လါယူၤလံ ၁၀ သီ ၂၀၂၄ နံၣ်
ဖဲ ၂၀၂၄ နံၣ် လါယူၤလံ၁၀သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ရဲၣ်ကျဲၤမၤ၀ဲတၢ်ဘိးဘၣ်ရၤလီၤဒုးသ့ၣ်ညါ ဘၣ်ထွဲဒီးတၢ်ဒုးအိၣ်ထီၣ်၀ဲ ကီၢ်သူလ့ၤယူးနံၣ်ကိး(Kawthoolei Unicode) အဂ့ၢ်အကျိၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီခိၣ်ရိၣ်မဲဒီးရဲၣ်ကျဲၤဒုးအိၣ်ထီၣ်၀ဲ ကီၢ်သူလ့ၤယူးနံးကိးအံၤအတၢ်ပညိၣ်မ့ၢ် ဒ်သိး ၀ဲၤကျိၤ၀ဲၤဒ့တဖၣ်, ကညီတ၀ၢတၢ်ကရၢကရိတဖၣ်ဒီး ကညီကလုၥ်ကဒဲကဒဲအဘၢၣ်စၢၤ တၢ်ဆဲးကျိးဆဲးကျၢလိၥ်သးလၢအီၣ်လဲ(online)ပူၤ ကသ့ဂ့ၤထီၣ်အဂီၢ်ဒီးတၢ်ဒိလံၥ်လဲၢ်လၢကညီကျိၥ် အက့ၢ်အဂီၤကဒ်သိးလိၥ်သးအဂီၢ် တကးဒံးဘၣ်လၢ အီၣ်လဲအဖီခိၣ်တၢ်စိးကါသူ၀ဲ ကညီကျိၥ်ကသ့ဘၣ်လီၢ်ဘၣ်စးအါထီၣ်အဂီၢ်အဂ့ၢ်စံးဝဲန့ၣ်လီၤ.
တၢ်ဘိးဘၣ်ရၤလီၤကီၢ်သူလ့ၤယူၣ်နံၣ်ကိးတၢ်ရဲၣ်တၢ်ကျဲၤအပူၤ ခ့ၣ်အဲၣ်ယူၣ်-လီၢ်ခၢၣ်သးမုာ်ကျိၤဝဲၤကွာ်ၦၤဘၣ်မူဘၣ်ဒါစီၤဆၣ်ဒါတဲဝဲလၢ” ကီၢ်သူလ့ၤယူၣ်နံၣ်ကိးန့ၣ်တအိၣ်ဒံးဘၣ် ဘၣ်တွဲသူဃုာ်ဒီးယူၣ်နံၣ်ကိးအဂၤန့ၣ်လီၤ.အဃိတၢ််ဂ့ၢ်ကီအိၣ်လီၤ.အဒိတၢ်မ့ၢ်တီၣ်ထီၣ်လံာ်လၢဖ့းစဘိးလံာ်ကဘျံးပၤမ့ၢ်ဂ့ၤႇလၢ(Twitter)ပူၤမ့ၢ်ဂ့ၤန့ၣ်တၢ်ဂ့ၢ်ကီအိၣ်လီၤ.တနီၤဖျါထီၣ်တလိၤတဃီၤဘၣ်.အဃိပဖးအီၤတဘၣ်လီၢ်ဘၣ်စးဘၣ်အဃိ ကီၢ်သူလ့ၤယူၣ်နံၣ်ကိးကအိၣ်ထီၣ်ဝဲအဂီၢ်တၢ်ဂုာ်ကျဲးစၢမၤဝဲ”အဂ့ၢ်စံးဝဲန့ၣ်လီၤ.
တကးဒံးဘၣ် ကီၢ်သူလ့ၤယူးနံးကိၣ်အံၤ ဖဲတၢ်စိးကါသူ၀ဲ(Artificial Intelligence)လၢတၢ်ဃုတၢ်ဂ့ၢ်တၢ်ကျိၤ ကန့ၢ်အဂီၢ်ယ တၢ်ဃုန့ၢ်တၢ်ဂ့ၢ်တၢ်ကျိၤ လၢ (Google) ပူၤအဂီၢ်ယ တၢ်ကျိၥ်ထံ ကလုၥ်ဂၤအကျိၥ်ဆူ ကညီကျိၥ်ကန့ၢ်အဂီၢ် ဒီး ၦၥ်ယဲၤသန့(Website)အပူၤ တၢ်စိးကါသူ၀ဲကညီကျိၥ် ကသ့ကန့ၢ်ဂ့ၤဂ့ၤဘၣ်ဘၣ်အဂီၢ် တၢ်ဒုးအိၣ်ထီၣ်၀ဲ ကီၢ်သူလ့ၤယူးနံးကိၣ်အံၤန့ၣ်လီၤ.
လၢန့ၣ်အမဲၥ်ညါ လၢတကီၢ်ခါ တၢ်သူ၀ဲ(Computer)အစိၤအံၤ တၢ်သူ၀ဲကညီကျိၥ်ကအါထီၣ်အဂီၢ် ဒီး ကညီကျိၥ်အံၤ ကလဲၤထီၣ်လဲၤထီၣ်ဂုၤထီၣ်ပသီထီၣ်အဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဂုၥ်ကျဲးစၢးထဲးဂံၢ်ထဲးဘါ၀ဲသၦၢ်ၦၢ်ဒီး ဒ်သိးကလဲၤထီၣ်ဂုၤထီၣ်ပသီထီၣ်ဒိၣ်ထီၣ်အဂီၢ် တၢ်ကဂုၥ်ကျဲးစၢးအီၤကွ့ၢ်ကွ့ၢ်န့ၣ်လီၤ.
