၈.၇.၂၀၂၄
ကညီကီၫ်စဲၣ်,လၢ၀့ၫ်ရၤမတံ အီၣ်လဲပှၤလီတၫ်ဖိကဲအပူၤ ပှၤမီၣ်ရကိၣ်ထံဖိကီၫ်ဖိလၢဘၣ်တၫ်မၢန့ၫ်ဆူၣ်အီၤ(၁၂)ဂၤ ဖဲလါယူၤလံ(၅)သီနံၤ တၫ်မၤပူၤဖျဲးထီၣ်အီၤန့ၫ်အဂ့ၫ် ကၠီၣ်တဲၣ်ပဒိၣ်ဘၣ်မူဘၣ်ဒါတဖၣ်တဲ၀ဲလီၤ.
အ၀ဲသ့ၣ်ခဲလၢာ်န့ၣ် ဘၣ်တၫ်မၢန့ၫ်ဆူၣ်အီၤလၢ ၀့ၫ်ရၤမတံတရူးထံဖိကီၫ်ဖိတဖၣ် အအီၣ်လဲတၫ်လံၣ်တၫ်လီကဲ တၫ်ဖံးတၫ်မၤအပူၤ၀ံၤ ကပူၤဖျဲးထီၣ်အဂီၫ် ကၠီၣ်တဲၣ်ဒီးမီၣ်ရကိၣ် မီၫ်သီ၀ဲၤဒၢးဘၣ်မူဘၣ်ဒါတဖၣ် မၤသကိး၀ဲအဂ့ၫ်တဲ၀ဲလီၤ.ပှၤမီၣ်ရကိၣ်ဖိလၢပူၤဖျဲးထီၣ်တဖၣ် ဘၣ်တၫ်မၤဆူးမၤဆါဃာ်အီၤ၀ံၤ အမဲာ်သၣ်ဒီးစုခီၣ်တဖၣ် တၫ်ထံၣ်ဘၣ်လၢ အိၣ်ဒီးတၫ်ဘၣ်ဒိဘၣ်ထံးအလီၫ်တဖၣ်အဂ့ၫ် ကၠီၣ်တဲၣ်သုးခိးကီၫ်ဆၢတဖၣ်ပာ်ဖျါ၀ဲလီၤ.
ပှၤမီၣ်ရကိၣ်ဖိခဲလၢာ်လၢတၫ်မၤပူၬဖျဲးထီၣ်အီၤတဖၣ် တၫ်ဆှၢအီၤဆူ၀့ၫ်မဲဆီး ပှၤကညီတၫ်နုာ်လီၤဟးထီၣ်၀ဲၤကျိၤအသိး,ဖဲန့ၣ်တဆီ တၫ်ဟ့ၣ်ခီဃီၤအီၤဆူ တၫ်ဂုၤထီၣ်ပသီထီၣ်ဒီးဘၣ်ထွဲတၫ်ဘံၣ်တၫ်ဘၢ တၫ်ကဟုကယာ်ကရၢအစုပူၤ၀ံၤ တၫ်ကူၣ်လဲၤမၤကၤအီၤဒီးတၫ်မၢန့ၫ်ဆူၣ်အီၤအိၣ်,တအိၣ် ဘၣ်တၫ်သမံသမိးကဒီးအီၤအဂ့ၫ်တဲ၀ဲလီၤ.
လၢကီၫ်ပယီၤတကပၤCyber တၫ်မၤကမၣ်ကွီၫ်မ့ၣ်တၫ်ဖံးတၫ်မၤအပူၤ ပှၤမီၣ်ရကိၣ်ဖိလၢဘၣ်တၫ်မၢန့ၫ်ဆူၣ်တဖၣ် အိၣ်၀ဲအဂၤ(၁၅၀)ဃၣ်ဃၣ်အဂ့ၫ် ကၠီၣ်တဲၣ်ဘျီၣ်ဒိၣ်ခၢၣ်စး နဲၣ်ရစီမၣ်တဲ၀ဲလီၤ.ပှၤမီၣ်ရကိၣ်ဖိတဖၣ် အိၣ်ကးတံာ်ကွံာ်အသးဖဲ၀့ၫ်ရၤမတံ အီၣ်လဲပှၤလီတၫ်ဖိကဲတဖၣ်အအိၣ် ဒ်သိးတၫ်မၤပူၤဖျဲးထီၣ်က့ၤအီၤကန့ၫ်အဂီၫ် အ၀ဲသ့ၣ်အထံကီၫ်လံာ်ခီကီၫ်(Passport)တၫ်ဂ့ၫ်တၫ်ကျိၤတဖၣ် ကၠီၣ်တဲၣ်မီၣ်ကိၣ်မီၫ်သီ၀ဲၤဒၢး ဟ့ၣ်ဃီၤအီၤအဃိ ပာ်ဖျါထီၣ်၀ဲဆူပှၤဘၣ်မူဘၣ်ဒါလၢဘၣ်ထွဲတဖၣ်၀ံၤ ကမၤပူၤဖျဲးထီၣ်၀ဲအဂီၫ် မၤထွဲ၀ဲအဂ့ၫ် ဘျီၣ်ဒိၣ်ခၢၣ်စးနဲၣ်ရစံၣ်မၣ်တဲ၀ဲလီၤ.
ကီၫ်ပယီၤပူၤ တရူးCall Center အိၣ်လဲပှၤလီတၫ်ဖိကဲတဖၣ်န့ၣ် မၤပျံၤမၤဖုးဟ့ၣ်တၫ်လီၤဘၣ်ယိၣ်လၢ ဟီၣ်ခိၣ်ဒီတဖျၢၣ်အဂ့ၫ်တဲ၀ဲလီၤ.ထံကီၫ်ပာ်ဖှိၣ်အဘ့ၣ်(၃၀)ဘျဲၣ်အပူၤ ပှၤတဖၣ်န့ၣ် ဘၣ်တၫ်ဆါလီၤအီၣ်အီၤလၢ အိၣ်လဲပှၤလီတၫ်ဖိကဲတဖၣ်အအိၣ်,တၫ်မၤဆူးမၤဆါအီၤတၫ်ဂ့ၫ်တၫ်ကျိၤတဖၣ်,ဒီးတၫ်မၤနီၣ်မၤဃါတဖၣ်န့ၣ် ပဒိၣ်တဖၣ်ဒီးထံဂုၤကီၫ်ဂၤတၫ်ကစီၣ်ပူၤ ဘၣ်တၫ်ပာ်ဖျါအီၤတလီၫ်လီၫ်လီၤ. ကီၫ်အ့ၣ်ဒံယါ,အ့ၣ်ဒိၣ်နံရှါ,ဘံၣ်ယဲးနၣ်ဒီး ယူၣ်ကၣ်ဒၣ်ထံကီၫ် ထံဖိကီၫ်ဖိတဖၣ်စ့ၫ်ကီး အ၀ဲသ့ၣ်အပဒိၣ်တဖၣ် ဘၣ်မၤပူၤဖျဲးထီၣ်အီၤအဂ့ၫ် တၫ်ကစီၣ်ပူၤ ပာ်ဖျါ ၀ဲလီၤ.
Ref: VOA
