီန့ၣ်လီၤ.
(၆)လါအတီၢ်ပူၤ သုးကီၣ်ကးတပၤမၤကမၣ်၀ဲပှၤဟီၣ်ခိၣ်ဖိခွဲးယၥ်အကလုၥ်ကလုၥ်လၢ ကီၢ်သူလ့ၤတၢ်ပၢဟီၣ်က၀ီၤပူၤ ခဲလၢၥ်ပၥ်ဖှိၣ်(၂၃၀၃)ဘျီန့ၣ်လီၤ. ခီဖျိလၢသုးကီၣ်ကးမၤကမၣ်ပှၤဟီၣ်ခိၣ်ဖိခွဲးယၥ်အကလုၥ်ကလုၥ်အဃိ လီၢ်က၀ီၤကမျၢၢ်ဖိသံ၀ဲ(၁၃၄)ဂၤ, ဘၣ်ဒိ(၄၃၉)ဂၤ, ကမျၢၢ်အိၣ်ဟံၣ်ဃီတၢ်သူၣ်ထီၣ်ခဲလၢၥ်ပၥ်ဖှိၣ်(၁,၁၀၃)ဖျၢၣ်,တၢ်ဖီၣ်န့ၢ်ဆူၣ်အီၤ(၉၆)ဂၤပၥ်ဃုၥ် တၢ်မၤကမၣ်ပှၤဟီၣ်ခိၣ်ဖိခွဲးယၥ်တဖၣ်အိၣ်ထီၣ်၀ဲကိးမုၢ်နံၤဃၣ်ဃၣ်အဃိ လီၢ်က၀ီၤကမျၢၢ်တၢ်အိၣ်ဆိးလီၢ်ကျဲတၢ်သူၣ်ထီၣ်တဖၣ်, တၢ်ဖံးအီၣ်မၤအီၣ်လီၢ်ကျဲ, တၢ်ဆါဟံၣ်တဖၣ်ဒီး ကမျၢၢ်စုလီၢ်ခီၣ်ခိၣ်တၢ်အိၣ်ယၢၤတၢ်ဖိတၢ်လံၤတဖၣ် ဟးဂုၤဟးဂီၤကွံၥ်၀ဲအါအါဂီၢ်ဂီၢ်န့ၣ်လီၤ.
လၢန့ၣ်အမဲၥ်ညါခီဖျိလၢသုးကီၣ်ကးမၤကမၣ်ပှၤဟီၣ်ခိၣ်ဖိခွဲးယၥ်တဖၣ်အဃိကီၢ်သူလ့ၤတၢ်ပၢဟီၣ်က၀ီၤကီၢ်ရ့ၣ်(၇)ဘ့ၣ်အပူၤ ထံလီၢ်ကီၢ်ပူၤပှၤလီၢ်အိၣ်ကမှံအိၣ်ထီၣ်၀ဲ(၁.၂)ကကွဲၢ်ဘျဲၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
