လါယူၤလံ၁၂သီ, ၂၀၂၄နံၣ်
လါယူၤလံ(၉)သီဒီး(၁၀)သီအနံၤ,ခံသီကတီၢ်ပလီၢ်ကီၢ်ဆၣ်(ပုလောမြို့နယ်),ယဲၢ်မံၤလၤသ၀ီပူၤသုးကီၣ်ကးဒီးတၢ်ပၢၢ်ဆၢသိၣ်မှံကရၢသုးပၥ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်သး၀ံၤ သုးကီၣ်ကးတပၤသုးခိၣ်ဒိၣ်စိ(၁)ဂၤပၥ်ဃုၥ် အပှၤသုးဖိ(၅)ဂၤသံ၀ဲ၀ံၤ သုးစကီၤ(၂)ဂၤစ့ၢ်ကီးတၢ်ဖီၣ်န့ၢ်မူဒံးအိၣ်၀ဲအသိး တၢ်ပၢၢ်ဆၢသုးတပၤစ့ၢ်ကီး သံ၀ဲ(၂)ဂၤအဂ့ၢ် တၢ်သ့ၣ်ညါဘၣ်လၢ ကမျၢၢ်တၢ်ဒီသဒၢသုးအအိၣ်န့ၣ်လီၤ.
လါယူၤ(၉)သီအနံၤ, မုၢ်ဃ့ၢ်လီၤ(၂)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအသုးအဂံၢ်အဘါ(၅၀)အိၣ်သုးကျိၤလၢ ဟဲထီၣ်ဖဲယဲၢ်မံၤလၤသ၀ီပူၤဒီးတၢ်ပၢၢ်ဆၢသိၣ်မှံကရၢသုးပၥ်ဖှိၣ်အဘၢၣ်စၢၤခံခီခံကပၤတၢ်ခးလိၥ်သးတဖၣ်ကဲထီၣ်၀ဲအဂ့ၢ် လီၢ်က၀ီၤတၢ်ပၢၢ်ဆၢသိၣ်ဒူတဖၣ်တဲ၀ဲန့ၣ်လီၤ.
“ပဒိးလီၤမ့ၣ်ပိၢ်အဆၢကတီၢ် က့ၤဘၣ်ဒၢးနီၢ်ကစၢ်မ့ၣ်ပိၢ်လီၤ. သံ၀ဲတဘျီဃီလီၤ.”အဂ့ၢ် ဘျံးကီၢ်ရ့ၣ်နီၣ်ဂံၢ်(၁)သုးရ့ၣ် ပှၤကတိၤတၢ်ပၢ တဲ၀ဲန့ၣ်လီၤ. တၢ်ဒုးကဲထီၣ်သး၀ံၤအလီၢ်ခံ သုးကီၣ်ကးအသုးတဖၣ် က့ၤအိၣ်ဆီလီၤအသးဖဲယဲၢ်မံၤလၤသ၀ီသီခါဖၠၣ်၀ံၤ ဖဲလါယူၤ(၁၀)သီအနံၤ, မုၢ်ထူၣ်(၁၂)နၣ်ရံၣ်ဃၣ်ဃၣ်န့ၣ်စီၤ တၢ်ဒုးကဲထီၣ်သးကဒီး၀ဲဒီး တၢ်ပၢၢ်ဆၢသိၣ်မှံကရၢသုးပၥ်ဖှိၣ်အဂ့ၢ် စံး၀ဲန့ၣ်လီၤ.
ခံဘျီတဘျီတၢ်ဒုးကဲထီၣ်သးအပူၤ ပလီၢ်၀့ၢ်အိၣ်သူၣ်လီၤ(ပုလောမြို့အခြေစိုက်) သုးကီၣ်ကးခီၣ်သုးရ့ၣ်(ခလရ-၂၈၅)သုးခိၣ်ဒိၣ်ဖိ(၁)ဂၤ, သုးစကီၤဒိၣ်(၁)ဂၤ, သုးစကီၤ(၂)ဂၤဒီးသုးစကီၤပြံၤ(၁)ဂၤသဲ၀ဲအသိး တၢ်ဖီၣ်န့ၢ်မူဒံးစ့ၢ်ကီး သုးစကီၤ(၂)ဂၤအဂ့ၢ် ဘျံးကီၢ်ရ့ၣ်နီၣ်ဂံၢ်(၁)သုးရ့ၣ် ထုးထီၣ်ပၥ်ဖျါဃၣ်၀ဲန့ၣ်လီၤ. တကးဒံးဘၣ် တၢ်မၤန့ၢ်စ့ၢ်ကီးသုးတၢ်ပီးတၢ်လီတဖၣ်, ဒီး ကျိချံပှၥ်သၣ်အါအါဂီၢ်ဂီၢ်အဂ့ၢ် လၢတၢ်ပၥ်ဖျါအပူၤ ပၥ်ဖျါဃၣ်၀ဲန့ၣ်လီၤ.
လၢတၢ်ဒုးတဖၣ်အပူၤကညီဒီကလုၥ်ဂၢၤသးကရၢ(KNDO),သုးရ့ၣ်(၇)သုးဒ့(၅),ပလီၢ်ကမျၢၢ်တၢ်ဒီသဒၢသုး,ဘျံးကီၢ်ရ့ၣ်နီၣ်ဂံၢ်(၁)သုးရ့ၣ်, ပလီၢ်လီၢ်က၀ီၤတၢ်ဒီသဒၢးသုး(PRDF) သိၣ်မှံကရၢသုးပၥ်ဖှိၣ်တဖၣ် က၀ီၤဒုး၀ဲအဂ့ၢ် တၢ်သ့ၣ်ညါဘၣ်လၢ တၢ်ထုးထီၣ်ပၥ်ဖျါအဖီခိၣ်န့ၣ်လီၤ.
ဘျံး-ဒ၀ဲၢ်သိလ့ၣ်ကျဲမုၢ်အဖီခိၣ်သ၀ီတဖၣ်လၢ ယဲၢ်မံၤလၤ, ဃုမံၤလၤ, နွံမံၤလၤသ၀ီဒီတကျိၤအဖီခိၣ် တၢ်ဒုးတဖၣ်ကဲထီၣ်သးခဲအံၤခဲအံၤအဃိ လီၢ်က၀ီၤဒူသ၀ီကမျၢၢ်တဖၣ် ဘၣ်ပၥ်တ့ၢ်ဟံၣ်ဃီဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ်တနွံအတီၢ်ပူၤစ့ၢ်ကီး ပလီၢ်အိၣ်သူၣ်လီၤ (ခလရ-၂၈၅)သုးရ့ၣ်,ပလီၢ်၀့ၢ်ပၢၤကီၢ်သုးကလၢၤ, ပလး၀့ၢ်(ပလမြို့)ပၢၤကီၢ်သုးကလၢၤဒီး သုးကီၣ်ကးတၢ်သမံသမိးတြဲၤတဖၣ် တၢ်လဲၤဒုးအီၤလၢ ဒြိအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: The Tanintharyi Times
