၈.၇.၂၀၂၄
သုးမိၤစိရိၤသနူကလီၤပှီၫ်ကွံာ်အဂီၫ် ဒီးနီၫ်ကစၫ်ပၢဆှၢလီၤသးခွဲးယာ်ကန့ၫ်က့ၤအဂီၫ် ပှၤပၢၫ်ဆၢတၫ်ဖိကညီကလုာ်ခိၣ်နၫ်တဖၣ်, သူၣ်မုၫ်သံးဘိသိၣ်ဒူတဖၣ် ဒီးသိၣ်မှံကရၢသုးမုၫ်သံၣ်ဘိတဖၣ် တၫ်ဟ့ၣ်ယူယီာ်ပာ်ကဲ၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးထုးထီၣ်ပာ်ဖျါဃၣ်၀ဲ ဖဲလၢကညီဒီကလုာ်တၫ်ထူၣ်ဖျဲးသုးမုၫ်ဒိၣ်အမုၫ်နံၤဆၢက့ၤ ပှဲၤထီၣ်(၇၅)၀ီအနံၤန့ၣ်လီၤ.
တကးဘၣ် တၫ်ပၢၫ်ဆၢလၢတ၀ံၤတတဲာ်ဒံးတၫ်လဲၤကျဲအံၤအဂီၫ် ကပၢၫ်ဆၢဒုးလီၤပှီၫ်သကိးတၫ်လၢ တၫ်ဃူတၫ်ဖိးအပူၤအဂ့ၫ်စ့ၫ်ကီး ဆီၣ်တခူထီၣ်ဃၣ်၀ဲန့ၣ်လီၤ.
ဒ်သိးကညီတၫ်ပၢၫ်ဆၢကမ့ၫ်၀ဲတၫ်တဖုဃီဒီးအဂံၫ်အဘါကဆူၣ်အဂီၫ် တၫ်ကရၢကရိသူၣ်ထီၣ်က့ၤ ကညီစိာ်စုက၀ဲၤတဖၣ်ခဲလၢာ်ဆူ ကီၫ်သူလ့ၤသုးမုၫ်ဒိၣ် ဖဲတနံၤဃီဒီးတၫ်ဒုးအိၣ်ထီၣ် ကီၫ်သူလ့ၤပဒိၣ်အနံၤန့ၣ်လီၤ.
ဘၣ်ဆၣ် ဖဲ၁၉၅၆နံၣ် (၂)ဘျီတဘျီတၫ်မၤ၀ဲကညီဒီကလုာ်ခီးကရဲးအပူၤ တၫ်ပာ်ဂၢၫ်ပာ်ကျၢၫ်တ့ၫ်၀ဲ ကညီစိာ်စုက၀ဲၤသုးမုၫ်ဒိၣ်တၫ်သူၣ်ထီၣ်ဆီလီၤဂ့ၫ်ဂီၤတဖၣ်အဃိ လါယူၤလံ(၅)သီအနံၤန့ၣ် တၫ်ပာ်ဂၢၫ်ပာ်ကျၢၤ၀ဲဒ် ကီၫ်သူလ့ၤသုးမုၫ်ဒိၣ်ဒီး လီၫ်ခံတၫ်ကိးပနီၣ်က့ၤအီၤလၢ “ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်“ အသိးန့ၣ်လီၤ.
KNLA အံၤကမၤလၢပှဲၤ၀ဲ ကညီဒီကလုာ်အထံရူၫ်ကီၫ်သဲးတၫ်ကွၫ်စိလၢအမ့ၫ် တၫ်ကသူၣ်ထီၣ်ကညီကီၫ်, တၫ်ကတြီဆၢဒီသဒၢန့ၫ် ကညီဒီတကလုာ်အတၫ်အိၣ်မူ, အတၫ်န့ၫ်သါဒီးအတၫ်အိၣ်စံာ်အိၣ်ကျၢၤ ဒီးနီၫ်ခိသးသမူတဖၣ်ကဘၣ်ဟ့ၣ်လီၤ၀ဲန့ၣ်လီၤ. လၢန့ၣ်အမဲာ်ညါ KNLAအံၤ တၫ်သူၣ်ထီၣ်ဆီလီၤဃၣ်၀ဲဒီး အက့ၫ်အဂီၫ်(၆)ခါန့ၣ်လီၤ.
တကးဘၣ် လၢတၫ်ဒုးထီဒါက့ၤပယီၤသုးမီၤစိရိၤအဆၢကတီၫ် မ့ၫ်သုးမုၫ်ဒိၣ်တဖုလၢအိၣ်ဒီးတၫ်သူၣ်ဒူသးဒူ, တၫ်တူၫ်ခီၣ်ပာ်သးဒီးတၫ်သးသဟီၣ်အလၢအပှဲၤလၢ ပပှၤကလုာ်ကညီဖိခဲလၢာ်အဂီၫ် ဒ်သိးကန့ၫ်ဘၣ်တၫ်ထဲသိးတုၤသိးဒီး နီၫ်ကစၫ်တၫ်စံၣ်ညီၣ်ပၢလီၤသးခွဲးယာ်အဂီၫ်အဃိ တၫ်ပာ်လုၫ်ပာ်ပှ့ၤဒီးပာ်ပနီၣ်၀ဲအ၀ဲသ့ၣ်အတၫ်ကျဲးစၢးတဖၣ်အဂ့ၫ် စံး၀ဲန့ၣ်လီၤ.
